යාපනයේ මිනිසුන්ට සිදු වන්නේ කුමක්දැයි වරක සිතා ගැනීමට පවා අපහසුය. ඔවුන්ගේ ජීවිත පසු පස කුමන හෝ අදිසි හස්තයක් වරින් වර ඔවුන් සොයා පැමිණෙයි.
අවුරුදු තිහක්ම මේ වැසියෝ බැට කන ලද්දේ යුද්ධයෙනි. යාන්තමට යුද්ධය අවසන් වී සාමය එළඹි මොහොතේ ඔවුන්ව සොයාගෙන පැමිණියේ ''ග්‍රීස් යකුන්'' පිරිසකි.
දහවල් කාලයේ මහපොළොව සමග ඔට්ටු වී ඇඟ පත වෙහෙස නිවාගැනීමට ඔවුන් උත්සහ දැරුවත් යුද්ධය අවසන් වීමත් සමඟම නිවෙස්වලට කඩාගෙන වැදුණු ''ග්‍රීස් යකුන්'' නිසා නින්ද පමණක් නොව ඔවුන්ගේ පදිංචිය ද මාරු කරන්නට සිදු විය.
මුළු යාපනයම එදා මේ ''ග්‍රීස් යකුන්'' ගේ හොල්මන් නිසා භීතියෙන් ඇළලී ගියේය. බොහෝ පිරිස් යාපනය අතහැර දමා කොළඹ තාවකාලිකව පදිංචියට යෑමට තරම් යකාගේ බිය එදා තීව්‍ර විය.
කාලයාගේ ඇවෑමෙන් ග්‍රීස් යකා යාපනයෙන් ගියේය.අනතුරුවයාපනයේ වැසියන්ව සොයා ගෙන පැමිණියේ කඩු කාරයෝය. කඩු කිණිසි අතට ගත් කිරිකජු වියේ පසු වන කොල්ලන් බොහෝ දේ කොල්ල කද්දී යාපනයේ වැසියන්ට නැවත වරක් භීතිය,ත්‍රාසය,සැකය හා අවිශ්වාසය යන සියලු දේ තුරුලු කරගන්නට සිදු විය.
ඒ බිය පහව යනු ඇතැයි යාපනයේ වැසියන් විශ්වාස කළ ද වසර දෙකහමාරක්ම ඒ කඩුකාරයන් වරින් වර යාපනයට පැමිණෙන්නේ එක් එක් අලුත් නම් පටබැදගෙනය. මේ නිසා ඒ බිය තවමත් මේ අහිංසක වැසියන්ගේ සිත් තුළින් සම්පූර්ණයෙන්ම ඉවත් ගොස් නැත.
කඩු කිණිසිකාරයන් සිටිද්දීම යාපනයේ වැසියන්ව සොයාගෙන මහ දවල් කාලයේ පවා පැමිණියේ භූත කොට්ඨාසයකි. ඒ භූතයෝ යාපනයේ වැසියන් ලෙඩ කළහ. භීතියට පත් කළහ. පවුල් පිටින්ම වනසා දැමූහ.
යාපනයේ පවුල් කීපයකට අයත් ව්‍යාපාර මුළුමනින්ම සුන්නද්ධූලි කොට දමද්දී තවත් බොහෝ දෙනෙකුගේ ව්‍යාපාර වනසා දැමීය. ඉතාම කෙටියෙන් කිවහොත් යාපනයේ සුළු වෙළෙන්ඳන් සඳහා වූ වෙළෙඳ සංකීර්ණයම අමු සොහොනක් බවට පත් කිරීමට ඒ මහා භූත උවදුරට හැකි විණි.අදටත් ඒ වෙළඳ සංකීර්ණය පාළුවට ගොසින්ය.
ඒ භූත උවදුර අවස්ථා තුනකදීම වරින් වර ඉස්මතු වූ නිසා යාපනයේ වැසියන්ට ''ඒකත් අහවරයි'' යනුවෙන් සිතා හිත එකලස් කරගැනීමට නොහැකිය. ගිය භූතයන්කොයි වේලාවක හෝ නැවත පැමිණෙනු ඇතැයි යන විශ්වාසය යාපනයේ වැසියන් තුළ පවතී.
