කොළඹ වැල්ලවත්ත සිට දක්ෂිණ අධිවේග මඟ ඔස්සේ පරිසරයේ සුන්දරත්වය විඳීමට දකුණුලකේ සුන්දර සිරිනැරඹීමට සිංහරාජ වනපෙතින් හමන සිසිල් සුළඟත් නෙළුවේ දූවිලි ඇල්ලේ සුන්දරත්වයත් සිසිලසත් විඳ දරා ගැනීමට වෛද්‍ය නෙමි නාදන් රත්නරාජා සහ තිස්තුන් වියේ පසුවූ පෙම්වතිය වූ වෛද්‍ය ආනන්දරාජී මේනකා සමඟ ඉකුත් 19 වැනි දින නෙළුවට පැමිණියේ ඔවුන්ගේ විවාහ දිවියේ සොඳුරු මතක සටහනට මේ ගමන එක්කිරීමට විය හැකිය.
ඒ සොඳුරු මතක සටහන තනිවීමටත් වෙන්වීමටත් හේතුවක් විය හැකි බව සිහිනයකින්වත් නොපැතූ ඔවුන් නෙළුවේ දූවිලි ඇල්ලේ සැඟවී සිටි මාරයාගේ නිමේෂය ද එළැඹෙමින් තිබූ බව දැන සිටියේ නැත.
වෛද්‍ය නෙමි නාදන් රත්නරාජා 167/22 කෙළින් වීදිය ත්‍රිකුණාමලය යන ලිපිනයේ පදිංචි වන අතර පුත්තලම මහ රෝහලේ හදිසි ප්‍රතිකාර අංශයේ සේවයේ නියුතු වෛද්‍යවරයෙකි. ඔහුගේ පෙම්වතිය මුලතිව් යාපනය ප්‍රදේශයේ පදිංචිකාරියකි.
ඇය රිජ්වේ ආර්යා ළමා රෝහලේ සේවයේ නියුතු වෛද්‍යවරියකි. දෙදෙනාම දමිළ ජාතිකයන් බවත් ඔවුන් දෙදෙනා කොළඹ වැල්ලවත්ත ප්‍රදේශයේ තාවකාලිකව පදිංචිව සිට ඇති අතර වෛද්‍ය නෙමි නාදන් රත්නරාජාගේ නෙළුව ප්‍රදේශයේ මිතුරකු මඟින් දැන හඳුනාගත් නෙළුවේ දූවිලි ඇල්ලේ සුන්දරත්වය විඳ ගැනීමට ඉකුත් 19 වැනි දින කොළඹ වැල්ලවත්ත ප්‍රදේශයේ සිට නෙළුවට පැමිණ ඇත.
 |
| දියට වැටුණු ස්ථානය |
නෙළුව දූවිලි ඇල්ලට පැමිණි ඔවුන් දෙදෙනා ප්‍රවේශපත රැගෙන දූවිලි ඇල්ලේ දවස පුරාම සුන්දරත්වය විඳමින් කාලය ගත කර දූවිලි ඇල්ලේ ඉහළ මාලයේ සිට නැවත පහළට පැමිණීමට සූදානම් වි ඇත. දූවිලි ඇල්ලේ තුන්වන මහලේ ස්වභාවිකව නිර්මාණය වී ඇති ගල්තලාවක පිහිටි තටාකයට බැස දිය නෑමට ඔවුන් දෙදෙනා සූදානම් වීමේදී පෙම්වතා වූ නෙමි නාදන් රත්නරාජා පය ලිස්සා තටාකයට වැටී ගිලීගොස් ඇත.
ඒ සමඟම අල්ලා සිටි දෑත් දෙදෙනාගෙන් ගිලිහී ගොස් ඇති අතර පෙම්වතිය වූ ආනන්ද රාජි මේනකා ඒ අසල වූ ගල්පරය දෙසට පීනාවිත් ඇයගේ දිවිය බේරී ඇත.
