මාතර ස්වර්ණාභරණ සාප්පුව කොල්ල කෑ කොල්ල කරුවන් විසින් පොලිස් නිලධාරියෙක් වෙඩි තබා මරා දැමීමත් දකුණේ පාතාලයේ කෙරුමෙක් වූ මාකඳුරේ මධුෂ්ගේ ප්‍රධානම ගොලයෙකු වන මානෙල් රෝහණ හෙවත් තිලක් ඇතුළු කණ්ඩායමක් අකුරැස්ස විල්පිට රක්ෂිතය අසලදී පසුගිය 25 දා පොලිස් විශේෂ කාර්ය බලකායට වෙඩි ප්‍රහාර එල්ල කිරීමත් සමග පාතාල මර්ධනය කිරීම අභිලාෂයෙන් විශේෂ කාර්ය බළකාය දකුණේ දියත් කර ඇති මෙහෙයුම් තියුණු වුණේය. තිලක් පොලිස් විශේෂ කාර්ය බළකායේ වෙඩි ප්‍රහාරයට ලක්ව මිය ගියේය. ඔහු සමග ගමන් කරමින් සිටි අනෙක් පාතාල සාමාජියන් දෙදෙනා විල්පිට කැලෑවේ අතුරුදන් විය.
ඔවුන් සොයා පොලිස් විශේෂ කාර්ය බළකාය විල්පිට වනයේ ඇරඹූ මෙහෙයුම දැන් අත්හැර දමා ඇත. දින කීපයක් විල්පිට වනයෙන් එළියට පැමිණෙන මාර්ග සියල්ල ආවරණය වන ආකාරයට මුරකපොලු දමා තිබිණි. විශේෂ පොලිස් කණ්ඩායම් කීපයක් යොදවා සිදුකරන මෙම මෙහෙයුමත් සමග බොහෝ අපරාධකරුවන් සිය ජීවත්වන ප්‍රදේශවලින් පලා ගොස් ඇති ආකාරය වාර්තා විය.
පසුගියදා සිදුවූ මාතර ස්වර්ණාභරණ අලෙවිසලේ මංකොල්ලය දකුණේ පාතාලයට පාරාවළල්ලක්ව ආපසු කැරකුණේය. කොල්ලයට පැමිණි බව කියන කොල්ලකරවන් හත් දෙනාගෙන් සිව් දෙනෙක් කොටු කරගන්නට පොලිසියට හැකි විය. මේ පිරිස සුක්ෂම ලෙස පොලිසියෙන් වහං වෙමින් මිනීමැරුම්, කොල්ලකෑම්, මත්ද්‍රව්‍ය ජාවාරම්, කප්පම් ගැනීම් ඇතුළු අපරාධ ගණනාවකට සිදුකළ පොලිසීයටම හිසරදයක් වී සිටි අපාරධාකරුවන්ය. කොස්ගොඩ තාරක, ඔහුගේ සොහොයුරා මධුක නිර්මාල් මෙන්ම පොලිස් වෙඩි පහරින් මිය ගිය චාමර ඉන්ද්‍රජිත් රටේ සංවිධානාත්මක අපරාධ ලයිස්තුවේ ඉහළින්ම සිටි අපරාධකරුවන්ය.
තාරකගේ මවගේ අනුබලය
මේ කොල්ලයට සිය දරුවන් දෙදෙනෙක් යොදවමින් ඊට අනුබල දී තිබුණේ කොස්ගොඩ තාරකගේ අම්මා වන ජානකී ප්‍රියන්තිය. කොල්ලකරුවන් පැමිණි එක් යතුරුපැදියක හිමිකාරිය වූයේ ඇයය. පොලිසිය ඇයව අත්අඩංගුවට ගත්තේය. මේ අත්අඩංගුවට ගැනීමත් පහසු එකක් වූයේ නැත.
