වෛද්‍යවරුන්ව සලකන්නේ දේවත්වයෙනි. ඒ ඔවුන්ගේ රැකියාව ඉතා උත්තරීතර රැකියාවක් වශයෙන් ඇති පිළිගැනීම නිසාය. මිනිසුන්ගේ පැත්තෙන් එම කාරණාව එසේ වූවත් විවිධ විසමාචාර හා පාපතර ක්‍රියා සිදු කරන වෛද්‍යවරුන් පිළිබඳ අපට නිරන්තරයෙන් අසන්නට ලැබෙයි.
කිලිනොච්චියේ පලෙයි රෝහලේ සේවය කරන සින්නයියා සිවරූබන් වෛද්‍යවරයා ගැන මේ දිනවල කතා බහ කෙරෙන දේ බොහෝය. ඔහු අත්අඩංගුවට ගන්නා තුරුම පලෙයි ප්‍රදේශයේ වැසියන්ට ඔහු දෙවියෙක් විය.
ඒ ඔහුගේ ගුප්ත ඉතිහාසය පිළිබඳ කිසිවක් නොදන්න කිලිනොච්චියේ අහිංසක ජනතාව ඔහුගෙන් පැතුවේ ප්‍රතිකාර පමණක් වීම නිසාය.
යුද හමුදා බුද්ධි අංශය සිවරූබන් වෛද්‍යවරයා අත්අඩංගුවට ගත් වහාම පලෙයි ජනතාව රෝහල ඉදිරිපිටට පැමිණ උද්ඝෝෂණයක් කරමින් ඉල්ලා සිටියේ සිවරූබන් වෛද්‍යවරයා වහාම නිදහස් කරන ලෙසයි.
 |
| සින්නයියා සිවරූබන් |
හමුදාව ඇතුළු ආරක්ෂක අංශ විසින් කරනු ලබන අත්අඩංගුවට ගැනීම් පිළිබඳ බහුල අත්දැකීම් ඇති කිලිනොච්චි වැසියෝ මේ අත් අඩංගුවට ගැනීම පිළිබඳ ද ආරක්ෂක අංශවලට දොස් නැඟූහ.
සිවරූබන් වෛද්‍යවරයා අත්අඩංගුවට ගෙන දින දෙකක් යෑමටත් පෙර යුද හමුදාව පොලීසිය හා පොලිස් විශේෂ කාර්ය බළකාය එක් වරම කිලිනොච්චියේ වට්ටකච්චි පළාතට කඩා පැන්නේය. උදෑසනම ඔවුන් පරීක්ෂාවට ලක් කළේ දෙමළ ජාතික සන්ධානයේ කිලිනොච්චිය දිස්ත්‍රික් පාර්ලිමේන්තු මන්ත්‍රී එස්.ශ්‍රීධරන් මහතාට හා ඔහුගේ සහෝදරයාට අයත් නිවාස හා ඉඩම් කීපයකි.
ඊට විරුද්ධත්වය ප්‍රකාශ කළ ශ්‍රීධරන් මන්ත්‍රීවරයා වහාම කතානායක කාර්යාලයට කතා කොට මේ සෝදිසි කිරීම නීති විරෝධී බවත් මේ නිසා තමන්ගේ ගෞරවයට විශාල හානියක් සිදු වී ඇති බවත් දන්වා සිටියේය.
ඔහු තවත් අයට කතා කරමින් සිටින විට අනෙක් දුරකතනයට ඇමතුමක් ලබා දුන්නේ ශ්‍රීධරන් මන්ත්‍රීවරයාගේ සහෝදරයාය.
''අයියා ඉක්මනට එන්න... මගේ වත්ත ඩෝසරයක් දාලා ආමි එකෙනුයි පොලීසියෙනුයි හාරනවා. නඩු කාරයත් ඇවිල්ලා ඉන්නවා. මොකද්ද කොළයක් මට දීලා අස්සනකුත් ගත්තා'' යනුවෙනි.
නමුත් ශ්‍රීධරන් මන්ත්‍රීවරයා එහි නොගොස් මේ සිද්ධ වෙන ඇබැද්දි ගැන වගකිවයුත්තන්ට කරුණු කියන්නට ඔහුගේ කාලය වෙන් කළේය.
මේ අතරවාරයේ කිලිනොච්චියේ දෙමළ මාධ්‍යවේදීන් ඉඩමේ හාරන දර්ශන ඡායාරූප ගත කොට වහාම පැමිණියේ මන්ත්‍රීවරයාගේ නිවසටය.
