පසුගිය සති දෙකක පමණ කාලයේදී බස්නාහිර පළාතෙන් අත්අඩංගුවට ගැනුණු මහා පරිමාණ මත් ජාවාරම්කාරයන් 45 දෙනෙකුගේ බැංකු ගිණුම්වල රුපියල් කෝටි 220කට ආසන්න මුදලක් සංසරණය වී ඇති බවට ද පොලිසිය අනාවරණය කරගෙන තිබේ. මෙකී ජාවාරම්කරුවන්ගේ අනාවරණ අනුව මෙරටේ මේ වන විට මත්ද්‍රව්‍ය හිඟයක් පවතින බවටද සැලවේ.
මේ අතරේ පසුගිය 17 වැනිදා අපරාධ පරීක්ෂණ දෙපාර්තමේන්තුව විසින් මෙරට ජාතික පුවත්පතක නිදහස් මාධ්‍යවේදියකු ලෙස කටයුතු කළ අයෙකු අත්අඩංගුවට ගැනිණි. 30 හැවිරිදි එකී මාධ්‍යවේදියා, හම්බන්තොට, මැදමුලන, අඹකොළවැව ප්‍රදේශයේ පදිංචිකරුවෙකි. ඔහු පසුගිය ජූනි 29 වැනිදා හෝමාගම, පිටිපන, පස් මහල් ගොඩනැඟිල්ලක කාමරයක සඟවා තිබියදී මෙරට අපරාධකාරයන් සතුව තිබී සොයා ගත් වැඩිම ගිනිඅවි තොගය ලෙස සැලැකෙන ටී56 ගිනිඅවි 11ක් සහ ටී 81 ගිනිඅවිය ඇතුළු තවත් ගිනිඅවි ප්‍රමාණයක් ප්‍රවාහනය කිරීමට සහාය දී ඇති බවට අපරාධ පරීක්ෂණ දෙපාර්තමේන්තුව කළ සියුම් විමර්ශනවලදී අනාවරණය වී තිබෙන බවකි.
ගිනිඅවි තොගයේ වැඩිදුර විමර්ශන අපරාධ පරීක්ෂණ දෙපාර්තමේන්තු බාරයට පත්වීමත් සමඟ එම ගිනිඅවි පිළිබඳව හෝඩුවාව දී තිබූ නාරාහේන්පිට ප්‍රදේශයේ වෙසෙන අමිල නමැති තොරතුරුකරු අත්අඩංගුවට ගැනුණේ පසුගිය මාසයේයි. ගිනිඅවි තොගය අයත් බවට සැලවූ කොස්ගොඩ තාරක ඇතුළු පාතාල සාමාජිකයන් බොහෝ දෙනෙක් සමඟ සමීප ඇසුරක් පවත්වාගෙන ගොස් ඇති මෙකී තොරතුරුකරු පාතාල සාමාජිකයන්ගේ ඕනෑ එපාකම් වෙනුවෙන් පොලිසියේ ඇතැම් නිලධාරින් පිළිබඳව පසුගිය කාලයේ අසත්‍ය තොරතුරු මාධ්‍ය නාළිකාවලටද ලබා දුන් පුද්ගලයෙක් ලෙසටද සැලැකේ. මොහුගෙන් සිදු කළ ප්‍රශ්න කිරීම්වලදී ගිනි අවි තොගයේ බොහෝ තොරතුරු හෙළිදරව් වී තිබේ.
ඒ අනුව ඔහු අනාවරණය කර ඇත්තෙ කොරෝනා වසංගතය උත්සන්නව පැවැති පසුගිය අප්‍රේල් මාසයේ දඹුල්ල ප්‍රදේශයේ සිට එම ගිනිඅවි තොගය කුලියට ගත් වෑන් රථයකින් හෝමාගම ඇතුළු කොළඹ ප්‍රදේශයේ ස්ථාන කීපයකට ප්‍රවාහනය කර ඇති බවයි.
එදින තමාද ගමන් ගත් එම වෑන් රථයේ ඉදිරිපස 'මීඩියා' යනුවෙන් පුවරුවක්ද ප්‍රදර්ශනය කරමින් රථයේ ඉදිරිපස අසුනේ අත්අඩංගුවට පත් මාධ්‍යවේදියාද ගමන් කළ බවයි. කොරෝනා නිසා ඇඳිරිනීති පනවා තිබූ හෙයින් ස්ථාන කීපයකදී රථය නතර කළත් ඉදිරිපස අසුනේ ගමන් කළ මාධ්‍යවේදියා සිය මාධ්‍යවේදී හැඳුනුම්පත ඉදිරිපත්කොට ඒ සෑම ස්ථානයකදීම රථය කිසිදු පරීක්ෂාවකින් තොරව කොළඹට රැගෙන ඒමට සමත් වූ බවයි.