දූවිලි ඇල්ලේ මුදුනේ සිට තම පෙම්වතාවූ නෙමි නාදන් වැටුණු බව පවසමින් ඇය විලාප නැගීය. එම විලාපය ගම්වැසියකු වූ ජි.ජි. විජේරත්නට ඇසී ඇත. ඔහු ඒ වෙත දිවගොස් දියේ ගිලී සිටි වෛද්‍ය නෙමි නාදන්ගේ මෘතශරීරය ගොඩ ගෙනවිත් ඇත.
දූවිලි ඇල්ල අවට ප්‍රදේශවාසින්ගේ සහයෝගයෙන් ඔහුගේ මෘතදේහය නෙළුව රෝහලට ගෙන ආ අතර ඒ සම්බන්ධව හදිසි මරණ පරීක්ෂණය නෙළුව පොලිස් ස්ථානාධිපති ප්‍රධාන පොලිස් පරීක්ෂක යු. අරුලානන්දම්ගේ ප්‍රධානත්වයෙන් නෙළුව හදිසි මරණ පරීක්ෂක සිරිපාල ගමගේ මෙහෙයවීමෙන් නෙළුව රෝහලේදී සිදුකෙරිණ. පශ්චාත් මරණ පරීක්ෂණය ගාල්ල කරාපිටිය රෝහලේ අධිකරණ වෛද්‍ය නිලධාරි එච්.ඩි. වීරරත්න විසින් සිදුකරන ලදී.
මෙහිදි සාක්ෂි දුන් රිජ්වේ ළමා රෝහලේ වෛද්‍ය ආනන්ද රාජි මේනකා පැවසුවේ ඉකුත් 19 වැනි දින සවස 3.00ට මමත් මගේ පෙම්වතාවූ වෛද්‍ය නෙමි නාදන් සමඟ නෙළුව සිංහරාජය සහ ඒ ප්‍රදේශයේ පිහිටි සුන්දර දියඇල්ල නෙළුවේ දූවිලි ඇල්ල බැලීමට පැමිණි බවයි.
“අපි දෙදෙනා දවස පුරා දූවිලි ඇල්ලේ අවට සිරි නරඹමින් කාලය ගතකළා. දූවිලි ඇල්ලේ ඉහළ මාලයේ සිට පහළට පැමිණ ගල්තලාවකින් නිර්මාණය වී තිබුණු තටාකයට බැස දිය නෑමට සූදානම් වුණා. අපි දෙදෙනාම අත් අල්ලාගෙන තටාකයට බසිද්දි නෙමි නාදන්ගේ පය ලිස්සා ගියා. මගේ අතින් ඔහුව අතහැරුණා. මා ඒ අසල වූ ගල්පරය අල්ලාගෙන ගොඩට ඇවිත් උදව් ඉල්ලා කෑගෑව්වා. ඒ අසල ඇල්ල නැරඹීමට පැමිණි පිරිස් වටවී සිටියත් ඔහුව බේරා ගන්න බැරි වුණා. ගමේ කෙනේ ඇවිත් තමයි නෙමි නාදන්ව ගොඩට ගත්තේ. පසුව මා ඔහුට ප්‍රථමාධාර කෘත්‍රිම ස්වසනය ලබා දුන්නද ඵලක් වූයේ නැහැ. පසුව ඔහුව අපි පැමිණි මෝටර් රථයෙන් නෙළුව රෝහලට ගෙන ගියා. ඒ වනවිටත් ඔහු මියගොස් තිබුණා.”
නෙළුව දූවිලි ඇල්ල අසල ප්‍රවේශ පත්‍ර නිකුත් කරන නෙළුව බටහිර බටුවංගල පදිංචි එම්.අයි.ජී. ප්‍රියංකා පැවසුවේ නෙළුව දූවිල ඇල්ල නැරඹීමට පැමිණෙන පිරිසට නිතරම අවවාද උපදෙස් දෙන බවයි.
