මෙය මෑත කාලයේ දී ප්‍රාථමික පාසලක සිදු වූවකි. මේ සිදු වීම නිසාම ‘මුල්ගුරු පන්තියෙන් පිටවී යන තුරු ගණිත පාඩම කෙරුවා‘ වාගේ යන පිරුළ ද එම පාසලේ පැතිර ගියේය.
මෙය පිටිසර පාසලකි. සිද්ධියට සම්බන්ධ ගුරුවරිය හැඩකාරියක් වුවාය. ඇයගේ හිනාවට හා කතාවට මුල් ගුරුවරයා වශී වී සිටියේය. ඒ බව කවුරුත් කතා කළේ හොර රහසේය.
මුල්ගුරුතුමා හේතුවක් ඇතිවත් නැතිවත් හැම විටෙකම පාහේ යට කී ගුරුවරිය උගන්වමින් සිටින පන්තිය පැත්තේ ආවාය ගියාය. කල් ගත වෙද්දි මෙය ගුරුවරියට මහත් කරදරයක් බවට පත් විය. එහෙත් ඒ වබ පැවසුවහොත් අනවශ්‍ය කරදරවල පැටලීමට සිදුවේ යැයි ගුරුතමිය සිතුවාය. ඇය බොහෝ දිනක් කල්පනා කළාය. අවසානයේ මුල් ගුරුතුමාගේ පැමිණීම තමන්ට කරදරයක් බව ව්‍යංගයෙන් පැවැසීමට ඇය ඉටා ගත්තාය. එ සඳහා කළයුත්ත ගැන ද ඇය තීරණය කළාය.
දිනෙක මුල් ගුරුතුමා සුපුරුදු පරිදි ගුරුවරිය උගන්වමින් සිටි පන්තියට පැමිණියේය.
ඔහු එසේ එන විට ඇය කුමන දෙයක් කරමින් සිටිය ද ගණිතය පාඩම උගන්වන්නට පටන් ගත්තාය. ඇය දිගින් දිගටම ගණිතය පාඩම ඉගැන්වුවාය. මුල් ගුරුතුමාට වචනයක් වත් කතා කිරීමට ඉඩ නොතබා ඇය දිගින් දිගටම පාඩම ඉගැන්නුවාය. ගුරුතුමාට ඇයගේ පාඩමට බාධා කිරීමට ද නොහැකි විය. කලක් යන විට මුල් ගුරුවරයා ඇයට බාධා කරන්නට නොගියේය. මේ නිසා දෙදෙනාගේම ගෞරවය රැකෙන පරිදි කටයුතු කිරීමට ඇයට හැකි විය. ඇය පිළිබඳ සිත උපන් අදහස මුල් ගුරුතුමා තම සිතට පමණක් සිමා කර ගත්තේය.
ටික කලකින් මුල් ගුරුතුමා වෙනත් පාසලකට මාරු වී ගියේය.
එයින් පසු ගුරුවරිය පාසලේ තම යෙහෙළියකට සිදුවීම පැවැසුවාය. ඇයගේ කතාව ඇසූ යෙහෙළිය ගුරුමණ්ඩලයේ සිටි සියල්ලන්ටම ඇසෙන සේ කියා සිටියේ ‘මුල්ගුරු පන්තියෙන් පිටවන තුරු ගණිත පාඩම කළා වාගේ‘ කියාය.
සමන් චන්දන කුමාරසිංහ
