මහනුවර ත්‍රිත්ව විදුහලේ ගණිත අංශයෙන් උසස් පෙළ හදාරන දාහත් හැවිරිදි වෙනුර විජේසේකර සිසුවා ද එවැනි අපූරු නව නිර්මාණයක් බිහිකර තිබේ. එය ජනපති ගෝඨාභය රාජපක්ෂයන්ගේද ඇගයුමට පසුගියදා ලක්වූයේ වෙනුර සිය නිර්මාණය මහනුවර ශ්‍රී දළදා මාලිගාවේදී ජනපතිවරයාට පෙන්වූ අවස්ථාවේදීය. වෛද්‍යවරියක වන මවගේ අඩිපාරේ නොගොස් වෘත්තියෙන් ඉංජිනේරුවකු වන තම පියා වන නුවන් ශ්‍රී විජේසේකර ගිය මඟ යන්නට සිහින දකින වෙනුර මේ වන විටත් නව නිර්මාණ කිහිපයක හිමිකරුවෙකි. ඔහුගේ නවතම නිර්මාණය වන්නේ රැහැන් රහිත වෙද නලාවකි (Wireless Stethoscope).මාස තුනක පමණ කාලයක් තුළ මෙය නිර්මාණයකර සාර්ථකව අත්හදා බලන්නට ඔහු සමත්ව තිබේ.
‘මගේ අම්මා ජිනාදරී අධිකාරී. වෘත්තියෙන් වෛද්‍යවරියක් වන ඇය මාස තුනකට කලින් හදිසියේ මියගියා. අම්මාගේ වියෝව මටත් තාත්තාටත් මල්ලිට හා නංගිටත් තදින් දැණුනා.කොරෝනා නිසා අපි ගෙදරටම වෙලා ඉද්දි අම්මාගේ වියෝව නිසා ඇතිවුණු පාළුව මකා ගන්න මම නොයෙක් අත්හදා බැලීම් කළා.ඒ වෙලාවේ තමයි මේ වෙද නළාව නිර්මාණය කරන්න හිතුවේ. කොවිඩ්-19 රෝගීන්ට ප්‍රතිකාර කිරීමට ගිය අපේ රටේ වගේම ලෝකයේත් වෛද්‍යවරු රැසක් වෛරසයට ගොදුරු වුණා. මේ සියලු දෙනා රෝගයට ගොදුරු වෙලා තිබුණේ රෝගියා ආසන්නයටම යාම නිසයි. විශේෂයෙන් කොවිඩ්-19 ආසාධිත රෝගියකුගේ පෙනහළු වල ක්‍රියාකාරීත්වය සම්බන්ධව විශේෂ අවධානයක් යොමු කරන්න ඕන. මම නිර්මාණය කළ වෙද නලාව රැහැන් රහිත එකක්. රෝගියාගේ හදවතේ හා පෙනහළු වල ක්‍රියාකාරීත්වය සම්බන්ධ අදහසක් ලබා ගැනීමට වෛද්‍යවරයා රෝගියාගේ පපුව මත තබන කොටස (Drum) සම්පූර්ණ වෙද නළාවෙන් වෙන්කර ගන්න පුළුවන්. ඒක රෝගියාගේ අතට දුන්නම වෛද්‍යවරයාට මීටර 10 ක පමණ දුරක සිට රෝගියාගේ හෘදයේ හා පෙනහළු වල ශබ්දයට ඇහුම්කන් දෙන්න හැකියාව තිබෙනවා. අප අවට විවිධ ප්‍රතිරෝධතා තිබෙන නිසා තමයි මීටර 10 ක දුරක් කියලා මම සඳහන් කළේ. එවැනි ප්‍රතිරෝධ නොමැති නම් කිලෝ මීටරයක් පමණ දුරක සිට වුවත් මෙමඟින් වෛද්‍යවරයෙකුට රෝගියෙකුගේ හෘදයේ හා පෙනහළු වල ශබ්ද වලට ඇහුම්කන් දෙන්න පුළුවන්.මේක සාමාන්‍ය වෙද නළාවකට වඩා බරින් ටිකක් වැඩියි. ඒක තවත් අඩුකරලා සාමාන්‍ය තත්ත්වයට ගෙන ඒමට මේ දිනවල කටයුතු කරනවා.ඉදිරියේදී මේකට පේටන්ට් බලපත්‍රය ලබා ගැනීමට බලාපොරාත්තු වෙනවා. ජනාධිපතිතුමා ඒ සඳහා අවශ්‍ය සහය දෙන බව ප්‍රකාශ කළා...වෙනුර විජේසේකර සිසුවා පවසයි.
 |
| වෙනුර විජේසේකර |
මෙයට ප්‍රථම වෙනුර ඩෙස්ක් ටොප් පරිගණකයක් පහසුවෙන් එහා මෙහා ගෙන යාමට හැකි ලෙස වෙනස්කරමින් නව නිර්මාණයක් කරනු ලැබුවේ පැය 24 ක කාලයක් ශක්තිය රඳා පවතින ආරෝපිත බැටරියක් ඒ හා සම්බන්ධ කරමිනි.
වෙනුරට සිය නිර්මාණය ජනපති ගෝඨාභය රාජපක්ෂ මහතාට පෙන්වීමට අවකාශ සලසා දුන්නේ මල්වතු පාර්ශ්වයේ අනුනායක පූජ්‍ය නියංගොඩ ශ්‍රී විජිතසිරි නාහිමියන්ය. උන්වහන්සේ ඒ සම්බන්ධයෙන් දැක්වූවේ මෙවන් අදහසකි.
‘වෙනුර පුතා දක්ෂ ළමයෙක්. එයා නව නිර්මාණ රැසක් කරලා තියෙනවා. අද අපේ සමාජයට ඕන අලුත් විදිහට හිතන දරුවන්. පවතින අධ්‍යාපන රටාව තුළ දරුවන්ගේ නිර්මාණාත්මක හැකියාවන් වැඩි දියුණු වෙනවද කියන ප්‍රශ්නය අපට තිබෙනවා. කොරෝනා වයිරසය පැතිරයාම නිසා පසුගිය කාලයේ ලෝකයම අර්බුදයකට ලක්වුණා. අපේ රටටත් ඒ බලපෑම තදින් දැණුනා. ගෙවල් වලට හිටපු වෙනුර වගේ දරුවෝ රැසක් නව නිර්මාණ කළා. මේ දරුවන්ගේ දක්ෂතා අපි සමාජයක් විදිහට අගය කරන්න ඕන.එතකොට තමයි ඔවුන් තවත් නිර්මාණය කරන්න පෙලඹෙන්නේ.
වෙනුර මෙන් දක්ෂතා ඇති දරුවන්ගේ නිර්මාණාත්මක හැකියාවන් අගය කරමින් ඔවුන්ගේ නිර්මාණ සියල්ල එකම ස්ථානයකට ගෙන ඒමේ වැඩපිළිවෙළක් මධ්‍යම පළාත් ආණ්ඩුකාර නීතීඥ ලලිත් යූ ගමගේ මහතා පියවර ගෙන තිබේ.
ඡායාරූප-බුද්ධික මහේෂ්