දූවිලි ඇල්ල ඉහළ පිහිටි ස්ථානවල දියනෑමට යන්න එපා කියලා අපි කියනවා. නමුත් පැමිණෙන තරුණ තරුණියන් ඒවා පිළිපදින්නේ නැහැ. පැමිණෙන තරුණ තරුණියන් දියනෑමට ඉදිකර ඇති නාන තටාක භාවිත කරන්නේ නැහැ. ඔවුන් කැමැති ගල්තලා මඟින් ගලා හැලෙන අඳුරු ස්ථානවල දිය දහරාවන් වැටෙන ස්ථානවල නාන්න අපි ප්‍රවේශ පත්‍රය නිකුත් කරනවා පමණයි. පැමිණෙන පිරිස් විනෝද වෙලා යනවා. මේ වෛද්‍යවරයා දිය නෑමට ගිය ස්ථානය අනතුරුදායක අවදානම් ස්ථානයක්. මෙම ස්ථානය අඩි 15ක් පමණ ගැඹුරුයි. ජලය කළු පැහැය නිසා ජලයේ පතුල පෙනෙන්නේ නැහැ. මෙහි ගැඹුරු ස්ථානවල ගල්කුහර තිබෙනවා. මෙම ස්ථානවල දියනෑමට ගොස් දැනට තුන්දෙනෙක් පමණ මියගොස් තිබෙනවා.
නෙමි නාදන් රත්නරාජා වෛද්‍යවරයාගේ මෘතශරීරය ගොඩට ගත් නෙළුව කොස්මුල්ල පදිංචි ගිගුරුව ගමගේ විජේරත්න අදහස් දක්වමින් මෙසේ පැවැසීය.
“සිද්ධිය සිදුවූ දින සවස 3.00ට පමණ දූවිලි ඇල්ල මුදුනේ කාන්තාවක් විලාප නඟන හඬක් ඇසුණා. මම ඒ වෙත දිවගොස් බැලීමේදි වෛද්‍යවරිය අඬමින් සිටිනවා. මම ඇසුවා මොකද කියලා.
ඇය කීවා මා සමඟ පැමිණි අයියා මේ වතුරවළට වැටුණා කියලා. පසුව ජලයේ පතුල බලනවිට කකුල් දෙකක් පමණක් පෙනෙන්න තිබුණා. මෙම ස්ථානය අඩි 15ක් පමණ ගැඹුරු ස්ථානයක්. ජල තටාකයේ පතුලටම පිහිනා ගොස් ඔහුගේ සිරුර ගොඩට රැගෙන ආවා.”
දෙස් විදෙස් සංචාරකයන් මෙන්ම පාසල් සිසුන් ඇතුළුව දහස් ගණනක් නැරඹීමට නෙළුවේ දූවිලි ඇල්ලට පැමිණෙන අතර ඒ සඳහා ඔවුනට සපයා ඇති පහසුකම් මෙන්ම ආරක්ෂාව සම්බන්ධව ගෙන ඇති පියවර ගැන සැහීමට පත්විය නොහැකි බවද කිව යුතුව ඇත.
ඉහළ මාලයේ දියනාන ස්ථානවල දියට බැසීමට නොහැකි වන පරිදි ආරක්ෂක වැටවල් ඉදිකිරීම හෝ ඉහළ සිට පහළ දිය ඇලි නරඹන ස්ථානවල දැල් ආවරණයක් යෙදීම, සංචාරක මඟ පෙන්වන සගයකු පත් කිරීම, දිය ඇල්ල නරඹන අයට ආරක්ෂිත ජැකට් ලබාදීම වැනි ක්‍රමවේදයන් අනුගමනය කරන්නේ නම් රජයට මුදලක් ගෙවා නරඹන මෙවැනි සෞන්දර්යාත්මක ස්ථාන නැරඹීමට පැමිණ සිය ජීවිතවලින් වන්දි ගෙවීම අවම කළ හැකි බවද පෙන්වා දෙමු. දූවිලි ඇල්ල දකුණු පළාත් සංචාරක අමාත්‍යාංශය යටතේ නෙළුව ප්‍රාදේශීය සභාව මඟින් පාලනය කරන අතර, මෙහි පැමිණෙන සංචාරකයන්ගේ ජීවිත ආරක්ෂා කිරීමට නෙළුව ප්‍රාදේශීය සභාව, නෙළුව ප්‍රාදේශීය ලේකම් කාර්යාලය, නෙළුව ඉඩම් මහ කාර්යාලය සහ ආපදා කළමනාකරණ අමාත්‍යාංශය යන ආයතනවල වගකිවයුත්තන්ගේ අවධානය යොමුවිය යුතුව ඇත.
