වාරියපොල කොළඹගම
ශ්‍රී මියුගුණාරාම රාජමහා
විහාරාධිකාරි ආචාර්ය
පූජ්‍යපාද ගල්ලැහැපිටියේ
පේමරතන ස්වාමීන්වහන්සේ
(කොළඹගම පොඩි හාමුදුරුවෝ)
ව්‍යසනකාර අවස්ථාවලදී කුසල් රැස් කර ගනිමින්, එසේ රැස්කර ගත් කුසල් දෙවියන්ට අනුමෝදන් කරමින් දෙව් සිත් පහදවාගෙන ග්‍රහ පීඩා, භූත පීඩා, යක්ෂ, ප්‍රේත, පිසාච ආදී අමනුෂ්‍ය බලපෑම් නිසා ඇති වන කාය, චිත්ත පීඩා ආදී සියලු පීඩා අවම කර ගැනීමට ඉවහල් වන මහානුභාව සම්පන්න පුද පූජා විධි පිළිබඳවයි මෙවර දැනුම්වත් කිරීම.
හෙළ බිම පුද පූජා ලබන දෙවි දේවතාවුන් වහන්සේලා අතර හෙළ බොදුනුවන් වූ අපට පමණක් ආවේණික වූ දේවතාවුන් වහස්සේ වන්නේ ශ්‍රී පාද පද්මයට අධිගෘහිත ශ්‍රී සුමන සමන් දිව්‍ය රාජයාය. බුදු රජාණන් වහන්සේ යක්ෂ දමනය සඳහා මහියංගනයට වැඩම කළ මොහොතේ ශ්‍රී සුමන සමන් දිව්‍ය රාජයා බුදු පියාණන් වහන්සේ බැහැදැක වන්දනාමාන කිරීමට යමක් ඉල්ලා සිටියහ. ඒ අවස්ථාවේ බුදු පියාණන් වහන්සේ ශ්‍රී සුමන සමන් දිව්‍ය රාජයාට කේෂ ධාතු ස්වල්පයක් ලබා දුන් අතර, එම කේෂ ධාතු තැන්පත් කර සත් රියනක් උසට මහියංගණයේ මහ සෑ රදුන් ඉදි කළ බව ඉතිහාසයේ සඳහන් වේ.
සමස්ත ශ්‍රී ලංකාවාසී ජනතාවටම සෙත සලසන, යහපත උදා කරවන, බුද්ධ ස්පර්ශයෙන් පූජනීය වූ සමස්ත ශ්‍රී ලංකාවටම ඇල්ම බැල්ම, ආකර්ෂණය, පිහිට සහ ආරක්ෂාව ලබා දෙන මහා පින් ඇති දෙවියකු වන ශ්‍රී සුමන සමන් දිව්‍ය රාජයා බුදුරජාණන් වහන්සේ ජීවමානව වැඩ සිටි සමයේ උන්වහන්සේගෙන් ධර්ම ශ්‍රවණය කර සෝවාන් ඵලයට පත් බෝධිසත්ත්ව ගුණෝපේත දෙවියෙකි. මේ නිසා ශ්‍රී සුමන සමන් දිව්‍යරාජයා දන් පින්වල යෙදෙන යහපත් මිනිසුන්ගේ යහපත් කටයුතුවලට පිහිට වේ.
මල් පහන්, සුවඳ දුම් වැනි ආමිස පූජා මෙන්ම තම තමන්ගේ ශක්ති පමණින් අසරණ මිනිසුන්ට පිහිට වීම, කුසගින්නෙන් පෙළෙන අයට ආහාරපානාදියෙන් සංග්‍රහ කිරීම, ආර්ථික අපහසුතා ඇති ඉගෙන ගන්නා දරුවන්ට පාසල් උපකරණ පරිත්‍යාග කිරීම වැනි ප්‍රායෝගික ප්‍රතිපත්ති පූජාවන් පවත්වා ඉන් ජනිත වන කුසල් ශ්‍රී විෂ්ණු දිව්‍ය රාජයා ශ්‍රී සුමන සමන් දිව්‍ය රාජයා ප්‍රධාන කොටගත් දෙවි දේවතාවුන් වහන්සේලාට අනුමෝදන් කිරීම තුළින් රටේ පවතින ව්‍යසනකාරී තත්ත්වයන් මෙන්ම පෞද්ගලිකව මුහුණ පෑමට සිදු වන විවිධ පීඩා අනතුරු අවම කරගත හැකිය.