එහිදී කිසිදු පිළිවෙළක් නැති මාධ්‍ය හමුවක් ලයිිලහියේ පැවැත්විණි. එහිදී ශ්‍රීධරන් මන්ත්‍රීවරයා කියා සිටියේද මෙය නීති විරෝධී කැණීමක් බවයි.
''හමුදාව මේ සේරම දේවල් හාර හාර මොනවදෝ හොයනවා. මම මේක ගැන ඉහළට කිව්වා. පළාතේ ආරක්ෂක ප්‍රධානීන් කිව්වේ අධිකරණයේ නියෝග ලබාගෙන මේ පරීක්ෂා කිරීම් කරනවා කියලයි. ඇයි මොනවටද පරීක්ෂා කරන්නේ ඇයි එහෙම කරන්නේ කියලා ඒ අය කිව්වේ නැහැ. මම මේ ගැන සඳහන් කරලා මගේ විරෝධය පළ කරලා කතානායක කාර්යාලයට ලියුමක් යවනවා.''
“මන්ත්‍රීතුමාගේ ඉඩම් ගෙවල් සෝදිසි කරන්න බැරි වුණාට මල්ලිගේ ඒවා එහෙම පරීක්ෂා කරන්න පුළුවන් නේද?” යනුවෙන් පෙරළා ප්‍රශ්න කිරීමට තරම් හැකියාවක් තිබූ දෙමළ මාධ්‍යවේදියෙක් එතැන සිටියේය.
ඒ ප්‍රශ්නයට ඔහු පිළිතුරු දීම වෙනුවට කළේ ''අපි බලමුකෝ එයාලා මොනවද හොයන්නේ කියලා .ඊට පස්සේ ඔය ගැන කතා කරමු’’ යනුවෙනි.
කිලිනොච්චිය දිසා විනිසුරුවරයා ඉදිරියේදී බැකෝ යන්ත්‍රයක් යොදාගෙන වරුවක්ම මන්ත්‍රීවරයාගේ සහෝදරයාගේ ඉඩම තුළ කැණීම් කළත් හමු වූයේ පැරණි පොහොර උර කීපයක් රෙදි කැබලි කීපයක් පමණකි.
නමුත් ශ්‍රීධරන් මන්ත්‍රීවරයා ඉන් පසුව කිසිවක් කීමට ගියේ නැත.
කිලිනොච්චියේ ආරක්ෂක අංශ ප්‍රධානියෙකුගෙන් විමසූ විට ඔහු මේ ගැන කීවේ වෛද්‍ය සිවරූබන් සමඟ ඉතා කිට්ටු සම්බන්ධයක් ශ්‍රීධරන්ට තිබුණ බවය. එබැවින් එම සෝදිසි කිරීම් සිදු කළ බවය. වෛද්‍යවරයා ටික කාලයක් කිලිනොච්චි රෝහලේද සේවය කර තිබිණි.
අනෙක් කාරණාව නම් ශ්‍රීධරන් මන්ත්‍රීවරයාගේ දේශපාලන කාර්යාලයේ තිබී යුද සමයේදී විශාල පුපුරන ද්‍රව්‍ය තොගයක් හමු වී තිබීමය. “මේ කාලෙදී ඔය සිවරූබන් කියන වෛද්‍යවරයා සේවය කරලා තියෙන්නේ කිලිනොච්චිය රෝහලෙයි. මේ වෛද්‍යවරයාත් මන්ත්‍රීවරයාත් අතර ඉතා දැඩි මිතුරුකමක් තිබිලා තියනවා.” නිලධාරියා පැවසීය.
“බුද්ධි අංශ සොයාගත් තොරතුරුවලට අනුව මේ වෛද්‍යවරයා යුද සමයේදී කොටින්ට උදව් කොට තිබෙනවා. ඔහු ගිලන් රථවල ආධාරයෙන් කොටි සංවිධානයට අවශ්‍ය ආයුධ පුපුරන ද්‍රව්‍ය ඒ ඒ තැන්වලට ගෙනිහින් දීලා තියනවා.”
“නමුත් දැන් ඒ තොරතුරු සනාථ කරගැනීම ඉතාම දුෂ්කරයි. ඒත් එල්.ටී.ටී.ඊ. සංවිධානය කිලිනොච්චිය අත ඇරලා ක්‍රමයෙන් මුලතිව් දෙසට යන කොට ඔවුන්ගේ පුපුරන ද්‍රව්‍ය සහ අවි ආයුධ ගොඩාක් සඟවලා වළලලා තියෙන්නේ කිලිනොච්චියේ කියන කතාව ඇත්තයි.”
