⬤ පවිත්‍රා දේවි වන්නිආරච්චි
පවිත්‍රා දේවි වන්නිආරච්චි ශ්‍රී ලංකා පොදු ජන පෙරමුණේ රත්නපුර දිස්ත්‍රික්කය නියෝජනය කරමින් මැතිවරණයට ඉදිරිපත්ව මනාප 200,977 ක් ලබා ගනිමින් මනාප අතරින් පළමු ස්ථානයට පත්ව සුවිශේෂි ජයග්‍රහණයක් වාර්තා කළාය. 1964 වසරේ නොවැම්බර් 10 වැනි දින උපන් පවිත්‍රාදේවි වන්නි ආරච්චිගේ පියා ධර්මදාස වන්නි ආරච්චි හා මව පොඩි මැණිකේ වීරසේකර වන්නි ආරච්චිය. ප්‍රාථමික අධ්‍යාපනය පැල්මඩුල්ල මහින්ද විදුහලෙන්ද, ද්විතියික අධ්‍යාපනය ගන්කන්ද මධ්‍යම විදුහලෙන් හා කොළඹ අනුලා විදුහලෙන්ද, නීති අධ්‍යාපනය ශ්‍රී ලංකා නීති විදුහලෙන් ලබා ගත් අතර ඇය 1990 දි ශ්‍රේෂ්ඨාධිකරණ නිතීඥවරියක වශයෙන් දිවුරුම් දුන්නාය. 1994 වසරේදි ඇය රත්නපුර දිස්ත්‍රික්කය නියෝජනය කරමින් පාර්ලිමේන්තුවට තේරි පත්වූ අතර අවස්ථා කිහිපයකදීම සෞඛ්‍ය, මහාමාර්ග, සමාජ සේවා, දේශීය වෛද්‍ය ඇතුළු ඇමැති තනතුරු රැසක් හෙබවුවාය. 2019 වසරේදි ඇය ඇමැති තනතුර දරද්දී ඉතා දක්ෂ ලෙස කොවිඩ් වසංගත පාලනයට නායකත්වය ලබා දුන්නාය. ඇයගේ ගමන් මඟට නිතරම ශක්තියක් ගෙන දෙන්නේ සිය ස්වාමි පුරුෂයා වන කංචන ජයරත්න ය. මේ වන විට ඇය නව රජයේ සෞඛ්‍ය අමාත්‍යවරියයි.
⬤ තලතා අතුකෝරාල
ලංකාවේ අධිකරණ ඇමැති ධූරය දැරු එකම කාන්තාව වන තලතා අතුකෝරාල මැතිවරණ සටනට එකතු වුයේ රත්නපුර දිස්ත්‍රික්කයෙනි. සමගි ජන බලවේගයෙන් මැතිවරණ සටනට පිවිසි ඇය මෙවර මනාප 45,105 ක් ලබා ගනිමින් පක්ෂයේ මනාප අතර 3 වන ස්ථානයට පත්විය. ලිලියන් අතුකෝරල හා පියා ඊ. සි.ජේ අතුකෝරාල යන දෙපළගේ දියණිය වන ඇය සාලිය ජයසිංහගේ බිරිඳය. කොළඹ මියුසියස් විදුහලෙන්ද අනතුරුව රත්නපුර ෆර්ගසන් විදුලෙන් හා අනතුරුව කොළඹ බිෂොප් විදුහලෙන් අධ්‍යාපනය ලද ඇය නීති විදුහලෙන් නීති උපාධිය ලබා ගත්තාය. ඇය එක්සත් ජාතික පක්ෂයේ ක්‍රියාකාරි දේශපාලන නායකයකු වු අභාවප්‍රාප්ත ගාමිණි අතුකෝරාලගේ සහෝදරියක් වන ඇය සිය සහෝදරයාගේ මරණින් අනතුරුව 2004 දි ක්‍රියාකාරී දේශපාලනයට අවතිර්ණ විය.