මේ පූජාව වඩාත් ඵලදායී වන්නේ නිතර පුද පූජා ලබන බෝධීන් වහන්සේ නමක් අබියස පැවැත්වීමෙනි.
පළමුවෙන්ම බෝ මළුව ඇමදීම සිදු කර, මල් ආසන ශුද්ධ පවිත්‍ර කර සුදු මල්, (සමන් පිච්ච නම් වඩා සුදුසුය) කහ මල්, රතු නෙළුම්, සඳුන් තෙල් සහ තැඹිලි තෙල් මිශ්‍ර පහනක්, ලද පස්මල් යන පූජා ද්‍රව්‍ය මල් ආසනය මත ඇතිරූ බුලත් මත තැන්පත් කර පහන් දල්වා තිසරණ සහිත පංච ශීලය සමාදන් වී තෙරුවන් වන්දනා කර බුද්ධ පූජා සහ බෝධි පූජා පවත්වන්න.
ඉන් අනතුරුව බෝ මළුවේ සුදුසු පහසු තැනක පහසු ඉරියව්වකින් වාඩි වී රුවන් පිරිත හෙවත් රතන සූත්‍රය හැකි උපරිම වාර ගණනක් සඡ්ඣායනා කරන්න.
අනතුරුව පහත සඳහන් ස්තෝත්‍ර ගායනා කරමින් ශ්‍රී සුමන සමන් දෙවියන් වන්දනා කරන්න.
ස්තෝත්‍ර
ශ්‍රී පද්ම හස්ත ගජ වාහන කාන්ත නේත්‍ර
සම්බුද්ධ පාද පරිපාලක ශාක්‍ය භක්ත
සෞමන්‍ය වාස ධවලාභ සමන්තන්දාත්වං
මාං දයාර්ද්‍ර හෘදයෝ වතපාභි දේව
ශ්‍රී මුනීන්ද්‍ර පාද පද්ම සංරක්ෂණ ධාරං
ශ්‍රී සමන්ත කූට වාස ශාසනෝපකාරං
ශ්‍රී සමන්ත දේව රාජ ස්වර්ණවාස හස්තං
ශ්‍රී විරාජමාන පුෂ්ප ආසක ප්‍රවිෂ්ටං
මෙම වන්දනාවෙන් පසු තමන් තම පවුලේ අය තම නෑ හිත මිත්‍රාදීන්, අසල්වාසීන් ඇතුළු සමස්ත ශ්‍රී ලංකා වාසී ජනතාවටම සහනය, ශාන්තිය, නිදුක් නිරෝගී සුවය උදා කර දෙන්නැයි ඉල්ලා සිටින්න.
ඉන් අනතුරුව පහත සඳහන් ගාථාවෙන් ශ්‍රී සුමන සමන් දිව්‍ය රාජයාට ද ආකාසට්ඨාච ගාථාවෙන් ශ්‍රී විෂ්ණු දිව්‍ය රාජයා ප්‍රධාන සමස්ත දේව සමූහයාට ද පින් අනුමොදන් කර පූජාව නිම කරන්න.
මෙම පූජාව බෝධීන් වහන්සේ නමක් අබියස පැවැත්වීමෙන් අනතුරුව දිනපතා නිවෙසේ බුදු පහන තබා බුද්ධ පූජා පැවැත්වීමෙන් අනතුරුව දෙවියන්ට පින් දෙන අවස්ථාවේ දී ශ්‍රී සුමන සමන් දිව්‍ය රාජයාට පින් අනුමෝදන් කරන්න.
ශ්‍රී සුමන සමන් දිව්‍ය රාජයාට පින් දීමේ ගාථාව
සම්බුද්ධ පාද වර ලක්ඛණ සෝභිතම්හි
වාසෝ සමන්ත ගිරි මුද්ධනී දේව රාජා
පුඤ්ඤා නු මොදිය ඉධංසුමනාභිධානෝ
පාලේතු මං සතත සාත හිතා වහන්තෝ
සකස් කළේ, සුනිල් පොරමඬල
