කෘතිය- දූවිලි
කර්තෘ- ශාන්ති දිසානායක
ප්‍රකාශක- ඇම්.ඩී.ගුණසේන සහ සමාගම
මිල- රුපියල් 650 ⁄ = පිටු ගණන- 222
විමසීම්- 0719 943 989
නිරන්තර ජීවන අරගලයක යෙදෙන මිනිසුන්ගේ හදවතේ රිද්මය තම නිර්මාණවල වස්තුබීජය කරගත් ප්‍රවීණ ලේඛිකා ශාන්ති දිසානායකගේ නවතම කෘතියයි මේ. නවකතා, කෙටිකතා, යොවුන් නවකතා ඇතුළු කෘති රාශියක් ලියා ප්‍රකාශයට පත්කර ඇති කතුවරිය මේ නවකතාව තුළින් ද පසක් කරන්නේ යාචකයා ද මැරයාද දේශපාලඥයා ද මේ සමාජ ක්‍රමයේම දායාදයන් මිස අනෙකක් නොවන බවයි. දරිද්‍රතාවය, සමාජ අසාධරණකම් සහ ජීවිතයේ දුක්ඛිත බව අතරින් පැන නඟින ප්‍රේමයේ සහ මිනිසත්කමේ අලෝක ධාරාවක් ද මේ නවකතාවේ ප්‍රධාන චරිත වන දුලානි, ටිරන්, සමිතා සහ සුරම්‍යා මඟින් පාඨකයාගේ හදවතේ අතුරාලන්නට කතුවරිය සමත් වී ඇත.
කෘතිය- කිමද නොසතුට
කර්තෘ- මාකෙහෙල්වල හේරත්
ප්‍රකාශක- ඇස්.ගොඩගේ සහ සහෝදරයෝ
මිල- රුපියල් 850 ⁄ = පිටු ගණන- 158
විමසීම්- 0112 685 369
කතුවරයාගේ සිවුවැනි කෘතිය වන මේ කෘතිය නූතන සිංහල ප්‍රබන්ධ කතාවෙහි නව්‍ය ප්‍රවණතා ප්‍රකට කෙරෙන සාහිත්‍ය නිර්මාණයකි. සිංහල සාහිත්‍යයෙහි ප්‍රචලිත කතා පුවතක් වන ගුත්තිල ජාතකය පසුබිම් කරගනිමින් අද්‍යතන සමාජය පිළිබඳ පුළුල් දේශපාලනික විග්‍රහයක නියැළීමට කතුවරයා විසින් උත්සාහ දරා ඇත. අධිකරණයක් තුළ සිදුවන නඩු විභාගයක් නවකතාවෙහි ආකෘතිය වශයෙන් භාවිත කර ඇති ආකාරය සිත්ගන්නාසුලුය.
කෘතිය- ඇගිට්ටා සහ ඇබිත්තයා
කර්තෘ- ඩබ්ලිව්.එම්.බී.කරුණාරත්න
කර්තෘ ප්‍රකාශනයකි
මිල- රුපියල් 250⁄= පිටු ගණන- 100
විමසීම්- 0714 477 889
ගැමි ජීවන අත්දැකීම් පාදක කරගත් ප්‍රබන්ධයක් වන මේ කෙටිකතා සංග්‍රහය ජාතික පුස්තකාල හා ප්‍රලේඛන සේවා මණ්ඩලයෙන් පුස්තකාල සඳහා නිර්දේශිත කෘතියකි. කතුවරයාගේ දෙවැනි කෘතිය වන මෙහි දශක අටකට පෙර උතුරු පළාතේ ඉතා පිටිසර සුන්දර ගම්මානයක සංස්කෘතික පසුබිම කේන්ද්‍ර කරගනිමින් විකාශනය වන කතා එකතුවක් අන්තර්ගත වේ. උතුරු පළාතට ආවේණික වූ ගැමි සංකල්ප, ආකල්ප, බස්වහර සහ උපමා රූපක භාවිත කරමින් සරල ලේඛන ශෛලියකින් ලියැවී ඇති මේ කෘතිය පාඨකයාට අලුත් අත්දැකීමක් ගෙනඒමට සමත්ය.
