ජනතාවට දහසක් බලාපොරොත්තු දී ජනතා ජන්දයෙන් මහජන නියෝජිතයන් වී මහජන සේවයට යන බොහෝ මහජන නියෝජිතයන් පිළිබඳව අද ජනතාව තුළ ඇත්තේ දැඩි අප්‍රසාදයකි; දැඩි කළකිරීමකි. ඊට හේතුව නම් මහජන ජන්දයෙන් පත්වී මහජන සේවයට කියා යන බොහෝ දෙනෙකු මහජන සේවය අමතක කර දමා සිය ඥාති පරපුරට හා දේශපාලන හෙන්චයියන්ට පමණක් සේවය කිරිම නිසාය. මේ ලියන්න යන පුවතද අපට පසුගිය දින වාර්තා වුයේ හම්බන්තොට දිස්ත්‍රික්කයට අයත් ලුණුගම්වෙහෙර ප්‍රාදේශීය ලේකම් බළ ප්‍රදේශයට අයත් පහළ මත්තල ප්‍රදේශයෙනි.
මත්තල අධිවේගී මාර්ග පිවිසුමේ සිට ලුණුම්වෙහෙර දක්වා දිවෙන ප්‍රධාන මාර්ගය දෙපස ඇති කැලෑ ඉඩම් වලට පාරම්පරික හේන් ගොවියන්ට පවා ගොවිතැන් කිරිමට ඇතුළුවීමට අවසර නොදෙන නමුත් ප්‍රදේශයේ ප්‍රාදේශීය දේශපාලඥයෙකු විසින් වන සංරක්ෂණ නිළධාරීන්ගේ හා රාජ්‍ය නිළධාරීන්ගේ සහාය ඇතිව දැනට වසර කිහිපයක සිට අල්ලා කොටු කරගෙන එම ඉඩම් සදහා බලපත්‍රද සකස් කර ඇති අතර මේ අවනඩුව පිළිබදව නිළධාරීන්ට කොතෙකුත් පැමිණිලි කළත් කිසිදු සෙතක් වී නැතැයි ජනතාව චෝදනා කළේය.
ඒ අනුව සිද්ධිය පිළිබදව සොයා මාධ්‍ය කණ්ඩායමක පසුගිය දින පහළ මත්තල වැව හා අවට කැලෑ තුළට හොර රහසේ ඇතුළු වුයේ මෙහි ඇත්ත නැත්ත සොයාය. ගම්වැසියන් කිහිප දෙනෙකුම අපට මේ ගමන සදහා මග පෙන්වීය.
අප පහළ මත්තල කැළයට යන විටත් අනවසරයෙන් අල්ලා කොටුකරගෙන තිබූ කැලෑ ඉඩමක තිබූ ගස් කොලෙන් කපා ගිනි තබා තිබුණා. වන සතුන්ගේ නිජ භූමි ලෙස පැවති කැලෑ කොටස් අක්කර 30ක පමණ ප්‍රමාණයක් අල්ලා කොටුකරගෙන තිබෙන අයුරුද දැකිය හැකිවීය. ඉඩම් ජාවාරම සම්බන්ධයෙන් අප සිදුකල සොයා බැලීමේදි අනාවරණය වුයේ ප්‍රදේශයේ ප්‍රාදේශීය දේශපාලඥයකු විසින් 2014 වසරේදී සිය දේශපාලන හයිය උපයෝගි කරගනිමින් මුලින්ම අක්කර දෙකක පමණ ඉඩම් කැබැල්ලක් කොටු කරගෙන තිබු බවත් පසුව ටිකෙන් ටික එය පුළුල් කරමින් සිය බිරියගේ නමට හා විවිධ ඥාතීන්ගේ නම් වලට වෙන වෙනම ඉඩම් කට්ටි අල්ලා ගනිමින් බලපත්‍ර සකසා ඇති බවයි.
