ලෝකයේ පවතින මානව ධර්මීය ගුණයන් අතරින් ඉහළින්ම ඇති ගුණයක් වන්නේ පරෝපකාරයයි. එය හුදු සිතුවිල්ලකට පමණක් සීමා නොවී අප ජීවත් වන්නා වූ ලෝකය තුළ නිබඳව රැඳී පවතින්නකි. එක් රටකට කලාපයකට හෝ එක් කුලයකට සීමා නොවී කවරකු හෝ තවත් අයකුට උපකාර කරන්නේ නම් එය අප සැම බලාපොරොත්තු වන මානුෂිකත්වයේ සලකුණකි. කවරකු හෝ තම ජීවිත කාලය තුළ එක්රැස් කරනු ලබන මිල මුදල් යාන වාහනවලට වඩා වටිනාකමක් රැඳී පවතින්නේ ඔහු හෝ ඇය විසින් කරනු ලබන කුසල කර්මයන් මතය.
පුද්ගලයකු විසින් කළ යහපත් ක්‍රියාවල ප්‍රතිඵල ලැබෙන්නේ ඒ පුද්ගලයා වෙතය. එහි ප්‍රතිඵල ලැබීමට නම් මෙලොව පරලොව කියා භේදයක් නැත. කරනු ලැබූ කටයුතුවල පුණ්‍ය බල මහිමය මෙලොව දීම අත්විඳින්නට ලැබේ නම් එය එක්තරා අන්දමකින් පුදුමාකාර වාසනා ගුණයකි. එකී පින්බර වාසනා ගුණයක් ලැබීමට මුල් වූ පුද්ගලයකු ලෙස 59 හැවිරිදි ඇන්ඩෘ රොහාන් හැඳින්විය හැකිය. ඔහු පිළිබඳ කතාව ඇරඹෙන්නේ ඔහු සෞදි සමාගමක සේවය කළ අවධියේදී ඇති වූ රෝගී තත්ත්වයක් නිසා පෞද්ගලික ජෙට් යානයක් මඟින් කටුනායක ගුවන් තොටුපළට රැගෙන ඒමත් යන පුවත සමඟිනි.
ශ්‍රී ලංකාවේ ශ්‍රමිකයන් ලක්ෂ 15ක පමණ පිරිසක් මේ වන විට විදෙස් රටවල සේවය කරනු ලබන අතර එයින් වැඩිම පිරිසක් එනම් ලක්ෂ 10ක් පමණ සේවය කරනු ලබන්නේ මැදපෙරදිග රටවලය. එපමණක් නොව විදෙස් ශ්‍රමිකයන්ගෙන් ලංකාවට වැඩිම ආදායමක් ගෙන එනු ලබන්නේද මැද පෙරදිග රටවල සේවය කරන ශ්‍රී ලාංකිකයන්ය. එසේ කාලයක් පුරා ශ්‍රී ලාංකිකයන් මැදපෙරදිග රටවල ශ්‍රමිකයන් ලෙස කටයුතු කළ ද එම රටවල පුරවැසියන් සහ හාම්පුතුන් තමා යටතේ සේවය කරන්නන්ට සැලකීම සම්බන්ධයෙන් පවතින්නේ යහපත් තත්ත්වයක් නොවේ. නිතර අපට අසන්නට දකින්නට ලැබුණේ ඔවුන් යටතේ සේවය කරන්නවුන්ට සිදු කරන හිරිහැර ගැන දුක්ඛිත කතාය. නමුත් මේ සියල්ල මොහොතකට හෝ අමතක කර දැමීමට හේතු වන ආකාරයේ එක් සිදුවීමක් පසුගිය දිනෙක අපට දැනගන්නට ලැබිණි. එනම් සෞදි සමාගමක් විසින් එහි සේවය කළ ශ්‍රී ලාංකිකයකු අසනීප වීම හේතුවෙන් ඔහු ලංකාවේ තම පවුලේ ඥාතීන් වෙත ගෙනවිත් බාර දීමට තරම් කාරුණික වීම ඒ අපූරු පුවතයි. ඒ සිදුවීම වූයේ අගෝස්තු 21 වනදා ය. මේ ආකාරයට ලංකාවට ගෙන එනු ලැබුවේ අප මුලින් කී කඳාන ප්‍රදේශයේ පදිංචිව සිටින ඇන්ඩෘ රොහාන්
මෙම කරුණත් සමඟ බොහෝ දෙනෙක් විමසිලිමත් වූයේ එම සිදුවීම වූයේ කවර හේතුවක් නිසා ද යන්න සොයා බැලීමටය. මේ සිදුවීමේ සුලමුල කුමක්ද යන්න දැනගැනීමට බොහෝ දෙනකු තුළ උනන්දුවක් ඇතිවූයේ සෞදි අරාබිය වැනි රටකින් ශ්‍රී ලාංකික ශ්‍රමිකයකු එවැනි සැලකිල්ලකට සහ ගරුත්වයකට ලක්වීමට තරම් විශේෂිත වූයේ ඇයිද යන කරුණ සම්බන්ධයෙනි. එපමණක් නොව ජාත්‍යන්තරයේ පවා බොහෝ දෙනෙක් මේ සම්බන්ධව කතා බහ කරන්නට වූහ.
