කොටි ත්‍රස්තවාදීන්ගේ ක්‍රියාකාරකම්හි අවසානය සිදුවූයේ 2009 වසරේ මැයි මාසයේ 19 වැනිදා නන්දිකඩාල් කලපුව අසලදීය. රට බෙදන්නට වෑයම් කරමින් සිටි ප්‍රභාකරන්ගේ මිය යෑමත් සමඟම එල්ටීටීඊ කොටි ත්‍රස්තවාදයේ අවසානය සනිටුහන් වූයේ ඒකීය ශ්‍රී ලංකාවක් පෙන්නුම් කරමිනි. එහිදී එල්ටීටීඊ ත්‍රස්තවාදීන්ගේ අතකොලු බවට පත් කරගත් දෙමළ ජාතිකයන් පුනරුත්ථාපනය කරන්නට එවකට ජනාධිපතිවරයාව සිටි මහින්ද රාජපක්ෂ මහතා විසින් කටයුතු යොදන ලදී. සිවිල් ආරක්ෂක දෙපාර්තමේන්තුවට ඒ කාර්යය බාර දී තිබූ අතර විශේෂයෙන්ම යාපනය හා විශ්වමඩු සිවිල් ආරක්ෂක බළකා කඳවුරු හරහා එල්ටීටීඊ සංවිධානයේ තරුණයින් දොළොස් දහසක් පමණ පුනරුත්ථාපනය පිණිස කටයුතු යොදන ලදී.
එහෙත් දොළොස් දහසක් එසේ පුනරුත්ථාපනය වුවද ඉතිරි එල්ටීටීඊ ත්‍රස්තවාදීන් වැඩි පිරිසක් පුනරුත්ථාපනය වූයේ නැත. ඔවුන් සමාජයේ සිවිල් ජනතාව අතර සිටි නමුත් ක්‍රියාකාරීත්වය පෙන්නුම් කෙළේ ද නැත. වරක් යාපනය හිටපු විනිසුරු මානික්කවාසගර් ඉලන්ගචේලියන් මහතාට වෙඩි තැබීමට උත්සාහ ගත් හිටපු කොටි ත්‍රස්තවාදියකුගේ වෙඩි පහරට ලක්ව පොලිස් නිලධාරියෙක් මිය ගියේ වසර කිහිපයකට උඩදීය. කොටි ත්‍රස්තවාදීන්ගේ ක්‍රියාකාරීත්වයක් නැතත් තවමත් කොටි සෙවණැලි තිබෙන බව එයින් පැහැදිලිය.
මහා බ්‍රිතාන්‍යයේ දී ශ්‍රී ලංකාවට විරුද්ධව එල්ටීටීඊ ක්‍රියාකාරකම් ප්‍රසිද්ධියේ ප්‍රදර්ශනයට ආ ඩයස්පෝරාව විසින් බ්‍රිතාන්‍යයේ ආරක්ෂක උපදේශක බ්‍රිගේඩියර් ප්‍රියංක ප්‍රනාන්දු ඉදිරිපිටම (අද මේජර් ජනරාල්) දැඩි බලපෑම් එල්ල කෙළේ කොටි ත්‍රස්ත බලය ක්‍රියාකාරී බව පෙන්නුම් කරමිනි. යුරෝපයේ බොහෝ රටවල මේ තත්ත්වය දකින්නට ඇත. දෙමළ ඩයස් පෝරාවට අවශ්‍ය වන්නේ කෙසේ හෝ ශ්‍රී ලංකාවේ දෙමළ කොටි ත්‍රස්තවාදීන්ගේ ක්‍රියාවන් තිබෙන බව පෙන්වා විදේශ රැකවරණ ලබා ගැනීමත් ආධාර ලබා ගැනීමත්ය. එය ඔවුන්ගේ ජීවනෝපායක් බවටද පත්ව තිබේ. විදේශ රටවලින් ආධාර ලබා ගන්නට නම් ශ්‍රී ලංකාව තුළ කොටි ක්‍රියාකාරකම් ඉස්මතු කළ යුතු වේ.