⬤ සුදර්ශනී ප්‍රනාන්දු පුල්ලේ
1960 ඔක්තෝම්බර් 29 වැනිදා උපත ලද සුදර්ශනී ප්‍රනාන්දු පුල්ලේ ක්‍රියාකාරී දේශපාලනයට පිවිසියේ හිටපු ඇමැති හා ක්‍රියාකාරි දේශපාලඥයකු වූ සිය ස්වාමිය වූ ජෙයරාජ් ප්‍රනාන්දු පුල්ලේගේ අභාවයත් සමඟය. මෙවර ඇය ගම්පහ දිස්ත්‍රික්කයෙන් තරග වැද මනාප 89,329 ක් ලබා ගනිමින් පොදු ජන පෙරමුණෙන් 7 වන ස්ථානයට පත්විය. ඇය ගුරුවරුන් වන අල්පෝන්සු හා මහේෂ්වරී ප්‍රනාන්දු පුල්ලේ දෙපොළගේ දියණියකි. මිගමුව ආවේ මරියා කන්‍යාරාමයේ හා කොළඹ වෛද්‍ය පීඨයෙන් අධ්‍යාපනය ලද ඇය විශේෂඥ වෛද්‍යවරියකි. සමෘද්ධි හා බානුකගේ මවයි. මේ වන විට ඇය නව රජයේ බන්ධනාගාර ප්‍රතිසංස්කරණ හා සිරකරුවන් ප්‍රතිෂ්ඨාපනය රාජ්‍ය ඇමැතිවරියයි.
⬤ රෝහිණි කුමාරි විජේරත්න
1971දෙසැම්බර් මස 12 වැනිදා උපත ලත් රෝහිණි කුමාරි විජේරත්න මෙවර පාර්ලිමේන්තුවට තේරී පත්වුයේ සමගි ජන බලවේගය නියෝජනය කරමින් මාතලේ දිස්ත්‍රීක්කයෙනි. මෙවර ඇය මනාප 27,587 ක් ලබා ගනිමින් පක්ෂයේ එකම ජයග්‍රාහි මනාපය ලෙස සටහන් කළාය. දේශපාලන පරිසරයක උපන් ඇය හිටපු කෘෂිකර්ම ඇමැති දිවංගත ජේ. පි. විජේරත්න බණ්ඩාගේ සිවුවැනි දියණියයි. 1994 වසරේදි ඇය පාර්ලිමේන්තු මන්ත්‍රීවරයෙකු හා මාධ්‍ය වේදියකු වන සංජීව කවිරත්න සමඟ විවාහ වූ අතර සිය ස්වාමියාගේ මැතිවරණ ව්‍යාපාරයේ කාන්තා පෙරමුණ සංවිධානය කරමින් විශාල සේවයක් කළාය. සිය ස්වාමියා වයස 44 දි හදිසියේ මියයාමෙන් අනතුරුව ඇය 2015 වසරේ අගෝස්තු මස මහා මැතිවරණයට මාතලේ දිස්ත්‍රීක්කය නියෝජනය කරමින් තරග කර පාර්ලිමේන්තුවට තේරී පත්විය.