භූතයන්ගේ යළි පැමිණීම අපේක්ෂාවෙන් කඩුකාරයන්ගේ භීතිය මැද කල් ගෙවන යාපනයේ වැසියන්ට අලුතෙන්ම කඩාපාත් වී ඇති ව්‍යසනය මහා කාල යක්ෂයෙකුගේ එබිකම් කිරීමයි. මහා කාල යක්ෂයා යැයි කියන්නේ රාත්‍රී කාලයට මේ දිනවල යාපනය පැමිණෙන එම යක්ෂයා කළුම කළු පාට වීම නිසාය.
යාපනයේ අරියාලේ හා අරියාලේ නැඟෙනහිර පළාතේ වැසියන්ට මේ යක්ෂයා මුලින්ම දැක ගන්නට ලැබුණේ නිවෙස් වලට එබිකම් කිරීම නිසාය. මේ ගැන අසල්වැසියන්ට හා යාපනයේ දන්නා අයට තොරතුරු කියන්නට පටන්ගැනීමත් සමඟම බොහෝ දෙනෙකු කියා සිටියේ කාලයක් භුත කතා පැතිරුණා මෙන් මේ යක්ෂ කතාව ද තැනින් තැන නොකියන ලෙසය.
ඊට හේතුව වූයේ ඒ කාලයේ යාපනයේ පැවති භූත වුවදුර ගැන කියව කියවා සිටීම නිසා යාපනයේ භූත උවදුර මහා නැස්පැත්තියක් බවට පත් වුණේ යැයි විශ්වාසයක් මේ වැසියන් තුළ පැවතීමය. යාපනයේ වැසියෝ මේ යක්ෂයාටද ඇති බිය නිසා කීප දිනක් නිහඬව සිටියහ. නමුත් යක්ෂයාගේ රාත්‍රියේදී යක්ෂයා නිවෙස් වලට පැමිණීමට අමතක කළේ නැත. මුලින්ම ඔවුන් ගමේ ග්‍රාම නිලධාරීවරයාට කියා සිටියේය. භූතයන්ගේ අත්දැකීම් බහුලව තිබුණු යාපනයේ වැසියන් මේ යක්ෂයා ගැන එතරම් තැකීමක් නොකළේ මීට මාස තුනකට පමණ ඉහතදී ද යාපනයට යකෙක් පැමිණ සිටීම නිසාය. සුදු රෙද්දක් පොරවාගෙන එක් අතකින් ලේ හැලෙන කළු කුකුළකු අතින් ගත් යකා යාපනයේ බොහෝ දෙනෙක් දැක තිබුණහ. ඒ යකාගෙන් යාපනයේ කිසිවෙකුටත් කරදරයක් නොවූ නිසා යාපනයේ අරියාලේ ගමේ උදවිය අලුත් යක්ෂයා ගැන කී කතාව පළාතේ ග්‍රාම නිලධාරීවරයා ද නොසලකා සිටියා විය හැකිය.
ග්‍රාම නිලධාරීවරයාට යක්ෂයාගේ තරම අවබෝධ වූයේ එක් දිනක් ඔහුගේ නිවසට ද මේ කියන යක්ෂයා පැමිණීමත් සමඟය. අවසානයේ දී ඊට පසු දින උතුරු පළාත් ප්‍රධාන අමාත්‍යවරයාගේ මහජන දිනයක් පැවති නිසා ඊට සහභාගී වූ යාපනයේ අරියාලේ ගමේ වැසියෝ මේ අලුත්ම යක්ෂයා ගැන සී.වී.විග්නේස්වරන් මහතාට තොරතුරු ඉදිරිපත් කළහ. ප්‍රධාන අමාත්‍යවරයා ඒ ගැන එතරම් තැකීමක් නොකළ නිසා ගම් වැසියෝ එය මහා බර කතාවක් ලෙස ඉදිරිපත් කළෝය.
