අපස්මාර රෝගයට මීරිගම මූලික රෝහලෙන් සායනික ප්‍රතිකාර ලැබූ පාසල් සිසුවකුගේ දෙනෙත් අන්ධ වීම පිළිබඳ පුවතක් පසුගිය දින කීපය පුරා විවිධ මාධ්‍ය මඟින් ප්‍රචාරය වීම හේතුවෙන් අප මීරිගම බලා පිටත්වූයේ එහි තොරතුරු සොයා බැලීමේ අටියෙනි.
මීරිගම හිරිවල වැවහේනවත්තේ අංක 37 දරන නිවසට අප යන විට 16 හැවිරිදි ලෙනින් නිරෝෂන් කුමාර ඇ‍ඳේ ගුලි වී නිසොල්මනේ සිටියේ රැයක් දවාලක් ගැන නිනව් නැතිවය. අනිල් කපිල කුමාර සහ සුජාතා මැණිකේ යන මාපිය යුවළ වික්ෂිප්තව බලා සිටින්නේ සිය එකම පුතුට සිදු වූ විපත ගැන දරා ගත නොහැකි වේදනාවෙනි.
“මගේ පුතා දැන් අවුරුද්දක විතර ඉඳලා අපස්මාරයට මීරිගම රෝහලේ සායනයෙන් මාස් පතා බෙහෙත් බොනවා. කොරෝනා කාලේ ඇඳිරි නීතිය නිසා සායනයට යන්න බැහැනේ. ඒ කාලේ සංවර්ධන නිලධාරි ගෙවල්වලට ඇවිත් ක්ලිනික් පොත් එකතු කරගෙන මීරිගම රෝහලට ගෙනිහින් දුන්නා. මීරිගම රෝහලෙන් තැපැල් මඟින් බෙහෙත් එව්වා. අපේ පුතාගේ පොතත් මාර්තු අග දවසක ගෙනිච්චා. අපිට තැපෑලෙන් බෙහෙත් ලැබුණේ අප්‍රේල් 11 වැනිදා. පුතාට ක්ලිනික් එකෙන් වෙනදා දීපු බෙහෙත් පෙති නෙමෙයි අප්‍රේල් 11 වැනිදා එවලා තිබුණේ. පුතාගේ පරණ බෙහෙත් පෙති ඉවර වුණාට පස්සේ අලුත් බෙහෙත් පෙති බොන්න පටන් ගත්තා. ඒ බෙහෙත් බොනකොට පුතාගේ ඇ‍ඟේ පළු දැම්මා. ඇස් රතු වෙලා ඉදිමුණා. ඒ දවස්වල පුතා අන්නාසි, සැමන්, අච්චාරු එහෙම කෑවා. අපි හිතුවෙ ඒවායේ සැරට පළු දැම්මා කියලා. එන්න එන්න පුතාට අමාරු වුණා. බෙහෙත් ගන්න යන්නවත් තැනක් නැහැ. ළඟ ඉන්නවා වතුපිටිවල ඉස්පිරිතාලේ වැඩ කරන ප්‍රසන්න කියලා දොස්තර මහත්තයෙක්. අපි එයා ළඟට පුතාව අරන් ගියා. ප්‍රසන්න දොස්තර මහත්තයා කිව්වා ඉක්මනට වතුපිටිවල ඉස්පිරිතාලේට ගෙනියන්න කියලා. ඒ වෙන‍කොට පුතාගේ ඇස් පෙනීමත් නැතිවෙලා තිබුණේ.” යනුවෙන් සිය පුතුට සිදු වූ විපත විස්තර කළේ ඔහුගේ මව වන සුජාතා මැණිකේ ය.
වෛද්‍ය උපදෙස් අනුව වතුපිටිවල රෝහලට රැගෙන යන ලෙනින් නිරෝෂන්ව එම රෝහලෙන් බාර ගැනීමට කැමති වන්නේ නැත. එහෙත් ලෙනින්ගේ පියා ප්‍රසන්න වෛද්‍යවරයාට දුරකථනයෙන් කතා කළ විට ඔහු වහාම රෝගියාව ඇතුළුකර ගන්නා ලෙස රෝහල් කාර්යය මණ්ඩලයට උපදෙස් දී තිබේ. ඒ අනුව ලෙනින් නිරෝෂන්ව වතුපිටිවල රෝහලට ඇතුළත් කරනු ලැබුවේ මැයි 01 වැනිදාය.
