දිගු කලක් තිස්සේ හදවත් සැත්කම් හා අවයව බද්ධ ප්‍රමුඛ විශිෂ්ට සෞඛ්‍ය සේවා රැසක් ඉතා ඉහළ මට්ටමින් සපයමින් සිටින මහනුවර ශික්ෂණ රෝහල 30 වැනිදා ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ජාතික රෝහලක් බවට නිල වශයෙන් නම් කෙරේ.
අප කාටත් හදිසි අනතුරුවලට, ලෙඩ-දුක්වලට මුහුණ පෑමට සිදු වන්නේ අනපේක්ෂිතවය. එවැනි අවස්ථාවක ළඟම රෝහලට ඇතුළත් කෙරුණද රෝගියාගේ ප්‍රතිකාර අවශ්‍යතාව මත ඔහු හෝ ඇය ඊළඟට යොමු කෙරෙනුයේ අවශ්‍ය පහසුකම් ඇති රෝහලකටය. එහිදී ඒ රෝහල නිවෙසේ සිට කරදරයකින් තොරව යා ගත හැකි දුරකින් වීම ඒ පුද්ගලයාගේ මෙන්ම ඒ පවුලේ සමාජිකයන්ගේද ආර්ථිකයට හා මානසිකත්වයට තදින්ම බලපාන කරුණකි. මේ අවශ්‍යතාව ජනතාවට සපුරා දීම ජනතාව වෙනුවෙන් රජයකට කළ හැකි ඉහළම සත්කාරයයි. වත්මන් රජය මෙතෙක් කොළඹට පමණක් සීමා වී තිබුණු ඒ පහසුකම රට මැදට උරුම කර දෙමින් මහනුවර ශික්ෂණ රෝහල සියලු පහසුකම්වලින් සපිරි ජාතික රෝහලක් බවට පත් කොට තිබීම රට වැසියන් සියලු දෙනාට සුබ ආරංචියකි.
ඒ අනුව මේ මස 30 (බදාදා) ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් මහනුවර ශික්ෂණ රෝහල් පරිශ්‍රයේ පැවැත්වෙන උත්සව සභාවේදී එය ජාතික රෝහලක් බවට නිල වශයෙන් නම් කිරීමට නියමිතය. මෙහිදී මධ්‍යම ආණ්ඩුවක රෝහලක් වීම, ඇඳන් ප්‍රමාණය 2,500කට වැඩි වීම, ප්‍රාථමික ද්විතීයික හා තෘතීයික සියලු සේවා පවත්වාගෙන යෑම, විශේෂඥතාවෙන් පිරි රෝහලක් වීම, උගන්වන රෝහලක් වීම, භූගෝලීය පිහිටීම, දෛනික පිරිවැය ඇතුළු අවැසි සුදුසුකම් ගණනාවක් ඉහළ මට්ටමෙන් සපුරා තිබීම මේ රෝහල ජාතික රෝහලක් බවට පත් වීමට හේතු වී ඇත. 
160 වසරක කීර්තිමත් යටගියාව
වර්ෂ 1860දී ඉංග්‍රීසි පාලකයන් විසින් වසංගත රෝග සඳහා ප්‍රතිකාර කරන රෝහලක් ලෙස ආරම්භ කරන ලද මහනුවර රෝහල 1946දී මහනුවර ශික්ෂණ රෝහල ලෙස නම් කරනු ලැබුණු අතර, ඉක්බිති පත් වූ මෙරට රජයන් යටතේ අදියරෙන් අදියර දියුණුවට පත්ව රට පුරා ජනතාවට සෑම අංශයකම ඉහළ මට්ටමේ සෞඛ්‍ය සේවාවක් සැලසීමට සමත් විය.
දෛනිකව බාහිර රෝගි ප්‍රතිකාර අංශයෙන් 1,000 ඉක්මවා මහනුවර රෝහලෙන් ප්‍රතිකාර ලබන අතර, සායන මඟින් 3,000ක් පමණ දිනකදී ප්‍රතිකාර ලබති. සේවාව සපයන සේවක මණ්ඩලය 5,800කි. මෙයට වෛද්‍යවරුන් 1,000ක්, විශේෂඥ වෛද්‍යවරු 125ක්, හෙද නිලධාරීන් 2,225ක් ඇතුළු අනෙකුත් කාර්ය මණ්ඩලය ඇතුළත් වේ. අතුරු-වෛද්‍ය සේවා සහ පරිපූරක වෛද්‍ය සේවාද ක්‍රියාත්මක වේ. 2,500ක පමණ රෝගීන් ප්‍රමාණයක් දෛනිකව නේවාසිකව ප්‍රතිකාර ලබති.
මෙරට ප්‍රථම හදවත් බද්ධය සිදු කරනු ලැබුවේ මහනුවර ශික්ෂණ රෝහලෙනි. ඉහළම අවයව බද්ධ ඇතුළුව අක්මා, වකුගඩු ඇතුළු තවත් බද්ධයන් රැසක් සිදු කෙරෙන අතර, ළඟදීම පෙණහලු බද්ධයන් සඳහා පහසුකම් සූදානම් කොට ඇත.