ප්‍රධාන අමාත්‍යවරයා කළේ පාසලේ පන්තියක නඩු ඇසීමකි.
''හොඳයි ඔය කියන යකා දැක්ක අය මේ පැත්තකට එන්න... අනෙක් අය අනෙක් පැත්තට වෙන්න''
ප්‍රධාන අමාත්‍යවරයා ජනතාව පිල් දෙකකට බෙදා යකාගේ හැටි යකා දුටු අයගෙන් විමසා සිටියේය.
''ඒකා කළුම කළු පාටයි ...මූණත් කළුයි..තැනින් තැන සුදු පාට ගාලා වගේ...දත් ඔක්කොම එළියට දාලා ඔළුව වන වනා හිනා වෙනවා. එහෙම හිනා වෙනකොට අමුතු සද්දයක් ඌ කරනවා. ඒ සද්දේ ගොර..ගොර ගාලා තමයි ඇහෙන්නේ. මිනිස්සු දිහා බල බලා ඔළුව වනනවා. කොණ්ඩේ පොකුටුයි. උස නෑ මිටිම මිටියි. බලන්න බයේ බෑ සර්...අනේ මෙකට මොකක් හරි කරලා දෙන්න.''
යාපනයේ වැසියන්ගේ කතාව අසා සිටි ප්‍රධාන අමාත්‍යවරයා සිනා සී කිසිවෙකු බිය විය යුතුව නැතැයි කියා සිටියේය.
''මේ කුරු මිනිස්සු මිටි මිනිස්සු යක්කු කියලා ජාතියක් ලෝකේ නැහැ. ඔව්වා මනස්ගාත. ඒක නිසා ඔයාල කාලා බීල හොඳට දොරවල් වහගෙන නිදා ගන්න'' යනුවෙන් පැවසූ විග්නේස්වරන් මහතා නිහඬ විය. යාපනයේ යක්ෂයාගේ කතාවට ඉගිලෙන්නට තටු ආවේ මේ කතාවත් සමගිනි.
''අඩේ යාපනේට ආයෙත් යකෙක් ඇවිල්ලාලු...අද මිනිස්සු ඇවිත් සීඑම් ට පැමිණිලි කළාලු...අපි යමුකෝ සීඑම් හම්බ වෙන්න''
අලුත් පුවත් මවන යාපනේ මාධ්‍යවේදියෝ ප්‍රධාන අමාත්‍යවරයාගේ නිවසටම ගොස් ප්‍රවෘත්ති සාකච්ඡාවක් ඉල්ලා සිටියහ.
ප්‍රධාන අමාත්‍යවරයා යකා ගැන කියා සිටියේ මිනිස්සුන්ට කී කතාවමය. ඊට අමතරව ඔහු ඡායාරූප ගණනාවක් පෙන්වමින් යාපනයේ බිය ඇති කරන මිනිස්සු ගැන බොහෝ දේ කියා සිටියේය. යකාගේ කතාව එතැන නතර විණි.
නමුත් යක්ෂයා දැක බියට පත් වූ පිරිස ඒ සමඟම ගොස් යාපනයේ පාර්ලිමේන්තු මන්ත්‍රීවරුන් හා පළාත් සභාවේ ආනන්දි සෂිහරන් අමාත්‍යවරිය හමු වී යක්ෂයා ගැන කියා සිටියහ.
 |
| පොලිසිය සමග ප්‍රාෙද්ශීය දේශපාලනඥයෝ |
ඔවුන් පිරිස මේ ගැන පොලීසියට කීම නිසා සහකාර පොලිස් අධිකාරී තුසිත පෙරේරා මහතාට යාපනයට පැමිණි අලුත් යක්ෂයා ගැන සෙවීමට අරියාලේ පළාතට යෑමට සිදු විණි.