එතෙර අරමුදල්
ශ්‍රී ලංකාවේ කොටි ත්‍රස්තවාදය පෝෂණය කිරීම සඳහා අරමුදල් රැස් කළ හැකි වන්නේ එවිටය. මේ නිසා කොටි ත්‍රස්තවාදීන්ගේ ක්‍රියාකාරකම් යළි ඇති කර ඔවුන් බලාත්මක කිරීමද මේ ඩයස් පෝරාවේ යටි අරමුණකි. ඒ සඳහා මෙරට හිටපු කොටි ත්‍රස්තවාදී සාමාජිකයන් යොදා ගැනීම කාලාන්තරයක් තිස්සේ ඩයස්පෝරාව විසින් කරගෙන එනු ලබන්නකි.
ජූලි මස මහ විරු සැමරුම් පවත්වන අතරම 2018 වසරේ දී යාපනය විශ්වවිද්‍යාලයේ සිංහල සිසුන්ට හිරිහැර කිරීම, නාගදීපයට යන මාර්ගයේ නාම පුවරුවේ සිංහල භාෂාවෙන් සඳහන් වචනවල කළු තීන්ත ආලේප කිරීම එකල එතරම් සැලකුවේ නැතත් ඒවා මේ ක්‍රියාදාමයේ ආරම්භක සිදුවීම්ය. ක්‍රමයෙන් තම බලය ඇති බවත් කොටි ක්‍රියාකාරකම් සිදුවන බවත් පෙන්වා යළිත් යම් කිසි ආන්දෝලනයක් ඇති කර එතෙර සිට මේ ක්‍රියාදාමය මෙහෙයවීම ඩයස් පෝරාවේ අරමුණ වී ඇති බව මේ වන විට පැහැදිලිය. ඒ සඳහා ඔවුන්ට ඕනෑතරම් ඉඩ ප්‍රස්ථාව පසුගිය කාලයේදී ලැබී තිබුණි.
මෙහි උච්චතම අවස්ථාව උදා වූයේ මේ මාසයේ මුල් සතියේය. මහ විරු සැමරුම වෙනුවෙන් බෝම්බ නිෂ්පාදනය කිරීමේ යෙදී සිටි කොටි සාමාජිකයකු බෝම්බය පිපිරීම නිසා බරපතළ තුවාල ලබා රෝහල් ගත කළ පසුව මිය ගියේය. ඒ හරහා මේ ජාලයේ සුලමුල එළිවන්නට විය. බෝම්බ නිපදවන්නට ගොස් මියගියේ හිටපු කොටි සාමාජිකයා නමින් තංගරාජා ගංගේ ආත්මන්ය. වයස අවුරුදු 44කි. පදිංචිය අයියකච්චි ප්‍රදේශයයි. පුනරුත්ථාපනය වූ එල්ටීටීඊ සාමාජිකයෙකු වූ ඔහු සිවිල් ආරක්ෂක බළකාය යටතේ සේවය කරන්නෙකි. මොහුගේ ගෙවත්තේ කෙසෙල් පඳුරක් යට හිස් මාලු ටින් එකක හා කුඩා ප්ලාස්ටික් කෑන් දෙකක බෝම්බ 3 ක් හා කුඩා යකඩ බෝල විශාල ප්‍රමාණයක් ද වොල්ට් 9 බැටරියක් කතුරත් හා කළු කොටි දින සැමරුම වෙනුවෙන් සකසා තිබූ බැනරයක් ද සොයා ගන්නා ලදී.
මේ සිදුවීමෙන් පසුව කිළිනොචචිය ප්‍රදේශයේ නිවාස 600ක් යුද හමුදාව විසින් පරීක්ෂාවට ලක් කරන ලදී. එහෙත් වෙනත් කිසිදු සැක කටයුතු යමක් හමු නොවීය.
මීට පෙර යාපනයේ සිදු වූ පිපිරීම් කිහිපයකටම මොහු සම්බන්ධ වී ඇති බව මේ වන විට සිදු කළ විමර්ශනවලදී හෙළිව තිබේ. ඩයස් පෝරාවේ දැනුම්දීම මත මොහු මේ බෝම්බ නිෂ්පාදනය කර ඇත්තේ මහ විරු සැමරුමේදී මුලතිව්හිදී පුපුරුවා හැරීම පිණිසය. මීට පෙර යාපනය, පේදුරුතුඩුව. වල්ලිපුරම් හි සිදුවූ බෝම්බ පිපිරවීම් 3ටම මොහු සම්බන්ධ වී ඇත. කොටි ත්‍රස්තවාදීන් මේ ලෙසින්ම මන්නාරමේ පොලිස් නිලධාරීන් ඝාතනය කරමින් හා තිරුනෙල්වීදිහිදී හමුදා සාමාජිකයින් ඉලක්ක කර සිදු කළ ඝාතනයන් ඔස්සේ තිස් අවුරුදු යුද්ධය ආරම්භ වූ බව අප අමතක නොකළ යුතුය.