⬤ ගීතා කුමාරසිංහ
පොදු ජන පෙරමුණ නියෝජනය කරමින් මැතිවරණයට ඉදිරිපත් වූ ගිතා කුමාරසිංහ ගාල්ල දිස්ත්‍රික්කයේ මනාප ලැයිස්තුවේ 7 වැනි ස්ථානයට පත්වෙමින් මනාප 63,357 ක් ලබා ගත්තාය. 1955 ජූලි මස 5 වැනිදා උපත ලද ඇය 1975 වසරේ ‘ලස්සන කෙල්ල‘ චිත්‍රපටයෙන් සිනමාවට පිවිසියාය. ගීතාගේ උපන් ගම ඇල්පිටිය ය. උදුලා කුමාරසිංහ හා විජය කුමාරසිංහ යන දෙපොළගේ දියණිය වන ඇයගේ ස්වාමි පුරුෂයා ස්විට්සර්ලන්ත ජාතිකයකු වූ ක්‍රිස් ෆර්ඩිනන්ඩි ය. ඇය එක් දියණියකගේ මවකි. කළුතර ශුද්ධ වූ පවුලේ කන්‍යාරාමය හා ඇල්පිටිය ආනන්ද මධ්‍ය මහා විදුහල් ඇය අධ්‍යාපනය ලැබූ පාසල්ය. 2015 වසරේදි ඇය මනාප 63,955 ලබා ගනිමින් පාර්ලිමේන්තුවට තේරී පත් වුවද 2017 මැයි මස ඇයගේ මන්ත්‍රී ධූරය අහෝසි වූයේ ඇයගේ ද්විත්ව පුරවැසිබාවය පිළිබඳ ගැටලුව මතුවූ නිසාය.
⬤ මංජුලා දිසානායක
මංජුලා දිසානායක මහත්මිය මෙවර පාර්ලිමේන්තුවට තේරී පත් වූයේ පොදු ජන පෙරමුණේ ජාතික ලැයිස්තුවෙනි. 1967.1.27 දින මහව ප්‍රදේශයේ උපන් ඇය නියෝජනය කළේ කුරුණෑගල යාපහුව ආසනයය. ඇයගේ මව මල්ලිකා රාජපක්ෂ වන අතර පියා යාපහුව ආසනයේ ප්‍රබල ශ්‍රී ලංකා නිදහස් පක්ෂ ක්‍රියාකාරිකයකු වන ගුණරත්න වෙද මහතාය. ඇය පාර්ලිමේන්තු මන්ත්‍රි හා හිටපු කැබිනට් ඇමැතිවරයකු වන මියගිය සාලින්ද දිසානායකගේ බිරිඳය. කොළඹ විශ්වවිද්‍යාලයේ අධ්‍යාපනය ලබන ලාවන්‍යා දිසානායක හා පාසල් අධ්‍යාපනය ලබන සහලිදු දිසානායකගේ මෑණියන් වන ඇය රැකියාව වශයෙන් කළේ ගුරු වෘත්තියයි. 2009 හා 2013 වයඹ පළාත් සභාව නියෝජනය කළ එකම කාන්තා මන්ත්‍රීවරිය වන්නේ ඇයයි.
⬤ මුදිතා ප්‍රිශාන්ති ද සොයිසා
පොදු ජන පෙරමුණේ රත්නපුර දිස්ත්‍රික්කයෙන් තරග වැද මනාප 65,923 ක් ලබා ගනිමින් 7 වැනි ස්ථානයට පත් මුදිතා ප්‍රිශාන්ති ද සොයිසා හිටපු අභාවප්ප්‍රාප්ත පාර්ලිමේන්තු මන්ත්‍රී රංජිත් ද සොයිසාගේ බිරිඳය. 1968.10.14 දින උපත ලද ඇය පාසල් අධ්‍යාපනය ලැබූවේ හුණුවල ධර්මරාජ විදුහලෙන්, බණ්ඩාරගම මධ්‍ය මහා විදුහලෙන් හා ගංකන්ද මධ්‍ය මහා විදුහලෙන්ය. ඇයගේ මව හේමලතා ගුරුගේ හා පියා එන්. ජීනදාස දෙපොළය. ඇයට දරුවන් දෙදෙනෙක් වන අතර දියණිය තමෝදා නිහංසා ද සොයිසා හා පුතා රඛිත් පංඛජ ද සොයිසා ය. ඇය දේශපාලනයට පිවිසෙන්නේ 2019 දෙසැම්බර් මස සිය ස්වාමියාගේ අභාවයෙන් අනතුරුව ය. ඇය රත්නපුර පළාත් සභාවේ කර්මාන්ත සංවර්ධන අධිකාරියේ සභාපති ධූරයද ඉසිලීය.