ජානකී ප්‍රියන්ති පදිංචිව සිටියේ කොස්ගොඩ නානතොටය. ප්‍රියන්ති පසුගිය පළාත් පාලන මැතිවරණයට ඉදිරිපත් වීමට තරම් දේශපාලන ඇයි හොඳයිකම් නඩත්තු කරගත් තැනැත්තියකි. මෝටර් රථවාහන ලියාපදිංචිකිරීමේ දෙපාර්තමේන්තුවෙන් මෝටර් සයිකලයේ අයිතිය තහවුරු කරගැනීමෙන් අනතුරුව පසුගිය 22 දා සවස 3.30 පමණ පොලිසිය ඇය පදිංචිවී සිටි නිවසට ගියේය.
පොලිසිය නිවසට යනවිට නිවසේ දොර වසා තිබිණි. එහෙත් ඇය නිවසේ සිටින බවට නිශ්චිිත තොරතුරු පොලිසිය සතු විය. ඔවුහු දොර කඩා නිවසට ඇතුළු වුවත් ප්‍රියන්තිව දැකගත නොහැකි විය. අවසානයේ නිවසේ කාමරය යාබද නාන කාමරයක් තුළ සැඟවී සිටි මේ තැනැත්තිය පොලිසිය විසින් අත්අඩංගුවට ගන්නේ නානකාමරයේ දොර කඩා දැමීමෙනි.
පලාගිය සැකකරුවෝ
කොල්ලයේදී කොස්ගොඩ තාරක ඇතුළු අපරාධකරුවන් තිදෙනකු කරාපිටිය රෝහල අසල දමා පලා ගිය සැකකරුවන් තිදෙනකුද ආරක්ෂක අංශ විසින් හඳුනාගෙන තිබේ. එම තිදෙනා වන කොස්ගොඩ ඩිල්ෂාන්, කොස්ගොඩ චූටි සහ හබරකඩ වසන්ත නමැත්තන් ගැන පොලීසිය පුළුල් පරීක්ෂණයක් කරමින් සිටී. ඔවුන් විසින් තුවාලකරුවන් මාතර සිට රතු පැහැති ඇල්ටෝ වර්ගයේ රථයකින් රැගෙනවිත් අතරමඟදි යතුරුපැදි කිහිපයක් පැහැරගෙන එම යතුරුපැදිවල තුවාලකරුවන් නංවාගෙන කරාපිටිය රෝහල අසලට රැගෙන ආවේය. අනතුරුව තුවාලකරුවන් රෝහල ඉදිරිපිට පදික වේදිකාවේ දමා පලා ගොස් තිබිණි.
අත්අඩංගුවට ගැනීමට නොහැකි වූ සැකකරුවන් තිදෙනා ස්වර්ණාභරණ අලෙවිසලෙන් පැහැරගත් ස්වර්ණාභරණ තොගය රැගෙන යන්නට ඇතැයි පොලිසිය විශ්වාස කරයි. පොලිසියට ලැබෙන තොරතුරු අනුව කොල්ලය සැලසුම් කර ඇති බව කියන්නේ හබරකඩ වසන්තගේ හෝමාගම හබරකඩ නිවෙසේ සිටය. හබරකඩ වසන්ත යනු මීට පෙර ද කොල්ලකෑම් කීපයකටම සම්බන්ධ වූවෙකි. හෝමාගම, අතුරුගිරිය, කඩුවෙල ඇතුළු ප්‍රදේශ කීපයකම පාතාල බලය පතුරුවා සිටින ලසන්ත චන්දන පෙරේරා නොහොත් අංගොඩ ලොක්කා නමැති රටින් පැන ගොස් සිටින අපරාධකරුගේ සමීපතම ගෝලයෙක් ලෙස හබරකඩ වසන්ත පෙනී සිට තිබුණේය.
බන්ධනාගාරයේ පිළිගැනීම
හබරකඩ වසන්තගේ බිරිඳගේ නිවස තිබුණේ හබරකඩය. පසුගිය සිකුරාදා සවස විශේෂ කාර්ය බලකාය ඒ නිවස පරීක්ෂා කළේය. නිවසේ තිබී රිවෝල්වරයක්, රත්තරන් බඩු තොගයක් පොලිසියට හමුවුණේ. මේ සමග පොලිසිය වසන්තගේ බිරිඳ, මව, සහ පියා අත්අඩංගුවට ගත්තේය.