වෛද්‍යවරයාත් මන්ත්‍රීවරයාත් දෙන්නම හිතවත් නිසා මේ කොතැනක හරි ඉඩමක ඒවා වළ දමා තිබෙනවා යැයි කියන සැකය තමයි දැනට තියෙන්නේ. ඒ ගැන තවත් පරීක්ෂණ සහ විමර්ශන කරගෙන යනවා. ඉදිරියේදී ලැබෙන තොරතුරුවලට අනුව අපි කැණීම් කරලා ඒ දේවල් සොයාගන්නට හැකි වෙයි කියලා බලාපොරොත්තු වෙනවා.''
කිලිනොච්චියේ ආරක්ෂක අංශ ප්‍රධානියා ඒසේ කතා කොට පැය විසි හතරක් යෑමටත් පෙර යාපනයේ අලියාවලෙයි ප්‍රදේශයේ මුහුදෙන් ප්ලාස්ටික් පුපුරන ද්‍රව්‍ය කිලෝ පහළොවක ප්‍රමාණයක් හමු විය. ඉතා සුරක්ෂිතව ප්ලාස්ටික් බැරලයක දමා මුහුද යට සඟවා තිබූ මේ පුපුරණ ද්‍රව්‍ය පිළිබඳ පොලිස් ත්‍රස්ත මර්දන ඒකකයට තොරතුරු සපයා ඇත්තේද ශිවරූබන් වෛද්‍යවරයා විසිනි. 
ඒ පුපුරන ද්‍රව්‍ය පිළිබඳ සිවරූබන් වෛද්‍යවරයා ආරක්ෂක අංශ වලට ප්‍රකාශ කරද්දී ඔහු පවසා ඇත්තේ පුපුරන ද්‍රව්‍ය අඩංගු පාර්සලයක් තමන් නොදන්නා පුද්ගලයෙකු විසින් ඔහුගේ නිවසට රැගෙන විත් තිබු බවය.
පාස්කු ඉරිදා සිදු වූ බෝම්බ ප්‍රහාරයෙන් පසුව තමන් බියට පත් වූ නිසා ඒම පුපුරන ද්‍රව්‍ය පාර්සලය මුහුදට වීසි කළ බවද ඔහු විසින් ආරක්ෂක අංශවලට කියා සිටියත් එය කිසිසේත්ම විශ්වාස කළ නොහැකි කතාවක් බව යාපනයේ ආරක්ෂක අංශ කියා සිටී.
වෛද්‍යවරයාගේ ප්‍රකාශය මත පොලිස් ත්‍රස්ත මර්දන ඒකකයේ නිලධාරීහු පිරිසක් යාපනයේ අලියාවලෙයි ප්‍රදේශය බලා පැමිණියහ. යාපනයේ අලියාවලෙයි මුහුදු ප්‍රදේශයට පැමිණි නමුත් ඔවුන්ට මුහුද යට කිමිදී එම පුපුරන ද්‍රව්‍ය සොයාගැනීම අසීරු නිසා නාවික හමුදා නිලධාරීන්ගේ සහාය මත එම පුපුරන ද්‍රව්‍ය ගොඩ ගැනීමට හැකි විණි.
කිලිනොච්චිය පලෙයි ප්‍රදේශයේදී අත්අඩංගුවට ගනු ලැබු වෛද්‍යවරයා දැනට සිටින්නේ යාපනය පොලීසියේ ත්‍රස්ත මර්දන ඒකකය යටතේය. සිවරූබන් වෛද්‍යවරයාගේ වැමෑරීම මත ඔහුගේ ගම් ප්‍රදේශය වූ පලෙයි ප්‍රදේශයෙන් පොලිස් ත්‍රස්ත මර්දන ඒකකයට තවත් අවි ආයුධ සහ පුපුරන ද්‍රව්‍ය තොගයක් සොයාගැනීමට හැකි වී තිබේ.
