‘එක රටක් - එක නීතියක්’ යන්න අද රට පුරාම ක්‍රියාත්මක කරවීමට රජය උත්සාහ දරයි. ඒ අනුව අද මොන ජගතා වුවත් වරදක් කළොත් ඒ අයටත් නීතිය එක සමානව ක්‍රියාත්මක කෙරෙයි.
අප මේ අදහස ඉදිරිපත් කළේ පසුගිය දිනක අපි පිළියන්දල කරදියාන බට්ටියාවත්ත ප්‍රදේශයේ දුටු සුවිශේෂ සිදුවීමක් නිසාය. 2019 ජනාධිපතිවරණයට මාසයකට පෙර යහපාලන රජයේ ප්‍රාදේශීය දේශපාලනඥයන්ගේ උදව් ඇතිව ගොඩකළ පිළියන්දල කරදියාන බට්ටියාවත්තේ වගුරු බිමක පස් සම්පූර්ණයෙන් ඉවත් කිරීමේ සිද්ධිය ඒ සුවිශේෂි අවස්ථාවයි.
පිළියන්දල වේරැස් ගඟ ගංවතුර පාලන ව්‍යාපෘතිය සඳහා පවරාගෙන තිබු අක්කරයකට වඩා විශාල අතහැර දමන ලද කුඹුරු ඉඩමක් අනවසරයෙන් ගොඩකර තිබූ අවස්ථාවක ශ්‍රී ලංකා ඉඩම් සංවර්ධනය කිරීමේ සංස්ථාව මඟින් එහි තිබූ පස් ටිපර් රථ 15ක් මඟින් ඉවත්කර ගනු ලැබීම පසුගිය දිනවලදී සිදුවිය. මේ පස් ගොඩකිරීම නිසා ප්‍රදේශයේ විශාල ජල මාර්ගයේ ජල පරිවහනයට බාධා එල්ලවී තිබිණි.
වේරැස් ගඟ ගංවතුර පාලන ව්‍යාපෘතිය ආරම්භ කරනු ලැබුවේ වත්මන් ජනාධිපති ගෝඨාභය රාජපක්ෂ මහතා නාගරික සංවර්ධන අමාත්‍යාංශයේ ආරක්ෂක ලේකම් ලෙස කටයුතු කරන කාලයේදීය.
ඒ පිළිබඳව කරුණු දැක්වූ ශ්‍රී ලංකා ඉඩම් සංවර්ධනය කිරීමේ සංස්ථාවේ ප්‍රජා සංවර්ධන කළමනාකරු නිශාන්ත යල්කුඹුර මහතා මෙසේ පවසයි.
ඉස්සර අපි පවරාගත් ඉඩමක් වුවත් ගොඩ කළාට පසු ඉවත් කරන්න අපිට අපහසු වුණා. ඒ ඉහළ නිලධාරින් බලධාරින් කෙළින් කටයුතු කළේ නැති නිසා. නමුත් දැන් තත්ත්වය වෙනස්. ගෝඨාභය රාජපක්ෂ ජනපතිගේ වැඩපිළිවෙළ අනුව නීතිය සැමටම සමානව ක්‍රියාත්මකයි. දැන් අපේ අලුත් සභාපතිතුමාත් මේ පිළිබඳව හරියට ඍජුව කටයුතු කිරීම නිසා අපටත් රාජකාරි හරියට කරන්න පහසුයි.
2013 - 19 කාලයේ බෙල්ලන්විල පැපිලියාන ප්‍රදේශවලට ආරම්භ කරපු වේරැස් ගඟ ව්‍යාපෘතිය යටතේ අපි බෝකුන්දර ප්‍රදේශයේ මහඇළ සකස් කළා.
ඒ මඟින් මහරගම හා අවට ප්‍රදේශවල එකතුවන වැසි ජලය පවා මේ ඇළ මඟින් බොල්ගොඩ ගඟට යොමු කරනවා. වේරැස් ගඟ සම්පූර්ණ ව්‍යාපෘතියට ශ්‍රී ලංකා ඉඩම් සංවර්ධනය කිරීමේ සංස්ථාව රුපියල් කෝටි 1400ක් වැය කරනවා.