රෝහල අසල දමා ගොස් සිටි තුවාලකරුවන් තිදෙනා රෝහල්ගත වන්නේ ව්‍යාජ නම් ගම් ලබා දෙමිනි. එහෙත් අවසානයේ ඔවුන් පොලිසියට කොටුවූයේ සියලු අනන්‍යතා සමගය. දැඩි රැකවල් මැද රෝහලේ ප්‍රතිකාර ලබාදීමෙන් අනතුරුව තාරක ඇතුළු තිදෙනා අඟුණුකොළපැලැස්ස බන්ධනාගාරයට රැගෙන ගියේය.
කොස්ගොඩ තාරක බන්ධනාගාරය වෙත රැගෙන ආ මොහොතේදී රැඳවියන් විසින් ඔහුව පිළිගෙන තිබුණේ උණුසුම් අයුරිනි. රැඳවියන් පිරිසක් තාරකව රැගෙන ගොස් තිබුණේ ඔවුන්ගේ කර මත තබාගෙනය. අනතුරුව ඔවුන් එක්ව බන්ධනාගාරය තුළ තාරකට අවශ්‍ය සියලු පහසුකම් සලසා දී තිබිණි.
මිනිඌෂි ගිනි අවිය
තාරක වීරයෙකු කර ඔහුට සිරකරුවන් ලවා සියලු පහසුකම් සලසා දී තිබෙන්නෙ පාතාලයේ ගෝඩ් ෆාදර් වීමට වලි කන මාකඳුරේ මධුෂ් විසිනි. මධුෂ්ගේ ප්‍රතිවාදි කල්ලි නායකයා වන කොස්ගොඩ සුජිගේ කල්ලියේ අපරාධකරුවන්ද මේ වනවිට ඉන්නේ අඟුණකොලපැලැස්ස බන්ධනාගාරයේය. තාරකට තිබෙන තර්ජන නිසා ඔහුගේ ආරක්ෂාව ගැන මධුෂ් දැඩි සේ සැලකිලිමත් වී තිබිණි. එම නිසා මධුෂ්ගේ ජාලයේ දැනට සිරගතව වෙසෙන සිරකරුවන්ගේ රැකවරණය තාරක ලබා දෙන්නට ඔහු කටයුතු කර තිබුණේය.
මාතර කොල්ලයේදී මුලින්ම අත්අඩංගුවට පත් චාමර ඉන්ද්‍රජිත් ළඟ තිබී හමු වූ මිනිඌෂි වර්ගයට අයත් නවීන ගිනිඅවිය කොල්ලය සිදුවූ දා උදේ චාමරට ලබා දී ඇත්තේ තාරකය. තාරකට එවැනි නවීන පන්නයේ ගිනිඅවි ලැබී තිබුණේ මධුෂ්ගෙන් බව පොලිසිය විශ්වාස කළේය. මධුෂ්ට යුද සමයේ එල්ටීටීඊ සාමාජිකයන් සමඟ ඇසුරක් පවත්වාගෙන යාමට අවස්ථාවක් පෑදී තිබිණි. ඒ ගන්දර අයිස් මංජු හරහාය. අයිස් මංජු මධුෂ්ගේ හිතවතෙකි.
අයිස් මංජු එල්ටීටීඊ බුද්ධි අංශ නායක පොට්ටු අම්මාන් සමඟ සමීප ඇසුරක් පවත්වා තිබිණි. මේ මිනි ඌෂි වර්ගයට අයත් ගිනි අවිය ගැන පුළුල් පරික්ෂණයක් සිදු කරමින් ඇත. ප්‍රභූ ආරක්ෂාවට යොදා ගන්නා, යුද හමුදා කොමාන්ඩෝ බළකාය සහ පොලිස් විශේෂ කාර්ය බළකායේ සාමාජිකයන් පමණක් භාවිතා කරනා මිනි ඌෂි ගිනිඅවිය නිපදවන්නේ ඊශ්‍රාලයේය.