එවැනි විශේෂ සැලකීමකට බඳුන් වූ ඇන්ඩෘ රොහාන් උප්පත්තිය ලැබුවේ 1960 වර්ෂයේ මඩකලපුවේදී ය. උපතින් කතෝලික භක්තිකයෙකු වූ ඇන්ඩෘ තම මූලික අධ්‍යාපනය හදාරන්නට පිවිසෙන්නේ මඩකලපුව ශාන්ත පීතර විද්‍යාලයටය. එයින් අනතුරුව ඔහුගේ උසස් අධ්‍යාපනය තවදුරටත් ඉහළ නංවාලීම පිණිස ඇන්ඩෘගේ දෙමාපියන් ඔහු ඇතුළත් කරනු ලබන්නේ බොරැල්ල වෙස්ලි විද්‍යාලයට ය. කතෝලික භක්තිකයෙකු වූ ඇන්ඩෘ පදිංචිව සිටියේ කඳාන ප්‍රදේශයේ ය. ඔහුගේ ජීවන සහකාරිය බවට පත්වූයේ මාග්‍රට් ජෝන් ය. ඔවුන්ට දරුවන් තිදෙනකු සිටින අතර සිටින අතර එක් පු‍ෙතකු වූ ශිරාන් දැනට ප්‍රංශයේ ජීවත් වන අතර අනෙක් පුත්‍රයා වන රොෂාන් සහ දියණිය කාමිණි ලංකාවේ පදිංචිව සිටී.
ඇන්ඩෘ රොහාන් අසනීප වන විට සේවය කරමින් සිටියේ ජෙඩා නුවර පිහිටි ගල්ෆ් වෙස්ට් සමාගමේය. තුන්සියයකට ආසන්න සේවක සංඛ්‍යාවක් සේවය කරනු ලබන එම ආයතනයේ සියල්ලන්ගේම හිත දිනාගත් අයකු ලෙස ඇන්ඩෘ කා අතරත් ජනප්‍රියව සිටියේය. ඕනෑම අයකුට උදවු කරන මනුෂ්‍යත්වයෙන් සහ පිරි නිතහමානී හදවතක් ඔහු සතු විය. සෞදි අරාබියේ සේවයට වසර තිස් එකකට ආසන්න වුවද ඔහු ගල්ෆ් වෙස්ට් සමාගමේ සේවය අරඹනු ලැබුවේ මීට වසර පහළොවකට පමණ ඉහතදීය. අසනීප වන විට ඔහු එම සමාගමේ විකුණුම් හා අලෙවි කරන කළමනාකරුවකු ලෙස තම සේවය සලසමින් සිටි අතර ඔහු යටතේ සේවකයන් 31 දෙනෙකු සේවය කරමින් සිටියහ.
 |
| ඇන්ඩෘ රොහාන් (ඉදගෙන වමේ) සමාගමේ කාර්ය මණ්ඩලයේ පිරිසක් සමඟ |
ඔහු සහ එම සේවකයන් අතර සම්බන්ධතාව කෙතරම් මානුෂිය දැයි කිවහොත් ඇන්ඩෘ ඔහුට ලැබෙන බෝනස් මුදල පවා තම සේවකයන් සමඟ බෙදා ගන්නට තරම් නිර්ලෝභී අයකු විය. එපමණටම මෘදු, කාරුණික හදවතක් ඔහු සතුව තිබිණ. පරිත්‍යාගශීලී බව, කාරුණික බව, කළගුණ සැලකීම වැනි උතුම් ගතිගුණ ඇන්ඩෘගේ ජීවිතය තුළ ඕනෑවටත් වඩා ඉහළින් තිබූ බව ඔහු ඇසුරු කළ කවුරුත් හොඳින්ම දන්නා කරුණකි. එහෙත් ජීවිතයේ ඇතැම් දෑ සිදු වන්නේ අප කිසිවකු සිතන පතන අයුරින්ම නොවේ. ඇන්ඩෘ රොහාන්ගේ ජීවිතයටද ඒ සත්‍යය පිටු දකින්නට අපහසු විය.