කෝටි 57ක හදිසි ප්‍රතිකාර ඒකකය
පසුගිය වසර කිහිපය තුළ මේ රෝහල වඩාත් විධිමත් සහ කාර්යක්ෂම කිරීමට කටයුතු කර තිබේ. ඒ අනුව රු. මිලියන 570ක වියදමින් හදිසි අනතුරු සහ හදිසි ප්‍රතිකාර ඒකකය නවීකරණය කරන ලද අතර, හදවත් බද්ධ කිරීම සඳහා විශේෂ දැඩි සත්කාර ඒකකයක් රුපියල් මිලියන 10ක වියදමින් ඉදි කර ඇත.
රු. මිලියන 1,200ක් වටිනා මහල් අටකින් යුත් තැලසීමියා ඒකකයේ වැඩ නිම වෙමින් පවතින අතර, ලේ බැංකුවක් සහ අවශ්‍ය සියලු අංගෝපාංග වලින් එය සමන්විතය. මෙහිදී තැලසිමියා දරුවන් සඳහා ඇටමිදුලු බද්ධය සිදු කිරීමටද හැකි වනු ඇත. මහල් 12කින් යුත් පිළිකා වාට්ටු සංකීර්ණයේද වැඩ රු. මිලියන 2,500ක වියදමින් නිම වෙමින් පවතින අතර, මෙහි ශල්‍යාගාර දෙකක්, ඇඳන් 305ක් හා දැඩි සත්කාර ඒකකයක් ස්ථාපිත කෙරේ.
වකුගඩු සහ අවයව බද්ධ කිරීමේ රෝගීන්ගේ පහසුව සඳහා නේවාසිකාගාරයක් ඉදි කර ඇත. බොහෝ දුර බැහැර සිට පැමිණෙන රෝගීන් සඳහා නේවාසික පහසුකම් අවශ්‍ය අවස්ථාවන්හිදී රෝගියා මෙන්ම පවුලේ අයද මෙතෙක් මුහුණ පෑ ගැටලුවට මෙමඟින් විසඳුමක් ලැබෙනු ඇත.
භූමිය තහවුරු කිරීමට පියවර
රෝගී පහසුව සඳහා ගිලන් රථ සේවාවට අමතරව විදුලියෙන් වැඩ කරන රෝගී ප්‍රවාහන රථ 12ක සේවාව සලසා ඇත. රුපියල් මිලියන පන්සියයක වටිනාකමකින් යුතු නවීන විකිරණ යන්ත්‍ර දෙකක් රෝහලට ලැබී ඇත. මෙය මෙතෙක් රෝහලට නොතිබුණු පහසුකමකි. රසායනාගාර සංකීර්ණයක් සඳහා රු. මිලියන 1,200ක් වෙන් කොට ඇති අතර, නුදුරේදීම එහි වැඩකටයුතුද ආරම්භ කිරීමට නියමිතය.
රෝහල් භූමිය අවට පිහිටීම නාය යෑම් අවදානම් සහගත තත්ත්වයක් ඇති බැවින් පාංශු සංරක්ෂණ වැඩපිළිවෙළක්ද රු. මිලියන 1,200ක වියදමින් ක්‍රියාත්මක කෙරේ. අක්කර 58ක භුමි ප්‍රමාණයක් මේ රෝහල සතුව තිබුණද මේ වන විට එයින් සෑහෙන ඉඩම් ප්‍රමාණයක අනවසර පදිංචිකරුවන් පදිංචිව සිටිම බරපතළ ගැටලුවක්ව ඇති අතර, ඒ ඉඩම් අත්පත් කරගැනීමේ කටයුතුද ක්‍රියාත්මකව පවතී.
වකුගඩු ආරක්ෂණ සංගමය, ස්නායු ආරක්ෂණ සංගමය, හෘදයවස්තු ආරක්ෂණ සංගමය ඇතුළු ශුභසාධක සංගම් රැසකින් රෝගීන් වෙනුවෙන් කටයුතු විශාල ප්‍රමාණයක් ක්‍රියාත්මක කෙරේ.
මෙලෙස ශික්ෂණ රෝහලක් ලෙස මේ තරම් වැඩ කොටසක් සිදු කරමින් තිබෙන මහනුවර රෝහල ජාතික රෝහලක් බවට පත් විමේදී මේ සේවාවන් වඩාත් පුළුල් වන බව අමුතුවෙන් කිව යුතු නැත.
මේ කටයුත්ත ජනතාව වෙනුවෙන් ඉටු කර-ලීමට මහත් කැපවීමක් කළ සෞඛ්‍ය අමාත්‍ය රාජිත සේනාරත්න මහතා ප්‍රමුඛ රජයටත්, මේ සඳහා දිරිගැන්වු රෝහල් අධ්‍යක්ෂ සමන් රත්නායක මහතාටත්, පරිපාලන නිලධාරීන්, විශේෂඥ වෛද්‍යවරුන්, වෛද්‍යවරුන් ප්‍රමුඛ සියලු දෙනාටත් ජනාතාවගේ හද පිරි ස්තුතිය හිමි විය යුතුයි.