මාලිගාතැන්නේ පාතාල තවාන
මාතර නගරයේ ස්වර්ණාභරණ වෙළදසලක් තුළ සිදුවූ කොල්ලයෙන් අනතුරුව අත්අඩංගුවට ගත් සැකකරුවෙක් මාතර කිරළ කැලේදී පොලිසියට ඇඳුම් පාර්සලයක් පෙන්වන්ට ගොස් වෙඩි කා මිය ගිය පුවත දැන් මේ රටේ කවුරුත් දන්නේය. මෙසේ මිය ගියේ වේයන්ගොඩ මාලිගාතැන්නේ පදිංචිව සිටි චාමර ඉන්ද්‍රජිත් (34) නැමැත්තාය. ඔහු එක් දරු පියෙකි.
පොලිසිය පවසන ආකාරයට මියගිය චාමර ඉන්ද්‍රජිත් නැමැත්තා හමුදාවෙන් පලාගිය මිනීමැරුම් මංකොල්ලකෑම් ඇතුළු අපරාධ රැසකට චෝදනා ලැබ සිටිනනෙකි. සංවිධානාත්මක අපරාධකරුවෙක් ලෙස පොලිසි විසින් හඳුනාගෙන සිටි චාමර ඉන්ද්‍රජිත් පිළිබඳව සඳහන්වන අපරාධ වැලක ආරම්භය ලෙස පොලිස් පොතෙහිස සඳහන් වන්නෙ නීති විරෝධී පස් වෙ‍ළෙඳාමය.
පස් වෙ‍ෙළඳාම
චාමර ඉන්ද්‍රජිත් නැමැති මේ පාතාල සාමාජිකයා යුද හමුදාවේ විශේෂ බලකායේ ආයුධ පුහුණුව ලැබුවෙකි. පුහුණු අතරතුර පැන එන ඔහු ජීවිතය ආරම්භ කරන්නේ වාහන සීස් කරන මැරයෙක් ලෙසය. අනතුරුව මිනුවන්ගොඩ දිවුලපිටිය ප්‍රදේශය මුල් කරගෙන පවත්වාගෙන යන පස් මාෆියාවේ සාමාජිකයෙක් ලෙස ජීවිතය අලුත් කරගන්නේය.
ඔහු මුල්මවරට කොල්ලකෑමකට සම්බන්ධ වන්නේ මීට වසර අටකට පෙරය. ඒ වේයන්ගොඩ මාරපොල ප්‍රදේශයේදීය. කොල්ල කන්නේ බිස්කට් සමාගම වාහනයකි. මේ කොල්ලයේදී ගිනි අවියකින් සන්නද්ධව ඉන්නේ චාමරය.
ඒ කොල්ලය දින කිහිපයක් යනවිට හෙළි වන්නේය. ගිනිඅවි කරුවා හඳුනා ගන්නේය.
වර්ෂ 2010 දී හොංකොං ඇන්ඩ් ෂැන්ග් හයි බැංකුවේ කොටි හතේ මුදල් මංකෝලයට සහභාගීවූ ප්‍රධාන අපරාධකරුවෙක් ලෙස චාමර පොලිස් අත්අඩංගුවට පත්වූයේය. කොල්ලකරුවෙක් ලෙස චාමරව කුප්‍රකට වන්නේ මේ කොල්ලයත් සමගය.
මාතර කොල්ලයට පෙර ඔහු විසින් මරා දමන ලද පුද්ගලයන් තිදෙනෙක් ගැන කියැවෙන්නේය. එක් පුද්ගලයෙක් උදම්මිට සමරේය.
වේයන්ගොඩ උදම්මිට ප්‍රදේශයේ ජීවත් වූ උදම්මිට සමරේත් පාතාලයේ හයි කාරයෙක්ව සිටියේය.