ගම්මුන් පැවසුවේ පාරම්පරිකව හේන් වගා සිදුකරන ගොවීන්ට පවා හේන් සකස් කිරිමට මෙම කැලෑ කොටස තුළට යාමට කිසිදු අවසර නොලැබෙන බවත්, යම් අයෙකු එලෙස ඇතුළු වුවහොත් වන සංරක්ෂණ නිලධාරීන් විසින් ඔවුන්ව අත්අඩංගුවට ගෙන අධිකරණයට ඉදිරිපත් කිරිමටද කටයුතු කරන බවත්ය.
එය එසේ තිබියදී මෙම ප්‍රාදේශීය දේශපාලඥයා පමණක් තවත් කිහිප දෙනෙකු සමග වසර ගණනාවක සිට නිරුපද්‍රිතව මෙලෙස කැලෑ ඉඩම් අල්ලා කොටුකරගෙන බලපත්‍ර සකසාගෙන වගා කිරීම පුදුමයට කරුණක් බවයි.
අදාළ ප්‍රාදේශීය දේශපාලඥයා හා අනිකුත් පුද්ගලයන් මේ වන විට අත්පත් කරගෙන ඇති ඉඩම් වටා ඇති අනෙකුත් කැලෑ ඉඩම් සහ පහළ මත්තල වැව් තාවුල්ල දක්වාද ඉඩම් අල්ලා ගැනීම පුළුල් කරමින් ඇත්තේ කිසිදු බියක් සැකයකින් තොරවය. ගම්මුන් දැඩි ලෙස නිළධාරීන්ට චෝදනා එල්ල කළේ අසරණ මිනිස්සුන්ට එක විදියකටත් බලය ඇති පුද්ගලයන්ට තව විදියකටත් නිතිය ක්‍රියාත්මක කරන බවටය.
මත්තල සිදුවෙන මෙම ඉඩම් කොලය පිළිබදව පළමුවරට පසුගිය දින මාධ්‍ය හරහා ප්‍රචාරය විමත් සමග මේ පිළිබඳව වහා සොයා බලා කරුණු වාර්තා කරන ලෙසට වාරිමාර්ග අමාත්‍ය චමල් රාජපක්ෂ හම්බන්තොට දිසාපතිවරයා වෙත දැනුම් දි තිබුණි. ඒ අනුව වහා ක්‍රියාත්මක වු හම්බන්තොට දිසාපති එච්.පී.සුමනසේකර ඇතුළු නිලධාරීන් කණ්ඩායමක් පසුගිය 11 වන දින මත්තලට පැමිණියේය.
දිසාපති වරයා ඇතුළු නිලධාරී කණ්ඩායම මත්තලට පැමිණීම පිළිබදව දැනගත් මාධ්‍ය කණ්ඩායම්ද එම ස්ථානයට ගියේය. එහිදී මෙම ස්ථානයට ලුණුගම්වෙහෙර ප්‍රාදේශීය සභාවේ සභාපති රසික දිනේෂ් මහතා ඇතුළු පිරිසක් වගේම ලුණුගම්වෙහෙර දිසා වන නිළධාරී රෝහණ අමරතුංග ඇතුළු පිරිසක්ද පැමිණි සිටියේය.
දිසාපති වරයාගේ මෙම හදිසි පැමිණීම පිළිබදව නම් දිසා වන නිළධාරීවරයා දැක්වූයේ නොසතුටක්ය. කෙසේ වෙතත් එහි සිදුව තිබූ වන විනාශය පිළිබදව සියළු කරුණු සොයා බැලූ දිසාපති වරයාට මත්තල හා අවට සිදුවෙන තවත් ඉඩම් ජාවාරම් රැසක් සම්බන්ධයෙන්ද තොරතුරු රැසක් අනාවරණය කර ගැනීමට හැකිවීය.
මෙහිදි දිසාපතිවරයා දිසා වන නිළධාරී රෝහණ අමරතුංගට උපදෙස් ලබා දෙමින් මේ කැලෑ කපන මිනිස්සුන්ට එරෙහිව නීතිය හරියට ක්‍රියාත්මක කරන ලෙසට ඉල්ලීමක්ද සිදු කළේය.