මෙහි එක් අදියරක් ලෙස දැන් පිළියන්දල කරදියාන ප්‍රදේශයේ ජල මාර්ග හා ජලාශ අලුතින් සකස් කරනවා. ඒ සඳහා අපි ඉඩම් පවරාගෙන තිබුණේ. නමුත් ඒ සමහර ඉඩම් පසුගිය වසරේ අගභාගයේදි කුණු කසළ දමා උඩින් ගල් දමා ගොඩකර තිබුණා. ඉන් එක් ඉඩමක තමයි අපි පස් ඉවත් කරන්නේ.
ඒ අනුව අපේ සභාපති මේජර් ජනරාල් එම්.ආර්.ඩබ්. සොයිසා මහතාගේ උපදෙස් අනුව මේ ස්ථානයේ පස් සම්පූර්ණයෙන්ම ඉවත් කිරීමට කටයුතු සිදුකරන්න පටන් ගත්තා. නිශාන්ත යල්කුඹුර මහතා පවසයි.
ඒ අනුව පසුගිය 22 - 23 - 24 දිනවලදි පස් කියුබ් 700ක් විතර ඉවත් කර ඇත. ඒ සඳහා විශාල ප්‍රමාණයේ ටිපර් රථ 15ක් පාවිච්චි කර තිබේ.
මේ පිළිබඳව අපට කරුණු දැක්වූ ව්‍යාපෘති වැඩ පරීක්ෂක ගයාන් ප්‍රියදර්ශන මහතා පැවසුවේ මේ පස් ඉවත් කිරීමේ කටයුත්තට පිළියන්දල පොලිසියේ ද පූර්ණ සහාය ලැබුණු බවයි.
මේ පිළිබඳව අදහස් දැක්වූ ශ්‍රී ලංකා ඉඩම් සංවර්ධනය කිරීමේ සංස්ථාවේ සභාපති මේජර් ජනරාල් එම්.ආර්.ඩබ්ලිව්. සොයිසා මහතා පැවසුවේ තම ආයතනයේ ව්‍යාපෘතියක් වන මේ වේරැස් ගඟ ව්‍යාපෘති ප්‍රදේශයේ සිදුකළ අනවසර ගොඩකිරම් දෙකක පස් ඉවත්කිරීමට දැනටමත් තම ආයතනයේ නිලධාරින් කටයුතු කළ බවයි.
“අපි මේ ව්‍යාපෘතිය යටතේ කරන්නේ අවට ප්‍රදේශයේ ගංවතුර ඇතිවීම අවම කර ප්‍රදේශයේ පරිසරය සංරක්ෂණය හා ලස්සන කිරීමයි. අපි මේ ප්‍රදේශයේ ජලාශ ඉදිකර ඉහළ ප්‍රදේශයේ ජලය පහළ බොල්ගොඩ ගඟට යවන්න කටයුතු කරනවා. නමුත් ඊට බාධාකර ඒ ජල මාර්ගය සහ ඉඩම් ගොඩකළ විට අපේ කටයුතුවලට ඉමහත් බාධාවක් වෙනවා.
මේවායේ අනවසර වගුරු බිම් ගොඩකිරීමෙන් පාරිසරිකව ඇතිවන හානිය අති විශාලයි. ඒ හානිය අවම කරන්න මහජන මුදල් වැය කරමින් අපිට දැන් මේවාගේ අනවසර ගොඩකිරීම්වල පස් ඉවත් කරන්න සිදුවෙලා තිබෙනවා. ඒක ජාතික අපරාධයක්. ඒ පිළිබඳව මේ නීති විරෝධි ගොඩකිරීම් කරන අය කල්පනා කළ යුතුය.
මේ පිළියන්දල කරදියාන බට්ටියාවත්ත ප්‍රදේශයේ වගුරු බිම් ප්‍රදේශයට අපි අ‍ෙප්ක්ෂා කළේ ප්‍රදේශයේ වැසි වතුර ගලායන ජලාශයක් විදියට සකස් කරන්න. නමුත් මේ අනවසර ගොඩකිරීම් නිසා එකතුවෙන වැසි ජලය පිටාර ගැලීම නිසා අවට ජනතාවගේ ජන ජීවිතයට හා අපේ වේරැස් ගඟ ව්‍යාපෘතියට බාධා එල්ල වුණා. ඒ නිසයි අපි මේ පස් ඉවත් කිරීමට කටයුතු කළේ.” සභාපතිවරයා පවසයි.