පසුගිය ජුනි මස 24 වැනිදා ඔහු හදිසියේම අසනීප වූයේ සේවයේ නිරතව සිටියදීය. ඔහු පළමු වරට රෝගී වූයේ එදිනය. එම අසනීපය ආඝාත (Stroke) තත්ත්වයකි. ඒ සඳහා ඔහුට හදිසි වෛද්‍ය ප්‍රතිකාර සිදු කළ අතර වෛද්‍යවරුන් විසින් ඔහුගේ රෝගී තත්ත්වය හඳුනා ගැනීමටද සමත් වූහ. ඒ අනුව එරට වෛද්‍යවරුන්ගේ නිගමනය වූයේ ඇන්ඩෘගේ මොළය අභ්‍යන්තරයේ ජලය වහනය වීමෙන් ඔහු ඒ ආකාරයට රෝගී තත්ත්වයට පත්ව ඇති බවයි. පසුගිය ජුලි මස 24 වැනි දින එසේ හදිසියේ රෝගී තත්ත්වයට ලක්වන්නට පෙර ඇන්ඩෘ ගිය වසරේ නත්තලට මෙරටට පැමිණීයේය. ඊට පසු ඔහු යළිත් ලංකාවට පැමිණියේ තම බිරිය අසනීප තත්ත්වයෙන් සිටි නිසා ඇයගේ සුව දුක් බැලීමට ය.
දින දහයක කාලයක් බිරියගේ සුවදුක් සොයා බලමින් මෙරට රැඳී සිටි සිටි ඇන්ඩෘ යළිත් සෞදි අරාබිය වෙත පැමිණියේය. ඒ වන විටද ඔහු තමාගේ අසනීප තත්ත්වය සම්බන්ධයෙන් කිසිවක් දැන සිටියේ නැත. කෙසේවෙතත් එතෙක් යහපත් සෞඛ්‍ය තත්ත්වයෙන් සේවය කරමින් සිටි ඇන්ඩෘට සිදුවූයේ හදිසියේ ඇතිව තිබූ අසනීප තත්ත්වයට එරටදී වෛද්‍ය ප්‍රතිකාර ලබා ගන්නටය. මෙසේ ප්‍රතිකාර ලබමින් සිටියදී ඇතිවූ කෝමා තත්ත්වය හේතුවෙන් ඔහු රෝහල් ගතව සිටියේ සම්පූර්ණ සිහිසුන්වය. සිහිසුන්ව එරට රෝහල්ගතව සිටි අවධියේ දී වෛද්‍යවරුන් විසින් ඔහු පිළිබඳ නිරන්තර අවධානයකින් සිටි අතර ඔහුගේ පවුලේ ඥාතීන්ගේ ඉල්ලීම වූයේ කෙසේ හෝ ඇන්ඩෘ මෙරටට ගෙන්වා දෙන ලෙසයි. ඔවුන් මෙම ඉල්ලීම කරනු ලැබූවේ සෞදි ගල්ෆ් වෙස්ට් සමාගමේ පාලනාධිකාරිය වෙතයි. ඇන්ඩෘ රොහාන්ගේ පවුලේ ඥාතීන්ගේ ඉල්ලීමට අනුව ගල්ෆ් වෙස්ට් සමාගමේ ප්‍රධාන විධායක වශයෙන් කටයුතු කරනු ලබන එදිරිස් මුස්තාපා මේ කටයුත්ත සම්බන්ධව තවත් එක් පුද්ගලයකු සම්බන්ධ කරගනු ලැබීය. ඒ, ඇන්ඩෘ සමඟ එක්ව එකම ආයතනයේ සේවය කරනු ලැබූ ෆාසී මරික්කාල්ය. එමෙන් ම සත්‍ය ශ්‍රිවා සහ රනිල් රෝගී ඇන්ඩෘ වෙනුවෙන් ලබාදුන් දායකත්වය ඉමහත්ය.