කෘතිය- උම්මග්ග ජාතකය
සංස්කරණය- කුමාරතුංග මුනිදාස
ප්‍රකාශක- ඇම්.ඩී. ගුණ්සේන සහ සමාගම
මිල- රුපියල් 500/= පිටු ගණන- 280
විමසීම්- 0112 323 981
උම්මග්ග ජාතකය නම් මේ කෘතිය, අගනා කතා වස්තු සංග්‍රහයක් ලෙස සැලකෙන පන්සිය පනස් ජාතක කතා පොතේ එන උම්මග්ග ජාතකය පරිච්ඡේද 49කට කැටිකරමින් සකස් කර ඇත. පාඨකයා තුළ කතා රසය වැඩිදියුණු කිරීම සඳහා එක් එක් පරිච්ඡේද සඳහා අදාළ වන සිතුවමකින් ද සමන්විත වේ. පරිහරණය කරන්නන්ගේ පහසුව වෙනුවෙන් ඉතාම අවශ්‍ය ස්ථාන සඳහා ටිප්පණි මාලාවක් ද මීට ඇතුළත් කර ඇත.
කෘතිය- නවාතැන් අඩවිය
කර්තෘ- සුමිත් නානායක්කාර
ප්‍රකාශක- දයාවංශ ජයකොඩි සහ සමාගම
මිල- රුපියල් 600 ⁄= පිටු ගණන- 184
විමසීම්-0777 164 760
2009 වසරේ ස්වර්ණ පුස්තක සම්මාන දෙවැනි වටය සඳහා නිර්දේශිත ‘මාගම් සෝලි’ නවකතාව සහ චෞර උන්මාදය, බලපුළුවන්කාරයෝ, යකඩ යක්කු, යකඩ ඉටිපන්දම් ආදි නවකතා රැසක් රචනා කළ ලේඛක සුමිත් නානායක්කාරගේ අලුත්ම නවකතාව මෙයයි. භෞතික ලෝකය අතහැර යන ගමනේදී කෙනකු සිදුකරන පාපෝච්චාරණයක් ඉදිරිපත් කරමින් කතුවරයා උත්සාහ දරා ඇත්තේ මෙලොව මෙන්ම එලොව ද මිනිසුන් සහ ගැහැනුන් මුහුණ දෙන දුක, සැප ආදී අෂ්ට ලෝක ධර්මයන් සියුම්ව ස්පර්ශ කිරීමටය. ඔබ මොහොතකට මියගොස් ඇතැයි සිතා ඔබේ ආත්මය සමඟ උමඟ දිගේ ඒ අසිරිමත් ලෝකයට පිවිසෙන ලෙස කතුවරයා පාඨකයාට ඇරයුම් කර සිටී.
කෘතිය- සිතංගම
කර්තෘ- උත්‍රා කුමාරි රණසිංහ
ප්‍රකාශක- ඇස්. ගොඩගේ සහ සහෝදරයෝ
මිල- රුපියල් 350⁄= පිටු ගණන- 68
විමසීම්-0716 622 840
කාව්‍ය කෘති කිහිපයක කතුවරියක වන උත්‍රා කුමාරි රණසිංහ ගේ පළමු කෙටිකතා සංග්‍රහය මේ කෘතියයි. ජීවිත ගමනේ විවිධ අභියෝගයන්ට මුහුණ දෙන මිනිසුන් සහ ගැහැනුන්ගේ දුක්ඛ දෝමනස්සයන්, ජය පරාජයන්,නැතිබැරිකම් සහ අතපසුවීම් ද ඒවා හමුවේ අරගල කරන ඔවුන්ගේ අත්දැකීම් ද කෙටිකතා ලෙස ඉදිරිපත් කිරීමට ඇය මේ කෘතිය තුළින් උත්සාහ දරා ඇත. එවැනි කෙටිකතා 09ක් මේ කෘතියට ඇතුළත්ය.