පලෙයි කරන්ඩිය ප්‍රදේශයේ පොල් ඉඩමක පොල් අතු ගොඩක් යට සඟවා තිබු එම පුපුරන ද්‍රව්‍ය අතර AK 47 වර්ගයේ ගිනි අවියක්, මැගසින් 2ක්, සජීවි පතරොම් 120ක්, ජීව අත්බෝම්බ 11ක්, PE 10 බවට සැක කරන පුපුරන ද්‍රව්‍ය කිලෝ 10ක් තිබූ බව යාපනය පොලීසියේ ත්‍රස්ත මර්දන ඒකකයේ නිලධාරීහු කියයි. එම ආයුද තිබී ඇත්තේ පොලිතින් උරවල බහා ආරක්ෂාකාරිවය. මෙයට පෙර එල්.ටී.ටී.ඊ සැකකරුවන්ගෙන් සොයාගන්නා ආයුධවල නොදකින ලක්ෂණ එම ආයුධවල තිබී ඇත. එමෙන්ම AK 47 ගිනි අවියේ අනුක්‍රමික අංකය මකා තිබීමය. අත්බෝම්බ 11 ඛාණ්ඩ අංක මකා දමා තිබීමය. එය මේ වන විට සැකයට තුඩු දෙන කාරණයක් වී තිබේ.
එසේම දුරදක්නයක් ඇතුළු තවත් දේපළ කිහිපයක් සොයාගැනීමට ත්‍රස්ත විමර්ශන කොට්ඨාසයේ නිලධාරීන්ට හැකි වී ඇත.
වෛද්‍යවරයෙකු වශයෙන් සේවය කළ සින්නයියා සිවරූබන්ට මේ අවි ආයුධ හා පුපුරන ද්‍රව්‍ය අවශ්‍ය වූයේ මන්දැයි යන ප්‍රශ්නය සම්බන්ධයෙන් විවිධ කතා පැතිර යමින් පවතී.
මේ කතා වස්තු අතර මුලින්ම කියවෙන්නේ මියගිය එල්.ටී.ටී.ඊ.සංවිධානයට පණ පොවන්නට ඔහු කටයුතු සූදානම් කරමින් සිටි බවයි. නමුත් මේ ස්වල්ප ප්‍රමාණයකින් අවි ආයුධ හා පුපුරන ද්‍රව්‍ය තැන් තැන්වල සඟවා තබා ඔහුට යළි එල්.ටී.ටී.ඊ. සංවිධානය වැනි සංවිධානයක් ගොඩ නැඟිය හැකිද යන්න විශාල ප්‍රශ්නයකි.
නමුත් එල්.ටී.ටී.ඊ. සංවිධානය දොරේ අප්පා වැන්නවුන් ඝාතනය කරන විට ඔවුන් සතුව තුබුණේ මිලිමීටර් නවය වර්ගයේ පිස්තෝල හා බෝර දොළහ වර්ගයේ තනි කානුවේ තුවක්කු නිසා සිවරූබන් වෛද්‍යවරයාට එසේ කිරීමට බැරි කමක් නැතැයි යන තර්කයටද පැමිණිය හැකිය.
සින්නයියා ශිවරූබන් වෛද්‍යවරයා පිළිබඳ ආරක්ෂක අංශ සොයාගෙන ඇති කරුණුවලට අනුව ඔහු එල්.ටී.ටී.ඊ.සංවිධානයට දරදිය ඇද ඇත්තේ ඔහු වෛද්‍ය උපාධිය ලබාගැනීමටත් පෙර සිටය.
එකල එල්.ටී.ටී.ඊ. සංවිධානයේ ප්‍රබල චරිතයක් වූ කරුණා අම්මාන්ගේ දැඩි හිතවතෙකු වූ මේ පුංචි කොලු ගැටයා එල්.ටී.ටී.ඊ යටත් උදව් කරමින් ඉගෙනගනිමින් කෙසේ හෝ වෛද්‍යවරයෙකු වී තිබේ. වෛද්‍ය වෘත්තියට පත් වීමෙන් පසුව ඔහුගේ සේවය උතුරු පළාතට යොමු වී ඇති අතර මේ කාලයේදී ඔහු එල්.ටී.ටී.ඊ.සංවිධානය සමඟ සමීපව සිටිමින් ඔවුන්ගේ අවශ්‍යතා ඉටු කොට තිබේ.
ඒ අනුව බලන විට ඔහුට යළි එල්.ටී.ටී.ඊ. සංවිධානයට පණ දෙන්නට වුවමනාවක් නොතිබුණේ යැයි කීමටද නොහැකිය.
ශිවරූබන් වෛද්‍යවරයාගෙන් කළ ප්‍රශ්න කිරීම් වලදී ඔහු පවසා ඇත්තේ විදේශීය රටවල සිටින පිරිස්, කිලිනොච්චියේ හා මුලතිව්හි සිටින එල්.ටී.ටී.ඊ හිටපු සාමාජික සාමාජිකාවන් සම්බන්ධ කොට දෙන ලෙසට ඔහුගෙන් ඉල්ලීමක් කළ බවයි. මුලින් තමන් ඊට අකැමැති වුවත් මරණීය තර්ජන එල්ල වූ නිසා ඔහු ඒ දේ ඉටු කළ බවද ඔහු විසින් ආරක්ෂක අංශවලට පවසා තිබේ. නමුත් එයද යාපනයේ ත්‍රස්ත මර්දන ඒකකය ප්‍රතික්ෂේප කරයි.