මෙහිදී අප්‍රේල් 11 වැනිදා සිට මැයි 01 වැනිදා තෙක් කාලය රෝගි තත්ත්වයෙන් ම නිවසේ ගත කිරීම සම්බන්ධයෙන් අකමැත්තෙන් වුවද විමසා නොසිටිය නොහැකිය. තම පුතුට තැපෑලෙන් එවා තිබුණේ සායනයෙන් වෙනදා ලබා දෙන ඖෂධ නොවන බව ලෙනින්ගේ පියා පවසයි. ඔහු සඳහන් කර සිටින්නේ පුතුට රෝහලෙන් වැරදි ඖෂධයක් එවා ඇති බවයි. එසේ නම් තැපෑලෙන් ඖෂධ එව් කවරයේ සඳහන් හදිසි දුරකථන අංකයෙන් ඒ පිළිබඳව විමසීමක් නොකළේ මන්ද යනුවෙන් අපට අසන්නට සිදු වේ. හදිසි දුරකථන අංකයට කතා නොකළ බව සුජාතා මැණිකේ ද පිළිගනියි. අනෙක් කාරණාව වන්නේ සති 2ක් මුළුල්ලේ රෝගී ලක්ෂණ උත්සන්න වනවිටදීත් දරුවාව මීරිගම රෝහලට රැගෙන නො‍ෙගාස් පෞද්ගලික ඩිස්පෙන්සරි ගැන විපරම් කිරීමයි. වතුපිටිවල රෝහලේ සේවය කරන ප්‍රසන්න නම් වෛද්‍යවරයා ඒ රෝහලට ඇතුළත් කරන ලෙස පවසන තුරු ඔවුන් දරුවා රෝහලට රැගෙන යාමට උනන්දුවක් දක්වා නොතිබීම කනගාටුවට කරුණකි.
ප්‍රසන්න නම් වෛද්‍යවරයා ලෙනින්ට ඖෂධ ආසාත්මිකතාවක් ඇති වී තිබෙන බව වහාම හඳුනාගෙන ඇත. ලෙනින්ව රෝහල්ගත කිරීමට ක්ෂණිකව පියවර ගෙන තිබෙන්නේ එබැවිනි.
වතුපිටිවල රෝහලේ දැඩි සත්කාර ඒකකයේ පුතා දවස් 12ක් හිටියා. ඒ දවස්වල පුතා මැරිලා වගේ හිටියේ. පුතා යම් තත්ත්වයකට ආපුවාම 5 වාට්ටුවට දැම්මා. පුතාගේ බඩවැල්වල, මොළයේ පවා පළු ඇවිත් තිබුණු බව වෛද්‍යවරුන්ගෙන් දැනගන්න ලැබුණා. ඇස්, තොල් රතු වෙලා ලේ ගැලුවා. පුතාගේ නියපොතු හැළුණා. ඒ සේරම ක්‍රම‍ක්‍රමයෙන් හොඳ වුණා. 5 වාට්ටුවේ මාස 2 1/2ක් හිටියා. මේ වෙලාවේ ඒ වාට්ටුවේ හිටපු තරංගි වෛද්‍යවරිය ගැන විශේෂයෙන් සඳහන් කරන්නම ඕනෑ. ඒ දොස්තර නෝනා පුතාව බැලුවෙ තමුන්ගේම පුතාව රැක බලා ගන්නවා වගෙයි. ඒ දොස්තර නෝනාගේ කැපවීම නිසා පුතා සනීප වුණා. හැබැයි ඇස් දෙකේ පෙනීම ගන්න බැරි වුණා. වතුපිටිවල රෝහලෙත් පුතාට ඔපරේෂන් කීපයක් කළා. ඒත් වැඩක් වුණේ නැහැ. පස්සේ පුතාව කොළඹ අක්ෂි රෝහලට යැව්වා.” යනුවෙන් ලෙනින්ගේ පියා වන අනිල් කපිල කුමාර විස්තර කළේය.
කොළඹ අක්ෂි රෝහලේ 15 වැනි වාට්ටුවේ ප්‍රතිකාර ලැබූ ලෙනින්ගේ දකුණු ඇසට ශල්‍යකර්මයක් සිදු කරනු ලැබුවේ තොලේ සියුම් පටක ඇසට බද්ධ කිරීමෙනි. මේ වන විට සැත්කම කළ ඇසට බෙහෙත් දැමීම සිදු කෙරේ. ඔහුගේ වම් ඇසේ සැත්කම සිදු කිරීමට ඔහු නැවතත් මේ මස 19 වැනිදා අක්ෂි රෝහලේ 15 වැනි වාට්ටුවට ඇතුළත් විය.
ලෙනින් නිරෝෂන් දරුවාට වැරදි ඖෂධයක් ලබා දුන්නාද, එම ඖෂධය ආසාත්මික වූවාද යන්න පැහැදිලි කර ගත හැකි වන්නේ මීරිගම මූලික රෝහලෙනි. එහි වෛද්‍ය අධිකාරි ජයන්ත අබයරත්න හමු වීමට ගියේ එබැවිනි.