“මේ වගුරුබිම් හා අත්හැර දැමූ කුඹුරු ඉඩම් ගොඩකිරීම වළක්වන්න හා ඒවා ගොඩකරන අයට දඬුවම් දීමට අලුත් පනතක් පාර්ලිමේන්තුවට ඉදිරිපත් කිරීමට කටයුතු කරනවා.
ඒ පනත අනුව අනවසර ගොඩකිරීම් නවතාලීමේ බලතල හා ඒවා කරන අයට දඬුවම් දීමේ බලතල අපට ලැබෙනවා.
ඒ අයට සිර දඬුවම් දීමට හා අනවසර ගොඩකිරීම් කරන අයටම ඒවා ඉවත් කිරීමට අදාළ නීතිරීති මේ නව පනත මඟින් ක්‍රියාවට නංවන බවත් සභාපතිවරයා කීය.
දැනටම දෙල්කඳ ප්‍රදේශයේ අක්කර 4ක ඉඩමක් හා වේරැස් ගඟ ආශ්‍රිත කලාපයේ හඳුනාගත් විවිධ අනවසර ගොඩකිරීම් ස්ථානවල පස් ඉවත් කිරීමට පියවර ගෙන ඇති බවත් ඒවාට පොලිසියේ සහාය ලැබෙන බවත් සභාපතිවරයා අවධාරණය කළේය.
ඉඩම් අත්පත් කර ගැනීමේ පනත අනුව එහි 38 ආ වගන්තිය යටතේ 2019 වසරේ ගැසට් කර රජයට පවරාගත් මේ කරදියාන ඉඩම පසුගිය වසර අග භාගයේදි ගොඩකර තිබිණ.
යම් අයකුට යම් අත්‍යවශ්‍ය කරුණක් සම්බන්ධයෙන් හෝ මොනයම් අවශ්‍යතාවක් වෙනුවෙන් හෝ ඉඩම් ගොඩකිරීමට අයකු කටයුතු කරන්නේ නම් ඒ සඳහා නීති රෙගුලාසිවලට අනුව කටයුතු කළ යුතුව ඇතැයි ඉඩම් සංවර්ධනය කිරීමේ සංස්ථාව පවසයි.
මේ පිළිබඳව අදහස් දැක්වූ මෙම ගොඩකරන ඉඩමේ අයිතිකරුවූ ටි.එච්. සරත් ප්‍රේමජයන්ත මහතා පැවසුවේ මේ ඉඩම අක්කරයක් විශාල බවයි. තමාට හොරෙන් තම ඉඩම කවුරු හරි ගොඩකර ඇති බවත් මේ පස් ඉවත් කිරීමට තමා පූර්ණ සහාය ලබාදෙන බවත් ඔහු කීය. තමාට වන්දියක් ලැබෙනු ඇතැයි අපේක්ෂා කරන බවත් ඔහු කීය.
පිළියන්දල කරදියාන බට්ටියවත්ත තවත් වගුරු ඉඩම් කීපයක් මෙසේ අනවසර ලෙස ගොඩකර ඇත. ඒ නිසා ඇතිවන ගංවතුර නිසා ජනතාව ඉමහත් පීඩා විඳිති.
මේ පිළිබඳව අදහස් දැක්වූ කරදියාන බට්ටියවත්ත පදිංචි ඩී.එම්. නදීකා මහත්මිය පැවසුවේ මේ ඉඩම් අනවසර ලෙස ඉදිකිරීම නිසා ප්‍රදේශයේ ගංවතුර වැඩිවූ බවයි.
“මේ අපේ ගේ ඉස්සරහ තිබෙන ඉඩම ගොඩකරන්න පටන් ගත්තේ 2019 ජනාධිපතිවරණයට සති 2 - 3 කට කලින්. පසුගිය දවස්වල ඒ ඉඩම ගොඩකරපු අය ඒක විකුණන්නත් දාලා තිබුණේ. ඒ ඉඩම මිලට ගන්නත් කට්ටිය ආවා. පර්චස් එක ලක්ෂ 4යි කිව්වා. මේ ඉඩම ගොඩකිරීම නිසා වහින කාලෙට අපේ ගෙවල් යටවෙනවා. බට්ටියාවත්ත පාරත් යටවෙනවා. දරුවන්ට පාසල් යන්නවත් බැහැ. ඒ පස් අයින් කරන එක ඉතා හොඳ වැඩක්.” නදීකා මහත්මිය පවසන්නීය.