බුද්ධි අංශ සාමාජිකයෙක්
මිය ගිය හිටපු කොටි සාමාජිකයා එල්ටීටීඊ බුද්ධි අංශයේ ක්‍රියාකාරිකයකු බව මේ වන විට හඳුනාගෙන තිබේ. ඔහුගේ බිරිය හා සිවිල් ආරක්ෂක බළකායේ සේවය කළ තවත් හිටපු කොටි සාමාජිකයකුද මේ වන විට අත්අඩංගුව ගෙන ත්‍රස්ත විමර්ශන අංශය මගින් ප්‍රශ්න කරමින් සිටින අතර ඔවුන්ගෙන් මේ සම්බන්ධව වැදගත් තොරතුරු රැසක් හෙළි කර ගැන්මට හැකිව තිබේ.
මීට පෙර පසුගිය මාර්තු මස 14 වැනිදා කිළිනොච්චියේ බෝම්බ පිපිරීමක් සිදු විය. මැයි මස 27 වැනිදා වඩමාරච්චි වල්ලිපුරම් පොලිස් මාර්ගබාධකයක් අසල ද බෝම්බ පිපිරීමක් සිදුවිය එයින් පොලිස් නිලධාරියෙක්ද තුවාල ලැබීය. ඒ සිදුවීම්වලටද මොහුගේ සම්බන්ධකම් ඇති බව දැන් හෙළිව ඇත.
තවත් බෝම්බයක්
පසුගිය සතියේදී පරන්තන්, ධර්මපුරම්, විශ්වමඩු මාර්ගයේ කණ්ඩාවලෙයි ප්‍රදේශයේදී යුද හමුදාව විසින් මෙරට නිෂ්පාදනය කරන ලද විශාල ප්‍රමාණයේ බෝම්බයක් සොයා ගන්නා ලදී. මේ බෝම්බය පිපිරවීමට වයර්ද සම්බන්ධ කර විශාල පොහොර ගෝනියක දමා සඟවා තිබියදී යුද හමුදාව විසින් සොයා ගෙන තිබේ. මේ බෝම්බය ක්ලේමෝ බෝම්බයක් ආකාරයට බැටරියක් උපයෝගි කරගෙන පුපුරවා හැරිය හැක්කකි.
යාපනයේ කයිට්ස්, අනලතිවු දූපතේදී නාවික හමුදා භටයන් දෙදෙනකු පහර කෑමකට ලක් වූයේද පසුගිය දිනවලය. කයිට්ස් පොලිසිය එම පිරිස අත්අඩංගුවට ගෙන අධිකරණයට ඉදිරිපත් කරන ලද අතර පසුව කයිට්ස් පොලිසියේ නිලධාරීන් අනලතිවු දූපතේ පරීක්ෂා කිරීම් කිහිපයක්ද සිදු කරන ලදී. යාපනයේදී දෙමළ ජාතික උප පොලිස් පරීක්‍ෂකවරයකුට තියුණු ආයුධවලින් පහර දී තුවාල සිදු කිරීමත් ඊට පෙර අප පෙර කී ලෙසින් පොලිස් නිලධාරීන් ඉලක්ක කරගෙන බෝම්බ පිපිරවීමත් යන සිද්ධීන් දෙස බලන විට උතුරේ කොටි සෙවණැලි වතුවෙමින් තිබෙන බවට සාධක ඇත.
මෙහි ආසන්නතම සිදුවීම වාර්තා වූයේ පසුගිය 12 වැනිදා යාපනයේ ඉලවාලෙයි ප්‍රදේශයේදීය. එහිදී බෝම්බයක් පිපිරීමෙන් තිදෙනකු තුවාල ලබා රෝහල් ගත කළ අතර ඒ සම්බන්ධයෙන් එම තිදෙනාටම අමතරව තවත් අයෙක්ද අත්අඩංගුවට ගෙන තිබේ. ඔවුන් පවසා ඇත්තේ කැලෑවකින් මේ බෝම්බය හමුවූ බවත් එය පරීක්ෂාවට ලක් කිරීමේදී පුපුරා ගිය බවත්ය. කොටි ත්‍රස්තවාදය 2009 වසරේදී අවසන් වූ නිසා ජීවය සහිත වූ සියලු බෝම්බ මේ වන විට නිශ්ක්‍රීයව පැවතිය යුතුය. මෙතරම් කලක් බෝම්බයක් ජීවී තත්ත්වයෙන් තිබීම අහඹු සිදුවීමකි.