⬤ කෝකිලා හර්ෂණී ගුණවර්ධන
ගම්පහ දිස්ත්‍රීකකයේ පොදු ජන පෙරමුණේ 7 වැනි ස්ථානයට මනාප 77,922 ක් ලබා ගනිමින් කෝකිලා හර්ෂණී ගුණවර්ධන මෙවර පාර්ලිමේන්තුවට තේරි පත් වූවාය. මීරිගම ලෝලුවාගොඩ උපත ලද ඇය සිරිමා හෙටිටිආරච්චිගේ හා පරිපාලන නිලධාරීයකු වූ හෙන්රි ගුණවර්ධන යුවළගේ දියණියයි. කදන්ගමුව මහා විදුහලෙන් හා ගම්පහ සිරිකුරුස විදුහලෙන් අධ්‍යාපනය ලැබූ ඇය විවාහ දිවියට පත්වූයේ ශ්‍රි ලංකන් ගුවන් සේවා සමාගමේ සේවය කරන එරන්දික වින්සන් මහතා සමඟය. ඔවුන්ගේ එකම දියණිය ෂෙනායා පාසල් අධ්‍යාපනය ලබන්නීය. 2004 වසරේදි නාමල් ගුණවර්ධන නම් සිය සොහොයුරාගේ ඝාතනයෙන් අනතුරුව දේශපාලනයට පිවිසෙන්නේ 2007 වසරේදීය. 2009 වසරේදි බස්නාහිර පළාත් සභාවට තේරි පත්වූ ඇය වසර 10 කටයුතු කළාය. 2010 හා 2015 වසර වලදි මැතිවරණයට ඉදිරිපත් වුවද ඇය අඩු මනාප සංඛ්‍යාවකින් පරාජයට පත්වූවාය.
⬤ ඩයනා ගමගේ
සමගි ජන බලවේගයට මෙවර ජාතික ලැයිස්තුවේ මන්ත්‍රි ආසන 7 ක් හිමි වූ අතර එහි එකම කාන්තා නියෝජනය වන්නේ ඩයනා ගමගේය. දෙසැම්බර් මස 18 වැනි දිනක උපත ලද ඇය නුගේගොඩ සමුද්‍රදේවි බාලිකාවෙන් අධ්‍යාපනය ලබා වැඩිදුර අධ්‍යාපන කටයුතු නිම කළේ එංගලන්තයේය. ඇයගේ සැමියා වන්නේ ආචාර්ය සේනක ද සිල්වාය. සිය දරු දෙදෙනා එංගලන්තයේ පදිංචිව සිටින අතර ඇය එක්සත් කාන්තා පෙරමුණේ නිර්මාතෘවරියයි. එසේම ඇය සමඟි ජන බලවේගයේ උප ලේකම්වරියයි. වෘත්තියවේදින්ගේ සංගමය හරහා දේශපාලනයට පිවිසි ඇය විනෝදාංශයක් ලෙස ටෙලි නාට්‍ය 5 කට ආසන්න සංඛ්‍යාවක රඟ පා ඇත.
⬤ සීතා අරඹේපොළ
1974 වසරේ උපන් සීතා අරඹේපොළ මහත්මිය මෙවර පාර්ලිමේන්තුවට තේරි පත්වූයේ පොදු ජන පෙරමුණු ජාතික ලැයිස්තුවෙනි. ඒ වන තෙක් ඇය වියත්මග සංවිධානයේ ප්‍රධාන දේශිකාවක විය. කොළඹ දේවි බාලිකා විදුහලේ හා කිරිබත්ගොඩ විහාර මහා දේවි බාලිකාවේ ආදි සිසුවියක වන ඇය උසස් අධ්‍යාපනය ජයවර්ධනපුර විශ්වවිද්‍යාලයෙන් හා කොළඹ විශ්වවිද්‍යාලයෙන් ලබා ගත්තාය. ඇය විශේෂඥ ශල්‍ය වෛද්‍යවරියකි. ඇයගේ ස්වාමියාද විශේෂඥ නිර්වින්දන වෛද්‍යවරයෙකි. දියණියන් දෙදෙනෙකුගේ මවකි. 2019 දෙසැම්බර් මස සිට 2020 මාර්තු මස දක්වාබස්නාහිර පළාතේ ආණ්ඩුකාරවරිය වූ ඇය එම තනතුරට පත් ප්‍රථම කාන්තාව විය. මේ වන විට ඇය නව රජයේ නිපුනතා සංවර්ධන වෘත්තීය අධ්‍යාපන, පර්යේෂණ හා නව නිපැයුම් රාජ්‍ය අමාත්‍යවරියයි.