අනතුරුව එකී තොරතුරුකරු පවසන්නෙ සත්‍යයක්ද යන්න අනාවරණය කරගැනීමට ඒ දිනවල ඔවුන් සැරිසරා තිබූ ප්‍රදේශවල දුරකථන කුලුනු දත්ත ඔස්සෙ සිදු කළ විමර්ශනවලදී තහවුරු වී ඇත්තෙ ඔහු පවසන්නෙ සත්‍යයක් බවයි. ඒ අනුව මාධ්‍යවේදියා හෝමාගම, පිටිපන ප්‍රදේශයට නීති විරෝධි ගිනිඅවි රැගෙන ඒමට සහාය දී ඇති බවටත් එම ගිනිඅවි පාතාල අපරාධකාරයන්ට ලබාදීමට ආධාර අනුබල දීම යන කරුණු මත අපරාධ පරීක්ෂණ දෙපාර්තමේන්තුවේ අත්අඩංගුවට පත්ව රැඳවුම් නියෝග මත රඳවාගෙන මේ වන විට වැඩිදුර විමර්ශන සිදු කරමින් සිටී.
වාර්තා වන ආකාරයට මාධ්‍යවේදී හැඳුනුම්පත අවභාවිත කරමින් එකී මාධ්‍යවේදියා පාතාල අපරාධකාරයන්ට සහාය දී ලක්ෂ ගණනින් මුදල්ද හම්බ කර ඇති බවයි. ඉතිහාසයේ කිසිදු අවස්ථාවක පාතාල අපරාධකාරයන්ට හෝ කිසිදු අපරාධකාරයකුට ආධාර අනුබල නොදුන් මාධ්‍යවේදීන්ගේ මාධ්‍ය වෘත්තියද හෑල්ලුවට ලක්කළ මෙකී මාධ්‍යවේදියා සමස්ත මාධ්‍ය වෘත්තියටම සිදුකර ඇත්තෙ අවමානයක් බව සඳහන් කළ යුතුමය.
මේ අතර මහා පරිමාණ මත්ද්‍රව්‍ය ජාවාරම්කරුවන් සමඟ එක්ව මත්ද්‍රව්‍ය ජාවාරම් කිරීම ඇතුළු චෝදනා රැසක් සම්බන්ධයෙන් අත්අඩංගුවට පත්ව සිටින පොලිස් මත්ද්‍රව්‍ය නාශක කාර්යාංශ නිලධාරින්ගෙන් හෙළි වූ කරුණු මත පොලිස් විශේෂ කාර්ය බළකායේ ඇතැම් නිලධාරින්ද ඊට සම්බන්ධ බවට හෙළි විණි.
එම විමර්ශන සිදුකරන අපරාධ පරීක්ෂණ දෙපාර්තමේන්තුවට පසුගිය 18 වැනිදා පොලිස් විශේෂ කාර්ය බළකායේ සංවිධානාත්මක අපරාධ මර්දන ඒකකයට අනුයුක්තව රාජකාරි කළ උපපොලිස් පරීක්ෂකවරයකු කැඳවා දීර්ඝ ලෙස ප්‍රශ්න කිරීමෙන් පසු එදින රාත්‍රී 10.30ට පමණ ඔහුව අත්අඩංගුවට ගැනිණි.
මත්ද්‍රව්‍ය වැටලීම් වෙනුවෙන් පසුගිය කාලයේ සම්මාන ගරු බුහුමන් බොහෝ සේ ලද එම නිලධාරියාට ලැබුණු තොරතුරක් මත 2016 වසරේදී ඔරුගොඩවත්ත රේගු අංගණයේදී මෙරටින් අත්අඩංගුවට පත් විශාලම කොකේන් මත්ද්‍රව්‍ය තොගයද වන කිලෝග්‍රෑම් 85ද සේම 2018 දෙසැම්බර් මාසයේ බේරුවලදී අත්අඩංගුවට ගැනුණු හෙරොයින් කිලෝග්‍රෑම් 231 සහ ඊට දින කීපයකට පසු දෙහිවලදී අත්අඩංගුවට ගත් එවකට අත්අඩංගුවට පත් වැඩිම හෙරොයින් ප්‍රමාණය වූ කිලෝග්‍රෑම් 278 මෙන්ම පසුගිය වසරේ පෙබරවාරි මාසයේ කොල්ලුපිටියේ මහල් නිවාසයකදී ඇමෙරිකන් ජාතිකයන් දෙදෙනෙකු සමඟ අත්අඩංගුවට ගැනුණු හෙරොයින් කිලෝග්‍රෑම් 95 ද වේ. එලෙස මත්ද්‍රව්‍ය වැටලීම් සිදු කළ මෙකී නිලධාරියාට ලද තොරතුරක් අනුව කොස්ගොඩ තාරකගේ ගිනිඅවි තොගයද අත්අඩංගුවට ගැනුණු බවටද සැල වේ.
මත්ද්‍රව්‍ය මෙරටින් තුරන් කිරීමට තිබෙන ප්‍රධානතම ආයතනවල වගකිවයුතු රාජකාරියන්හි නිරත නිලධාරින් රැසක්ම මත් ජාවාරම්කරුවන්ගේ ග්‍රහණයට නතුව ආයතන මෙන්ම තමන්ගේ ජීවිතද විනාශ කරගනිද්දී රජයේ තවත් වගකිවයුතු ආයතනයක් වන රස පරීක්ෂක දෙපාර්තමේන්තු සේවකයන් දෙදෙනෙක්ද පසුගියදා මත්ද්‍රව්‍ය සමඟ අත්අඩංගුවට පත් වූයේය. ඒ, පසුගිය 16 වැනිදා අලුයම් කාලයේදී හා 17 වැනිදා රාත්‍රියේදීයි.