උදම්මිට සමරේ
2016 වසරේ දෙසැම්බර් 24 වනදා වේයන්ගොඩදී උදම්මිට සමරේ නමැත්තා වෙඩි තබා ඝාතනය කරන්නේය. උදම්මිට සමරේ මරන්නට පැමිණ ඇත්තේ චාමර හා චාමරගේ සොයුරෙකි. චාමරගේ සොයුරා තවමත් බන්ධනාගාරගතවය.
ඇප පිට එළියට පැමිණ සිටි චාමරගේ ඊලඟ ගොදුර වූයේ පස් හා වැලි ව්‍යාපාරිකයෙක් වූ රත්න දේවප්‍රිය (37) නැමැත්තාය. පසුගිය අප්‍රේල් 21 දා රාත්‍රියේ නිට්ටඹුව අත්තනගල්ල ප්‍රදේශයේ සංගීත සංදර්ශනයක් අසලදී රත්න දේවප්‍රියට වෙඩි තබා මරා දමන්නේ චාමර බව පොලිසිය කියන්නේය.
සංගීත සංදර්ශනය නරඹන්නට පැමිණි තරුණ ගැබිණියක් ද ඒ වෙඩි ප්‍රහාරයට ලක්වී තිබිණි.
උදම්මිට සමරේ ඝාතනයේදී චාමරට ඇප ලැබෙන්නේ දැඩි ඇප කොන්දේසි පිටය. ඔහු වෙනුවෙන් ශරීර ඇප තිබ්බේ ඔහුගේ බිරිඳය. රත්න දේවප්‍රිය මරා දැමීමෙන් අනතුරුව චාමර පොලිසිය මගහැර සැඟව සිටි නිසා පොලිසිය ඔහුගේ බිරිඳ අත්අඩංගුවට ගෙන අප්‍රේල් 23 දා ඇයව අධිකරණයට ඉදිරිපත් කළේය.
ඊට මසකට පසු, එනම් ඉකුත් මැයි 24 වනදා නිට්ටඹුව හක්වඩුන්න ප්‍රදේශයේදී යතුරු පැදියකින් පැමිණි කාන්තාවකට වෙඩි තබා ඝාතනය කරන ලද්දේ චාමර බව පොලිසිය විසින් හඳුනා ගත්තේය. විනීතා පද්මිණී(53) නැමැති මේ කාන්තාවකට කල්එළිය මුදුන්ගෙදර ප්‍රදේශයේ පදිංචිව සිටියේය. ඇයට වෙඩි තබා මරා දමා තිබුණේ ප්‍රදේශයේ මූල්‍ය සමිතියක රැස්වීමකට සහභාගී වී එන අතරතුරය.
දිගින් දිගටම අපරාධ කරමින් පොලිසිය මග හරිමින් සිටි චාමරගේ ශරීර ඇපයේ හිලව්වට ඔහුගේ බිරිඳට බන්ධනාගාරගත වන්නට සිදුවිය. ඇය තවමත් බන්ධනාගාරගතවය. ඔවුන්ගේ කුඩා දරුවා යන එන මං නැතිව අසරණවය. මේ දරුවා අනාගත අපරාධකරුවෙක් නොකිරීමේ වගකීම දැන් මේ සමාජයට තිබේ.
චාමර ඉපදුනේ වේයන්ගොඩ මාලිගාතැන්නේය. මාලිගා තැන්නට රජවත්ත කියාත් කියන්නේය.
ජනවහර අනුව රජවත්ත කෝටු රජ්ජුරුවෝ ලෙස හැඳින්වෙන ප්‍රාදේශීය නායකයෙකු වාසය කළ භූමියකි. මාලිගාතැන්න අද වනවිට සමාජයේ අතපල්ලෙන් වැටුණු මිනිසුන්ගේ කොලනියකි.