⬤ රාජිකා වික්‍රමසිංහ
පොදු ජන පෙරමුණෙන් තරග වැද මනාප 96,763 ක් ලබා ගනිමින් කැගල්ල දිස්ත්‍රික්කයේ 4 ස්ථානයට පත්වූයේ රාජිකා වික්‍රමසිංහයි. ඇය 1976.8.5 වන දින උපත ලද අතර උපන් ගම රත්මලාන විය. ගල්කිස්ස උසස් බාලිකා විදුහලෙන් අධ්‍යාපනය ලැබූ ඇයගේ දෙමවුපියන් වූයේ ප්‍රේමාවති මුතුතන්ත්‍රී හා රත්මලාන බල මණ්ඩලය නියෝජනය කළ සෝමපාල මුතුතන්ත්‍රී දෙපොළය. ඇය විවාහ දිවියට එළඹූයේ සබරගමු පළාත් සභා හිටපු සෞඛ්‍ය, පරිසර හා ධීවර ඇමැතිවරයෙකු වූ ශ්‍රී ලාල් වික්‍රමසිංහ සමඟය. රාජිකා වික්‍රමසිංහට එක් දියණියක් සිටියි. 2015 මහා මැතිවරණයෙන් ඡන්ද 61 කින් පාරජයට පත්වූ ඇය මෙවර විශිෂ්ට ජයග්‍රහණයක් ලැබුවාය. පසුගියදා ඇයට කෑගල්ල දිස්ත්ත්‍රික් සම්බන්ධිකරණ කමිටුවේ සභාපති තනතුර හිමිවිය.
⬤ හරිනි අමරසූරිය
ජාතික ජන බලවේගයේ ජාතික ලැයිස්තු මන්ත්‍රී ධුරය සඳහා පත්වූයේ ආචාර්ය හරිනි අමරසූරිය මහත්මියයි. ඇය මේ වන විට ශ්‍රී ලංකා විවෘත විශ්වවිද්‍යාලයේ සමාජ විද්‍යා අධ්‍යයන අංශයේ ජ්‍යෙෂ්ඨ කථිකාචාර්යවරියක් ලෙස සේවය කරයි. ආචාර්ය හරිනි අමරසූරිය කොළඹ බිෂොප් විදුහලෙන් හා උසස් අධ්‍යාපනය එඩින්බර්ත් විශ්වවිද්‍යාලයෙන් ලබා ගත්තාය. කොළඹ ප්‍රදේශයේ පදිංචි ඇය ජාතික ජන බලවේගයේ පාර්ශ්ව සංවිධානයක් වන ජාතික විද්වත් සංවිධානයේ (NIO) අධ්‍යාපන ප්‍රතිපත්ති සම්පාදක කමිටුවේ සාමාජිකා, විශ්වවිද්‍යාල ආචාර්යවරුන්ගේ සමිති සම්මේලනයේ හිටපු ලේකම්, ආණ්ඩුක්‍රම ව්‍යවස්ථා ප්‍රතිසංස්කරණය පිළිබඳ මහජන අදහස් විමසීමේ කමිටුවේ සාමාජිකාවක්ද වෙයි.
