වාරියපොල කොළඹගම ශ්‍රී මියුගුණාරාම රාජමහා විහාරාධිකාරි,
ආචාර්ය පූජ්‍යපාද ගල්ලැහැපිටියේ
පේමරතන ස්වාමීන් වහන්සේ
(කොළඹගම පොඩි හාමුදුරුවෝ)
බුදු දහම හා බැඳුණු නක්ෂත්‍රය පිළිබඳ බොහෝ අය විවිධ මතිමතාන්තර දැරුවද අනාදිමත් කාලයක සිට අපි අපේ ජීවිතවල විශේෂිත අවස්ථා සියල්ලේදී නක්ෂත්‍රානුකූලව එම කටයුතු ඉටු කිරීමට හුරු පුරුදුව සිටින්නෙමු.
උපතක් සිදු වූ විට නම් තැබීම, හිසකේ කැපීම, කන් විදීම, ඉඳුල් කට ගෑම, අකුරු කියවීම, මල්වර වීම, විවාහය, නිවෙස් ඉදි කිරීම, ගොවිතැන් කටයුතු ව්‍යාපාර ආරම්භය ආදී වශයෙන් අපේ ජීවිතවල සියලු විශේෂ අවස්ථා සඳහා අපි නක්ෂත්‍රය භාවිත කරනවා මෙන්ම ග්‍රහයන්ගෙන් සිදු වන අපල උපද්‍රවවලදී ඉන් මිදීම සඳහා විවිධ ශාන්තිකර්ම, වත්පිළිවෙත් ඇවතුම් පැවතුම් ඉටු කිරීමට ද කටයුතු කරන්නෙමු.
මෙම වත් පිළිවෙත් අතර ඇති විශේෂ සරල එහෙත් ප්‍රබල පූජා විධියක් අද සිළුමිණ පාඨක ඔබට හඳුන්වා දීමට ගරු ස්වාමීන්වහන්සේ අදහස් කරති. “සිරිත් විරිත්, චාරිත්‍ර වාරිත්‍ර ඉටු කරනවා යනු කළ යුතු, නොකළ යුතු දේ තෝරා බේරාගෙන කටයුතු කිරීමයි. සිරිත් එහෙම නැත්නම් චාරිත්‍ර කියන්නේ කළ යුතු දේවල්. විරිත් එහෙම නැත්නම් වාරිත්‍ර කියන්නේ නොකළ යුතු දේවල්. කළ යුතු නොකළ යුතු දේ තෝරා බේරාගෙන කටයුතු කිරීමක් තමයි නක්ෂත්‍රයෙන් සිදු වන්නේ.
නව ග්‍රහයන්ගෙන් සිදු වන ග්‍රහ දෝෂ ඉවත් කර ගැනීම හෝ අවම කර ගැනීමට යොදා ගත හැකි නව ග්‍රහ සෙත් ජයමංගල කවි තිබෙනවා. නක්ෂත්‍රයානුකූලව බලන විට එකම නිවෙසක එක්කෙනෙකුට සෙනසුරු අපලයක් තියෙද්දි එම නිවසේම තවත් කෙනකු වෙනත් ග්‍රහයකුගේ බලපෑම්වලින් පීඩා විඳිනවා විය හැකියි. මේ නිසා මොන ග්‍රහයගෙන් ද මෙහෙම පීඩා විඳින්නේ කියලා නොහිතා නව ග්‍රහයන්ටම පුද පූජා පැවැත් වීමෙන් විස්මිත විපුල ප්‍රතිඵල ළඟා කර ගත හැකිය.
මේ සඳහා එදා අපේ වැඩිහිටියන් විසින් මනා ලෙස ගණ පිහිටුවා බුදු ගුණ ද මුසු වන ආකාරයට සකස් කළ නව ග්‍රහ සෙත් ජයමංගල කවි බුදු පහන තබන ස්ථානයේ සිට දිනපතා උදේ හෝ සවස වෙනදා පුරුදු ලෙස පහන තබා පංචශීලය සමාදන් වී අනතුරුව මෙම උතුම් බලගතු කවි ගායනා කරන්න.
එවිට අපල කරන ග්‍රහයන්ගේ වෙන පීඩා අවම වෙන අතර, සුබ පල දෙන ග්‍රහයන්ගෙන් සිදු වන සුබ පල වැඩි වෙනවා.