දැන් යාපානයේ අරියාලේ ගම්මානයේ යකා එළවීමට මහා තොවිලයක් නොව මහා සාකච්ඡාවකි. යක්ෂයාගේ තරම කොතෙක්දැයි කිවහොත් මේ සාකච්ඡාවට සහභාගී වූ ප්‍රමාණය විශාල වූ නිසා ශබ්දවාහිනී යන්ත්‍ර හා මයික්‍රෆෝන් ද භාවිත කිරීමට සිදු විය.
දේශපාලනඥයෝ හා පොලීසිය බලා සිටිද්දී යක්ෂයා දුටු පිරිස ''ගීතයෙන් ගීතය'' වැඩ සටහනක මෙන් යක්ෂයාගේ තොරතුරු විස්තර ඉදිරිපත් කළහ.
යක්ෂයාගේ හැඩරුව විස්තරය ප්‍රධාන අමාත්‍යවරයාට ඉදිරිපත් කළ විස්තරයමය. මහා සභාවක යක්ෂයා දුටු පුද්ගලයෝ සියයක් පමණ සිටිය ද ඔවුන් සියල්ලන්ගේම කතාව එකම කතාවකි. මේ සියලු කතාවලින් පසක් වූ එකම දෙය වූයේ යාපනයේ තැන් තැන්වලදී යක්ෂයා හෝ වෙන මොකෙක් හෝ දැක ඇත්නම් සියලුම දෙනා දැක ඇත්තේ එකම එකෙකු පමණක් බවය.නමුත් වෙනස් කතාවක් වූයේ යක්ෂයාගෙන් සිදු වන බිය ජනක තත්වය විස්තර වීමය.
''මේ යක්ෂයා කොහෙන් හරි එබිලා බලනවා. දොර ජනෙල් වහලා ඉන්න කිව්වට වැඩක් නෑ. එබිලා දත් සේරම විලිස්සලා හිනා වෙලා අමුතු සද්දයක් දානකොට කවුද බය වෙන්නේ නැත්තේ. ඒක නිසා මේ යක්ෂයාව අල්ලන්න පොලීසිය උදව් කරන්න.
අපිට ගමේ අයට එකතු වෙලා මූ අල්ලන්න බයයි. මොකද මේ එන යකත් අර කඩුකාරයන්ගේම එකෙක් ඔත්තු බලන්න එනවද දන්නෙත් නෑනේ.
“අපි අතේ ආයුධයක් නැතුව අපිට ඒ යක්ෂයව අල්ලන්න බැහැ''
අලි මදිවාට හරක් කීවා සේ දැන් පොලීසියට සිදුව ඇත්තේ කඩුකාරයන් මර්දනය කිරීමට අමතරව යක්ෂයන් දමනය කිරීමට ද පොලිස් බලය යෙදීමට සිදුවීමය.
යාපනයේ ක්‍රියාත්මක කඩු කල්ලියත් මේ යක්ෂයාත් අතර එතරම් වෙනසක් ද නොමැත. ඊට හේතුව මේ දෙගොල්ලන්ම පැමිණෙන්නේ මහ රාත්‍රීයේ හෝ අලුයම් කාලයේදීය. එමෙන්ම ඔවුන් දෙගොල්ලන්ම පැමිණෙන්නේ හොර රහසේය.
වෙනසකට ඇත්තේ කඩුකාරයන් මිනිසුන්ව කැපීමත් යක්ෂයා මිනිසුන්ව නොකපා බිය කිරීමත්ය. ඒ අතින් නම් යකා කඩුකාරයන්ට වඩා හොඳය. මානුෂිකය.
ගිනි පෙනෙල්ලෙන් බැට කෑ එකා කණාමැදිරියාටත් බියය.
විවිධ අරෝවන් නිසා බියට පත් වූ යාපනයේ ජනතාවට මේ අලුත් යක්ෂයාගේ බිය ද විශාල බියකි.
හැමදාම බියෙන් සැකෙන් යුතුව ජීවත් වන යාපනයේ ජනතාව වෙනුවෙන් යාපනයේ අලුත්ම යක්ෂයා ද දමනය කිරීමට ආරක්ෂක අංශ වල පූර්ණ සහයෝගය අවශ්‍යව ඇත.