රෝගියා ලංකාවට ගෙන ඒම සඳහා ඔවුන් සමඟ සෞදි වෛද්‍ය කණ්ඩායමක්ද සූදානම් කරනු ලැබූ අතර රෝගියා මෙරටට ගෙන ඒම සඳහා පෞද්ගලික ජෙට් යානයක් ලබාදීමට ද කටයුතු කෙරිණ. මේ සම්බන්ධයෙන් එම ආයතනය මුලින්ම ශ්‍රී ලංකා තානාපති කාර්යාලය දැනුම්වත් කිරීමට කටයුතු කළහ. එම දැනුම්වත් කිරීමෙන් පසු පවුලේ ඥාතීන්ටද දන්වා රෝගියා වෛද්‍යවරුන් සහ අතුරු වෛද්‍ය නිලධාරීන්ගෙන් සමන්විත විශේෂ යානයකින් කොළඹ කටුනායක ගුවන් තොටුපළට ගෙන ඒමට සමත් විය
 |
| පෞද්ගලික ජෙට් යානයෙන් ලංකාවට පැමිණි රෝගී ඇන්ඩෘ වෛද්‍ය කාර්ය මණ්ඩලය විසින් ඉන් පිටතට ගන්නා අයුරු |
මෙසේ කොළඹට ගෙන එනු ලැබූ ඇන්ඩෘ රොහාන් වෛද්‍ය ප්‍රතිකාර සඳහා කොළඹ පෞද්ගලික රෝහලක් වෙත ගෙනයනු ලැබුවේ මෙරට සෞඛ්‍ය අංශ විසින් නිර්දේශිත නිරෝධායන කටයුතු අනුකූලවය. ඒ අනුව ඇන්ඩෘ රෝහල් ගත කිරීමෙන් පසු වෛද්‍ය කටයුතු භාරව කටයුතු කරනු ලැබුවේ විශේෂඥ වෛද්‍ය සුනිල් පෙරේරා මහතාය. රෝගී තත්ත්වය අනුව ඇන්ඩෘ ට සැත්කම් කිහිපයක් සිදු කිරීමට සිදුව තිබූ අතර එහි ප්‍රථම සැත්කම සිදු කරනු ලැබූවේ පසුගිය 25 වනදා කොළඹ මහ රෝහල ආසන්නයේ පිහිටා ඇති එම පෞද්ගලික රෝහලේදී මෙම සැත්කම සිදු කිරීම සඳහා පැය 5ක පමණ කාලයක් ගත වූ අතර එය ඉතා සාර්ථක ලෙස නිම කිරීමට වෛද්‍ය කාර්ය මණ්ඩලය සමත් විය. විශේෂඥ වෛද්‍ය සුනිල් පෙරේරා සඳහන් කරන්නේ ඉතිරි සැත්කම්ද මේ ආකාරයෙන් සාර්ථකව නිම වනු ඇති බවය. මේ මොහොත වන විටත් රෝගීයා බැලීමට අවසර ඇත්තේ එක් අයකුට පමණි.
මේ ආකාරයට ගල්ෆ් වෙස්ට් සමාගම විසින් ඇන්ඩෘ රොහාන් ලංකාවට ගෙන ඒම පිණිස අති විශාල මුදලක් වැය කර ඇති අතර එම මුදල ඇමරිකානු ඩොලර් 58,000 වේ. එය ශ්‍රී ලංකාවේ මුදලින් ලක්ෂ 107කට ආසන්නය. ගල්ෆ් වෙස්ට් සමාගම ඇන්ඩෘ මෙරටට පිටත්කර හැරීමෙන් පමණක් සිය වගකීම අත්හලේ නැත. මෙරට රෝහල්ගත වී ප්‍රතිකාර ලබන ඇන්ඩෘ පිළිබඳ සෞදි අරාබියේ සිටින ගල්ෆ් වෙස්ට් සමාගමේ නියෝජිතයකු නිරන්තරයෙන් සොයා බැලීම් සිදු කරන්නේ එම සමාගම් කළමනාකාරීත්වයේ උපදෙස් අනුවය.
ශ්‍රී ලාංකික ශ්‍රමිකයකු වෙනුවෙන් ඉටුකරනු ලබන එම සේවය පිළිබඳ සෞදියේ ශ්‍රී ලංකා තානාපති කාර්යාලය එම සමාගමට ස්තූතිය පුදකර තිබේ. සිය ආදරණීයා වෙනුවෙන් එම සමාගම විසින් ඉටු කළ මහඟු කාර්යය පිළිබඳ ඇන්ඩෘ රොහාන්ගේ පවුලේ සියලු දෙනා සිය කෘතඥතාව පළ කිරීමට ද අමතක නොකළහ. ඇන්ඩෘ රොහාන් වෙත සිය හාම්පුතුන් ගෙන් එවැනි සුවිශේෂ අනුග්‍රහයක් හිමිවූයේ ඔහු තුළ පැවති උදාර මානුෂික ගුණාංග නිසා බව නොකියාම බැරිය. මෙවැනි සිදුවීම්වලින් පසක් වන්නේ උතුම් වූ මනුෂ්‍යත්වයට පෙරළා ප්‍රතිඋපකාර ලැබෙන බවය.