මේ වෛද්‍යවරයා විදේශීය රටවල සිටින දෙමළ ඩයස්පෝරාව සහ කිලිනොච්චි මුලතිව් පළාත්වල සිටින එල්.ටී.ටී.ඊ. සාමාජික සාමාජිකාවන් අතර දම්වැලක් සකසා දී තිබන බව සඳහන්ය.
මේ අතර වෛද්‍යවරයෙකු වශයෙන් ඔහු උතුරේ විශාල පිරිසක් විදේශ ගත වීම සදහා ලිපි නිකුත් කොට තිබේ. ඔවුන් රෝගීන් වශයෙන් හඳුන්වා ඊට ප්‍රතිකාර ලබාගැනීම සඳහා විදෙස් රටවලට යෑමට වීසා සකස් කොට දී ඇත්තේද ශිවරූබන් වෛද්‍යවරයා විසිනි.
හොඳ හොඳ සෙල්ලම් එළිවෙන ජාමයේ කීවා සේ සිවරූබන් වෛද්‍යවරයාගේ අලුත්ම හෙළිදරව්ව වී ඇත්තේ පිරිසක් කරුණා අම්මාන්ව ඝාතනය කිරීමට සූදානම් කොට ඇතැයි කියන කතාවයි. මේ වෛද්‍යවරයාට එල්.ටී.ටී.ඊ.සංවිධානය සමඟ සබඳකම් පැවැත්වීමට උදව් උපකාර කළේ කරුණා අම්මාන් වූවත් ඔහු එල්.ටී.ටී.ඊ.සංවිධානය පාවා දුන් නිසා ඔහු ඝාතනය කිරීමට විදේශ රටවල සිටින දෙමළ සංවිධාන හා බලවේග තුවක්කුකරුවන් යොදවා සිටින බව ඔහු ප්‍රකාශ කොට තිබේ. 
එපමණක් නොව දෙමළ ජාතිය වනසාලීමට කටයුතු කළ හා සහාය ලබාදුන් ඩග්ලස් දේවානන්ද මහතා ඝාතනය කිරීමටද තුවක්කු කරුවන් යොදවා ඇති බවට ශිවරූබන් වෛද්‍යවරයා හෙළිදරව්වක් කොට ඇත. ඒ කාරණා තවමත් ඇත්තේ විමර්ශන මට්ටමේය.
වෛද්‍යවරයාගේ ජාලයට සම්බන්ධ හය දෙනෙකුම මේ වන විට සිටින්නේ ත්‍රස්ත විමර්ශන කොට්ඨාස අත්අඩංගුවේය. ඔවුන්ගෙන් සිවු දෙනෙක් හිටපු එල්.ටී.ටී.ඊ සාමාජිකයෝය. ඒ අයගෙන් දෙදෙනෙකු හමුදා ඔත්තුකරුවන් ලෙස කටයුතු කරමින් සිටින අය බවද හඳුනාගෙන තිබේ. ත්‍රස්ත විමර්ශන කොට්ඨාසය පවසන්නේ විවෘත මනසකින් පුළුල්ව මේ පරීක්ෂණය සිදු කළ යුතු බවය. ඒ සඳහා අත්අඩංගුවට ගත් සිවරූබන් ඇතුළු සැකකරුවන්ගේ ජංගම දුරකතන පවා පුළුල් විශ්ලේෂණයකට බඳුන් කර තිබේ.
ශිවරූබන්ගේ තොරතුරු මත සොයාගත් ආයුධ පවා ලැබී ඇති ආකාරය ගැටලු සහගත බව විමර්ශන අංශ පවසයි.
ඒ සියලු දේ සමඟ ගළපා බලන විට සිවරූබන් වෛද්‍යවරයා රෝගීන්ට ප්‍රතිකාර කොට ඔවුන් සුවපත් කිරීමකට වඩා සිදු කොට ඇත්තේ යළිත් වරක් ඊළමක් මේ රටේ බිහි කිරීමට දර දිය ඇදීමක් පමණකි. ඉන් ඔහුද යම් රජකමක් බලාපොරොත්තු වන්නට ඇත.