“මේ දරුවාට අපස්මාරය වෙනුවෙන් සායනයෙන් නිකුත් කළේ sodium valproate ඖෂධය. ඒත් ඒ ඖෂධය රෝහලේ තිබුණේ නැති නිසා ඒ වෙනුවට ආදේශකයක් වශයෙන් phenytion sodium ඖෂධය අප්‍රේල් මාසේ නිකුත් කළා. එය වැරදි බෙහෙතක්වත් වෙන කාගෙවත් බෙහෙතක් මාරුවෙලා දීමක්වත් නොවෙයි. ආදේශක ඖෂධයක්. ඒ ඖෂධය ලෙනින් පුතාට ආසාත්මික වෙලා. සති ගණන් එක දිගට ඒ ඖෂධය ගැනීම නිසා තත්ත්වය දරුණු වුණා. මුල් සතියෙම රෝහලට දුරකතනයෙන් කතා කළා නම්, දරුවාව රෝහලට රැගෙන ආවා නම් නරක තත්ත්වයට හැරෙන එක වළක්වා ගන්න තිබුණා.” යනුවෙන් මීරිගම මූලික රෝහලේ වෛද්‍ය අධිකාරි ජයන්ත අබයරත්න සඳහන් කළේය.
සායනයෙන් නිකුත් කෙරෙන ඖෂධ මාරු කිරීමේදී රෝගීන්ට ඒ බව දැනුම් දීම සාමාන්‍ය පිළිවෙතයි. එහෙත් තැපැල් මාර්ගයෙන් ඖෂධ නිකුත් කළ නිසා එය මඟ හැරුණා විය හැකිය. සායනයේ බෙහෙත් මාරු කළ බව රෝගියාට දැනුම් දී තිබුණා නම් මීට වඩා යහපත් තත්ත්වයක් උදා වීමට ඉඩ තිබිණි.
“ලෙනින් නිරෝෂන් දරුවාගේ අම්මා දවසක් මාව හමුවන්න ආවා. ඇවිල්ලා පුතාගේ අසනීපය ගැන මට කිව්වා. දරුවාගේ ඇස් අන්ධ වී ඇති බවත් කිව්වා. ඒ ගැන පරීක්ෂණයක් කරන්න අවශ්‍ය නිසා මම අම්මාට කිව්වා පැමිණිල්ල ලිඛිතව ඉදිරිපත් කරන්න කියලා. එයා මැයි 26 දාතමින් මට ලිඛිතව පැමිණිල්ල බාර දුන්නා. ඊටපස්සෙ මම එය ප්‍රාදේශීය සෞඛ්‍ය අධ්‍යක්ෂ වෙත යොමු කළා. ජුනි 29 වැනිදා ප්‍රාදේශීය සෞඛ්‍ය අධ්‍යක්ෂවරයා විශේෂඥ වෛද්‍යවරුන්ගෙන් සමන්විත කමිටුවක් දැම්මා. මෙම කමිටුව පරීක්ෂණ කටයුතු සිදු කළා. එහි අවසන් වාර්තාව ඉදිරියේදි මාධ්‍ය වෙත ලබා දීමට සූදානම් වෙනවා.” යනුවෙන් තවදුරටත් විස්තර කළේ මීරිගම මූලික රෝහලේ වෛද්‍ය අධිකාරි ජයන්ත අබයරත්න ය.
මේ වන විට ඖෂධ නිෂ්පාදනය, සැපයුම් හා නියාමනය පිළිබඳ රාජ්‍ය ඇමති මහාචාර්ය චන්න ජයසුමන රෝගි දරුවාව පරීක්ෂා කර බැලීමට දරුවාගේ නිවසට පැමිණ තිබේ. දරුවාට ලබා දී ඇති ඖෂධ පරීක්ෂා කළ මහාචාර්යවරයා බෙහෙත් වර්ගය මාරු කර ඇත්තේ ඇයිද යන්න සොයා බැලිය යුතු බවත්, එසේ ලබා දුන් බෙහෙත් වර්ගය නිසා මෙම ආසාත්මිකතාව ඇති වූ බවට සැක පහළ කළ හැකි බවත් පැවසීය. එමෙන්ම රෝගියා පරීක්ෂාවට ලක් නොකර ඖෂධ වර්ග වෙනස් කිරීම සම්බන්ධයෙන් අමාත්‍යාංශ මට්ටමින් නිසි පරීක්ෂණයක් පැවැත්වීමට කටයුතු කරන බව ද සඳහන් කළේය.
ලෙනින් නිරෝෂන්ගේ පවුල සමෘද්ධිලාභි පවුලක් බැවින් සමාජ ආරක්ෂණ අරමුදල මඟින් ලබා දිය හැකි සියලුම උපකාර ලබා දීමට පියවර ගන්නා බව පැවසුවේ මීරිගම ප්‍රාදේශීය ලේකම් ප්‍රභාත් ඉන්දිකය. ඖෂධ නිෂ්පාදනය සැපැයුම් හා නියාමන රාජ්‍ය අමාත්‍ය චන්න ජයසුමන ෙලනින්ගේ සුවදුක් බැලීමට පැමිණීම දරුවාගේ පවුලේ සියලු දෙනා කෘතවේදීව සිහිපත් කරති.
ඡායාරූප - කැලුම් ලියනගේ