බෝම්බය ගෙදර ගෙන යෑම
කෙසේ හෝ එවැනි දෙයක් හමුවුවහොත් හෝ දුටුවහොත් හෝ යුද හමුදාවට දැනුම් දීම මිස එය ගෙදර ගෙනැවිත් පරීක්ෂාවට යාම සාමාන්‍යයෙන් සිදු නොවන්නකි. තමන් නොදන්නා දෙයක් අතපත ගෑමට නොයෑම යුද්ධය පවතින සමයේ සිටම උතුරේ ජනයාට හොඳට හුරු පුරුදුය. එවන් පසුබිමක කැලෑවක තිබුණු මෙවැන්නක් ගෙනැවිත් අත් හදා බලන්නට යාම සිදු කරයිද යන ගැටලුව මතුව තිබේ.
මේ තත්ත්වය මත උතුරේ සිදුවන පිපුරුම් මෙන්ම අවිආයුධ හමුවීම කොටි ඇඳුම් හමුවීම සාමාන්‍ය සිදුවීම් හෝ 2009ට පෙර සිදුවීම් ලෙස සලකා කිසිසේත්ම බැහැර කළ නොහැකිය. අත්අඩංගුවේ පසුවන මියගිය කොටි සාමාජිකයාගේ මිතුරා පවසා ඇත්තේ එතෙර කොටි ජාලය හරහා මුදල් ලැබෙන බවයි. එසේ නම් මේ තත්ත්වය තව කොමපණ කලක් තිබෙන්නට ඉඩ හරිමුද යන්න ගැටලුවකි.
උතුරේ පොලිසිය අවදියෙන් සිටියත් මේ වන විට යුද හමුදාව කඳවුරුවලට සීමා වීමත් පොලිසියට විශාල කටයුතු රැසක් ඇති බැවින් ඒ සඳහා අවධානය වැඩි වශයෙන් යොමු කරන්නට හැකියාව නොමැති වීමත් නිසා මේ ක්‍රියාකාරකම් එළියට පැමිණෙමින් තිබේ.
යම් හෙයකින් මුලතිව්හි අදාළ බෝම්බ පිපිරවුණි නම් එතැන ගැටලු ඇති වන්නේ කොටි ත්‍රස්තවාදය ක්‍රියාකාරී වීම ගැන පමණක් නොවේ. එය ඇතැම්විට ශ්‍රී ලංකා රජයට කළු පැල්ලමක් එක්වන්නටද ඉඩ තිබුණි. තම මියගිය දරුවන් සිහිකරන්නට පැමිණි දෙමළ ජාතික මවුපියන්ට රජයෙන් බෝම්බයක් පුපුරුවා දැමුවා යන පැල්ලම එල්ල වන්නට හොඳටම ඉඩ තිබුණි. ඒ පැල්ලම වැළකී ගියේ සමස්ත ශ්‍රී ලාංකිකයන්ගේම වාසනාවටය. ප්‍රංශය, කැනඩාව, ඉතාලිය ඇතුළු රටවල් රැසකම මේ වන විට කොටි ත්‍රස්තවාදීන්ගේ ක්‍රියාකාරකම් එළිපිටම සිදු වේ. මේ තත්ත්වය වළක්වා ලීම අපට කළ නොහැකි වුවත් ශ්‍රී ලංකාව තුළ සිදු කෙරෙන ත්‍රස්ත ක්‍රියාකාකරම් වළක්වාලීමට වහාම පියවර ගත යුතුය. නියපොත්තෙන් කඩා ගන්නට තිබෙන දේ පොරොවෙන් කැපිය යුතු තත්ත්වයට අප පත් නොකළ යුතුය. කොටි ත්‍රස්තයන්ගේ ක්‍රියාකාරකම් අලුයට ගිනි පුපුරු මෙන් තිබෙන බවත් ඒවා මෙහෙයවන්නේ එතෙර ඩයස් පෝරාව වන හෙයින් ඒ ගැන වහාම අවාධානය යොමු කළ යුතුය.
