කළුතර බෝම්බුවල ශ්‍රී සුබෝධිරාජාරාම මූලස්ථාන මහා විහාරය ඇතුළු විහාර ගණයේ අධිපති රත්නපුර, කළුතර දෙපළාතේ ප්‍රධාන සංඝ නායක පූජ්‍යපාද හල්වතුරේ අස්සජි නා හිමියන්ගේ පැවිදි දිවියට අඩ සිය වසක් සපිරී ඇත.
අමරපුර අරියවංශ සද්ධම්ම යුක්තික මහා නිකායේ කළුතර පළාත් සංඝසභාවේ සභාපති පූජ්‍යපාද හල්වතුරේ අස්සජි නා හිමියන්ගේ පැවිදි දිවියට පුරා වසර පනහක් පිරීම නිමිත්තෙන් උන්වහන්සේගේ ආගමික හා සාමාජික අගයමින් උපහාර පිදීමේ උත්සවයක් අද (01) සවස 2.30 ට බෝම්බුවල ශ්‍රී සුබෝධිරාජාරාම මූලස්ථාන මහා විහාරයේදී පැවැත්වේ.
දොඩන්ගොඩ ශාසනාරක්‍ෂක මණ්ඩලයේ ලේකඛාධිකාරී ධූරය ද දරමින් සුවිශාල ශාසනික මෙහෙවරක නිරතව සිටින උන් වහන්සේ අපවත් වී වදාළ ගිරිකොළ ධම්මාලංකාර හිමියන්ගේ ශිෂ්‍යයෙකු ලෙස සිට 1984 වර්ෂයේ දී බෝම්බුවල ශ්‍රී සුබෝධිරාජාරාම මහා විහාරස්ථානයේ විහාරාධිපති ධූරයට පත් වූහ. අභාවයට ගොස් තිබූ ශ්‍රී දස්සනසාර ධර්මායනත පිරිවෙන නැවත ආරම්භ කිරීමට පුරෝගාමී වූයේ උන්වහන්සේය.
තම විහාරස්ථානයේ සියලු ගොඩනැගිලි නවීකරණය කරමින් භික්‍ෂූන් වහන්සේ උදෙසා දාන ශාලා සහිත තෙමහල් සංඝාවාස ගොඩනැගිල්ලක් ද, දෙමහල් දහම්පාසල් ගොඩනැගිල්ලක් ඉදි කිරීමට ද අස්සජි නා හිමියන් විසින් කටයුතු කරන ලදී. තායිලන්තය, තායිවානය, කැනඩාව, සිංගප්පූරුව, ඕස්ට්‍රේලියාව, බුරුමය, පාකිස්ථානය සහ නේපාලය ඇතුළු රටවල් ගණනාවක විශේෂ ධර්මප්‍රචාර කටයුතුවල ඒ හිමියන් නිරතව ඇත.
1984 සිට මහනුවර ශ්‍රී දළදා මාලිගාවේ දළදා මාලිගාවේ මුල්තැන් භාරගෙන එය මේ දක්වා පවත්වන අතර දිඹුලාගල ආරණ්‍යසේනාසනයේ භික්‍ෂූන් වහන්සේලා සඳහා වාර්ෂිකව දන් පිරි නැමීමේ වැඩ පිළිවෙළක් ද ක්‍රියාවට නංවා ඇත.
ශ්‍රී ලංකා තායිවාන මෛත්‍රී බුද්ධ සංවිධානයේ සහකාර අධ්‍යක්‍ෂධූරය ද ශ්‍රී සුබෝධි සහනසේවා පදනමේ සභාපති ධූරය ද, තවත් සමිති සමාගම් කිහිපයක නිළතල දරමින් ද උන්වහවන්සේ රටටත් ජනතාවටත් විශාල සේවාවක් සිදු කරන උගත් සිල්වත් සංඝ පීතෘ වරයෙකි.
සාමවිනිසුරු සැම්සන් ප්‍රේමසිරි