නවග්‍රහ සෙත් ජය මංගල කවි
1. අරුණ වේලෙහි බුදුව මුණි රජ දහම් දෙසු ජය මංගලම්
දරුණු වසවත් දහම් බලයෙන් පැරදු පින්සිරි මංගලම්
සොබන පරසතු මධාරා මල් අට මිටක් පිදු මංගලම්
හිරුගෙ අපලේ එමුණි බලයෙන් දුරු වේවා ජය මංගලම්
2. පිදුව දෙදරුන් දෙ අත් බැඳ බමුණාට වෙසතුරු මංගලම්
සඳුගෙ විමනෙහි එමුණි ගුණකින් ඇන්ද සඳ මැද මංගලම්
හිඳුව යහනෙක යශෝදර සැම පැවිදි වුණු ජය මංගලම්
සඳුගෙ අපලේ එමුනි බලයෙන් දුරු වේවා ජය මංගලම්
3. දරණ ලා සිටි නා රජුන් පිට වැඩ සිටිය ජය මංගලම්
දෙ අග සව්වන් සහිත සඟ ගණ පිරි වැරූ ජය මංගලම්
සඟුන් දෙදෙනා රහත් පන්සිය සමඟ වැඩ සිටි මංගලම්
අඟහරුගෙ දොස එමුනි බලයෙන් දුරු වේවා ජය මංගලම්
4. නොහැර ඔත්පල දෙනෙත් නැති මව් පියක් රැකි ජය මංගලම්
අදහසින් දැඩි කරන මවුපිය නොවිඳ කී ජය මංගලම්
බුදුහු ගිරි මේඛලා ඇතු දැක දැපන කළ ජය මංගලම්
බුදහුගෙන් වන අපල උවදුරු දුරු වේවා ජය මංගලම්
5.රහස් උමගය කැපෙව් මහ ඔසු පඬිතුමා ජය මංගලම්
දහස් සියයක් දනෝ එනුවර යුදෙන් ගැලවුන මංගලම්
දහස් සාවක පාල ධර්මය නිපුන කළ ජය මංගලම්
බ්‍රහස්පතිගෙන් පැමිණි උවදුරු දුරු වේවා ජය මංගලම්
6. එකුරු දහමය ලොවට පූජිත කරපු ජය සිරි මංගලම්
අකුරු නිපුනව එවිසි සැට සිල්පයක් දැරු ජය මංගලම්
අකුරු පළමුව නිපැදු මුණිදුගෙ බෙලෙන් වේ ජය මංගලම්
සිකුරුගෙන් වන අපල උවදුරු දුරු වේවා ජය මංගලම්
7. වෙන අයෙක් නැත යුද කරන්නට පුත්‍ර ලෙළ දුන් මංගලම්
වෙන කෙනෙක් මට නැතැයි සිතමින් දස පෙරුම් පිරු මංගලම්
සෙන හඬින් හඬ තලා මරසෙන් දසත එසවූ මංගලම්
සෙනසුරාගෙන් පැමිණි උවදුරු දුරු වේවා ජය මංගලම්
8. පාදවත් නැවතත් නොගත් සිරි පාද විහිදෙව් මංගලම්
රාහු අසුරිඳු එබල රජු මේ ලොවට වැඩමෙව් මංගලම්
රාහුලත් කුමරුන් කෙනෙක්වත් නැතැයි සිතු ඒ මංගලම්
රාහුගෙන් වන අපල උවදුරු දුරු වේවා ජය මංගලම්
9. දාතු දාගැබ් වෙහෙර මහියංගණේ පිහිටෙව් මංගලම්
දාතු නාලෝ නා රජුන්ගේ බෙලෙන් වේවා මංගලම්
දාතු දළදා තුනුරුවන්ගෙ බෙලෙන් වේවා මංගලම්
කේතුගෙන් වන අපල උවදුරු දුරුවේවා ජය මංගලම්
මෙම නව ග්‍රහ සෙත් ජයමංගල කවි ඔබට හැකි සෑම අවස්ථාවකම ගායනා කර ප්‍රතිඵල ලබා ගන්න.
සකස් කළේ, සුනිල් පොරමඬල