නූගතකම පැතිරුණ, දරිද්‍රතාවයෙන් පීඩිත මිනිසුන් පිරිසක් දුරාවාරයේ ජීවත්වන රජවත්තේදී පාතාල සාමාජිකයන් විනා ශාන්තුවරයන් බිහිවන්නට ඉඩක් නැත. දන්නා කාලයේ සිට හොර කසිප්පු තොග හතරවටේ බෙදා හැරුණේ රජවත්තෙනි.
මේ වනවිට ගම්පහ දිස්ත්‍රික්කයේ එක් කුඩු තිප්පලක් නිර්මාණය වී ඇත්තේත් රජවත්තේය.
වාර්තාවන ආකාරයට මේ වනවිට රජවත්තේ අවුරුදු විස්ස ඉක්මවූ තරුණයන්ගෙන් කුඩු වලට ඇබ්බැහි වී නැත්තේ අතේ ඇඟිලි ගණනින් කිව හැකි පිරිසකි.
ෆිනෑන්ස් සමාගම්වල සීසර්වරුන්
චාමර ඉන්ද්‍රජිත් පියා නැතිව හැදී වැඩෙන්නේ මේ පරිසරයේය. මහා සමාජයෙන් පිටමං කරන ලද, අශිෂ්ට උප සංස්කෘතියක හැදෙන මේ මිනිසුන්ගෙන් එකෙක් මිනී මරුවෙක්, අපරාධකරුවෙක් වූ විට ඔහුට අනවශ්‍ය වටිනාකමක් දී නඩත්තු කරන්නේත් සමාජය ය. එවැනි අපරාධකරුවෙකුගේ නිවසට කාටත් හොරෙන් මාසෙට සරිලන්නට හාල් යවන, එළවළු ටික පළතුරු ටික යවන උන් සිටින්නේය.
රටේ පිළිගත් ගෞරවණීය යැයි කියනා ෆිනෑන්ස් සමාගම්වල සීසර්වරුන් වන්නේ ඔවුන්ය. රාජ්‍ය ඉදිකිරීම් සඳහා වුවත් අවශ්‍ය පස් සැපයීම කරනු ලබන්නේ මැරයන්ගෙන් සමන්විත පාතාල කල්ලිය. සමහර දේශපාලන බලවතුන්ගේ සමීපතම ආරක්ෂකයන් මේ පාතාලයන්ය.
පාතාලයෙක් වීමේ සිහිනය හැදෙන්නේ අපරාධකරුවෙකුට අනවශ්‍ය පිළිගැනීමක් සමාජයෙන් ලැබෙන්නට පටන් ගැනීමත් සමගය. ඒ පිළිගැනීම හරහා සමාජය විසින් සිදුකරන්නේ මේ අනීතික මිනීමරු සංස්කෘතිය නඩත්තුකර පවත්වා ගැනීමය. මේ හීනය පිටුපස තවත් පෝලිමක් එන්නට නියමිතය.
අවි ආයුධ හුරු, මරාදැමීම ප්‍රගුණ කළ හමුදාවෙන් පැන ගිය අටදහසකට අධික තරුණ පිරිසක් රට තුළ නිදැල්ලේ සැරි සරති. අප හමුවේ ඇත්තේ ආයුධ පෙන්වන්නට ගොස්, ඇඳුම් බෑග් සොයන්නට ගොස් සිදුවන වෙඩි හුවමාරුවලින් අනතුරුව අපරාධකරුවන් මරා දමා ඉවරයක් කළ හැකි ප්‍රශ්නයක් නොවේ.
මිනිසුන් ඉපදෙන්නෙ මියයන්නටය. එක් පැත්තකින් මැරෙන්නට සිටින මිනිසුන් මරා දැමීම දඬුවමක් යැයි සිතන මානසිකත්වයෙන් මිදීමට සමාජය තවම සැරසී නැත. අප ඉදිරියේ ඇති සමාජ විෂම චක්‍රයට පිළියමක් සොයාගන්නට අපොහොසත් වනතුරු අපට රටක් ලෙස මේ ව්‍යසනයෙන් ගැලවුමක් නැත.