දිසාපතිවරයාගේ මෙම ඉල්ලීමත් සමඟ තරමක් උරණ වු දිසා වන නිළධාරී රෝහණ අමරතුංග කරුණු පැහැදිලි කරමින් දිසාපති වරයාට පැවසුවේ වන සංරක්ෂණයට අයත් සමහර ඉඩම් සදහා ලුණුගම්වෙහෙර ප්‍රාදේශීය ලේකම් වරයා විසින් බලපත්‍ර ලබා දිම නිසා ඔවුන්ට ඊට එරෙහිව නිතිය ක්‍රියාත්මක කිරීමට නොහැකි වූ බවත් හා මේ වැනි ඉඩම් තවත් ඕනෑ තරම් මේ ප්‍රදේශයේ ඇති බවත්ය. එහිදී දිසාපතිවරයා දිසා වන නිළධාරීවරයාට පැවසුවේ එලෙස බලහත්කාරයෙන් අල්ලාගෙන ඇති ඉඩම් පිළිබදව තොරතුරු ඇත්නම් ඉඩම් අල්ලාගෙන තිබෙන බව පවසමින් නිහඬ ව නොසිට වහා නීතිය ක්‍රියාත්මක කරන ලෙසයි.
“මන් හිතුවේ නෑ මෙතනට මාධ්‍ය ඇවිත් වීඩියෝ කරනවා ඇති කියලා. මෙහෙම තත්ත්වයක් මන් බලාපොරොත්තු වුණේ නෑ යැයි පවසමින් දිසා වන නිළධාරීවරයා දිසාපතිවරයාට පැවසූ අතර එහිදී දිසාපතිවරයා පැවසුවේ මාධ්‍යෙව්දීන් පැමිණීම නවත්වන්න මට පුළුවන් කමක් නෑ යනුවෙනි.
මෙහිදී දිසාපතිවරයා එහි සිටි රාජ්‍ය නිළධාරීන්ටද උපදෙස් ලබා දෙමින් පැවසුවේ රාජ්‍ය නිලධාරීගේ තිබූ යම් යම් දුර්වලතා හේතුවෙන් මෙම තත්ත්වය ඇතිව ඇති බවත් ඉදිරියට මෙවැනි හිඩැස් නොතබා කටයුතු කිරිමට රාජ්‍ය නිලධාරීන් කටයුතු කළ යුතු බවත්ය. මෙම සිද්ධිය සම්න්ධයෙන් දිසාපතිවරයා ලෙස අවශ්‍ය නීතිමය කටයුතු ගන්නා බවත් පැවසීය.
කෙසේ වෙතත් මෙහිදී දිසා වන නිළධාරී වරයා පැවසුවේ මේ සම්බන්ධයෙන් ඉදිරියේදී නීති ප්‍රකාරව කටයුතු කරන බවයි.
එහිදී මාධ්‍යවේදීන් දිසා වන නිළධාරීවරයාගෙන් විමසුවේ මෙතෙක් මේ සම්බන්ධයෙන් නීතිය ක්‍රියාත්මක නොකළේ මන්ද යන්නයි. එහිදී දිසා වන නිලධාරීවරයා පැවසුවේ ඒවාට පසුව පිළිතුරු ලබා දෙන බවත් මේ සම්බන්ධයෙන් හෙට සිට නිතිය ක්‍රියාත්මක කරන බවත්ය.
මේ සම්බන්ධයෙන් ප්‍රදේශවාසීන් පවසන්නේ දේශපාලන හිතවත්කම් මත මෙම ඉඩම් අල්ලා ගැනිම සිදුවෙන බවත් මේ සම්බන්ධයෙන් අවස්ථා ගණනාවකදීම දිසා වන නිළධාරීවරයා ඇතුළු වන සංරක්ෂණ නිළධාරීන් දැනුවත් කළත් කිසිදු ප්‍රයෝජනයක් නොවුණු බවත්ය. එමෙන්ම දිස්ත්‍රික් ලේකම්වරයා පැමිණ මේ සම්බන්ධයෙන් සොයා බැලීම සම්බන්ධයෙන්ද ප්‍රදේශයේ ජනතාව දැඩි ප්‍රසාදය පළ කරති.