බට්ටියාවත්ත ප්‍රදේශයේ තිබෙන ප්‍රධාන විහාරස්ථානය වන කරදියාන වාලුකාරාමයේ විහාරාධිකාරි මකුළුදූවේ සාරානන්ද හිමිපාණන් පැවසුවේ මේ ප්‍රදේශයේ අනවසර ගොඩකිරීම් නිසා වැසි කාලයට තම විහාරස්ථානයට එන මාර්ගය පුරා ජලගැලීම් ඇතිවන බවයි.
“අපි කැමතියි මේ පස් ටික ඉවත් කරන එක පිළිබඳව. අපි ඒ වැඩසටහනට පූර්ණ සහාය දෙනවා. ඒ වගුරු බිම් තිබුණා නම් වැසි කාලයට වතුර උරා ගන්නවා. ඒවා නැති නිසා වැසි වතුර දෝරේ යනවා. අවට පරිසරය සුරැකීම සිදුවෙනවා නම් මේ පන්සලට එන බෞද්ධ ජනතාවටත් හොඳයි.” උන්වහන්සේ පවසති.
ප්‍රදේශවාසි ජනතාව මෙන් ම පරිසර සංවිධාන ද පවසන්නේ පසුගිය කාලවල විවිධ දේශපාලන බලපුළුවන්කාරකම් අනුව සිදුකළ අනවසර ගොඩකිරීම් සඳහා විරුද්ධවීමක් පසුගිය කාලයේ සිදු නොවුණත් දැන් මේ පාරිසරික විනාශය පිළිබඳව රජය ඍජුව කටයුතු කිරීම ප්‍රශංසනීය බවයි.
“මීට පෙර අපේ රටේ මෙලෙස වගුරු ඉඩම් ගොඩකරන ලද පස් ඉවත් කිරීමක් සිදු වුණේ නැහැ. ඒවා නඩු දාලා ඇදි ඇදී තිබුණා” මිහිතල මිතුරෝ පරිසර පදනමේ ලේකම් කරුණාදාස මූණගම මහතා පවසයි. වත්මන් රජයේ ජනාධිපති ගෝඨාභය රාජපක්ෂ මහතාගේ නායකත්වය හා උපදෙස් අනුව මේ වැඩසටහන ඍජුව ක්‍රියාත්මක වීම පිළිබඳ හරිත මිතුරෝ පරිසර පදනමේ ලේකම් ප්‍රියදර්ශන සමන් කුමාර ඇතුළු පරිසර සංවිධාන ද සිය සතුට පළ කරති.
මේ පිළිබඳව අදහස් දැක්වූ පිළියන්දල කරදියාන බට්ටියාවත්ත පදිංචි නිරෝෂා ශ්‍යාමලි මහත්මිය පැවසුවේ පරිසරය විනාශ කරන මෙවැනි අනවසර ගොඩකිරීම් ඉවත් කිරීම පරිසර හිතකාමි කටයුත්තක් බවයි.
ඒ අනුව තම නිවාස අසල ගංවතුර ගැලීම වැළැක්වීමට ඉඩම් සංවර්ධනය කිරීමේ සංස්ථාව කටයුතු කිරීම අගය කරන්න ඕනෑ බවද ශ්‍යාමලි මහත්මියද පෙන්වා දුන්නාය.
සල්ලි හම්බු කරන්න පරිසරය විනාශ කරන අපේ රටේ අනවසර ගොඩකිරීම් හා අනවසර ඉදිකිරීම් නිසා අපේ රටේ ජල මාර්ගවල ගමනට බාධා එල්ලවී පාරිසරික ගැටලු රැසක් නිර්මාණය කරයි. ඒවා වැළැක්වීමට ඉඩම් සංවර්ධනය කිරීමේ සංස්ථාව මේ දිනවල කටයුතු කිරීම රටේ පරිසර සංරක්ෂණයට ඉමහත් මෙහෙයකි. ඊට පූර්ණ සහාය දීම පරිසරයට මෙන් ම රටට ආදරේ කරන සැමගේ යුතුකමකි.
ඡායාරූප - සරත් පීරිස්
